অধ্যায় 134

134.1

ভীষ্ম উবাচ
অত্র গাথা ব্রহ্মগীতাঃ কীর্তয়ন্তি পুরাবিদঃ
যেন মার্গেণ রাজানঃ কোশং সংজনয়ন্তি চ

ন ধনং যজ্ঞশীলানাং হার্যং দেবস্বমেব তৎ
দস্যূনাং নিষ্ক্রিয়াণাং চ ক্ষত্রিয়ো হর্তুমর্হতি

ইমাঃ প্রজাঃ ক্ষত্রিয়াণাং রক্ষ্যাশ্চাদ্যাশ্চ ভারত
ধনং হি ক্ষত্রিয়স্যেহ দ্বিতীয়স্য ন বিদ্যতে

তদস্য স্যাদ্বলার্থং বা ধনং যজ্ঞার্থমেব বা
অভোগ্যা হ্যোষধীশ্ছিত্ত্বা ভোগ্যা এব পচন্ত্যুত

যো বৈ ন দেবান্ন পিতৄন্ন মর্ত্যান্হবিষার্চতি
আনন্তিকাং তাং ধনিতামাহুর্বেদবিদো জনাঃ

হরেত্তদ্দ্রবিণং রাজন্ধার্মিকঃ পৃথিবীপতিঃ
ন হি তত্প্রীণয়েল্লোকান্ন কোশং তদ্বিধং নৃপঃ

অসাধুভ্যো নিরাদায় সাধুভ্যো যঃ প্রয়চ্ছতি
আত্মানং সংক্রমং কৃত্বা মন্যে ধর্মবিদেব সঃ

ঔদ্ভিজ্জা জন্তবঃ কেচিদ্যুক্তবাচো যথা তথা
অনিষ্টতঃ সংভবন্তি তথায়জ্ঞঃ প্রতায়তে

যথৈব দংশমশকং যথা চাণ্ডপিপীলিকম্
সৈব বৃত্তিরয়জ্ঞেষু তথা ধর্মো বিধীয়তে

যথা হ্যকস্মাদ্ভবতি ভূমৌ পাংসুতৃণোলপম্
তথৈবেহ ভবেদ্ধর্মঃ সূক্ষ্মঃ সূক্ষ্মতরোঽপি চ