Utshovঅধ্যায় 133
133.1
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
যথা দস্যুঃ সমর্যাদঃ প্রেত্যভাবে ন নশ্যতি
133.2
প্রহর্তা মতিমাঞ্শূরঃ শ্রুতবাননৃশংসবান্
রক্ষন্নক্ষয়িণং ধর্মং ব্রহ্মণ্যো গুরুপূজকঃ
133.3
নিষাদ্যাং ক্ষত্রিয়াজ্জাতঃ ক্ষত্রধর্মানুপালকঃ
কাপব্যো নাম নৈষাদির্দস্যুত্বাত্সিদ্ধিমাপ্তবান্
133.4
অরণ্যে সায়পূর্বাহ্ণে মৃগয়ূথপ্রকোপিতা
বিধিজ্ঞো মৃগজাতীনাং নিপানানাং চ কোবিদঃ
133.5
সর্বকাননদেশজ্ঞঃ পারিয়াত্রচরঃ সদা
ধর্মজ্ঞঃ সর্বভূতানামমোঘেষুর্দৃঢায়ুধঃ
133.6
অপ্যনেকশতাঃ সেনা এক এব জিগায় সঃ
স বৃদ্ধাবন্ধপিতরৌ মহারণ্যেঽভ্যপূজয়ৎ
133.7
মধুমাংসৈর্মূলফলৈরন্নৈরুচ্চাবচৈরপি
সত্কৃত্য ভোজয়ামাস সম্যক্পরিচচার চ
133.8
আরণ্যকান্প্রব্রজিতান্ব্রাহ্মণান্পরিপালয়ন্
অপি তেভ্যো মৃগান্হত্বা নিনায় চ মহাবনে
133.9
যে স্ম ন প্রতিগৃহ্ণন্তি দস্যুভোজনশঙ্কয়া
তেষামাসজ্য গেহেষু কাল্য এব স গচ্ছতি
133.10
তং বহূনি সহস্রাণি গ্রামণিত্বেঽভিবব্রিরে
নির্মর্যাদানি দস্যূনাং নিরনুক্রোশকারিণাম্
133.11
দস্যব ঊচুঃ
মুহূর্তদেশকালজ্ঞ প্রাজ্ঞ শীলদৃঢায়ুধ
গ্রামণীর্ভব নো মুখ্যঃ সর্বেষামেব সংমতঃ
133.12
যথা যথা বক্ষ্যসি নঃ করিষ্যামস্তথা তথা
পালয়াস্মান্যথান্যায়ং যথা মাতা যথা পিতা
133.13
কাপব্য উবাচ
মা বধীস্ত্বং স্ত্রিয়ং ভীরুং মা শিশুং মা তপস্বিনম্
নায়ুধ্যমানো হন্তব্যো ন চ গ্রাহ্যা বলাত্স্ত্রিয়ঃ
133.14
সর্বথা স্ত্রী ন হন্তব্যা সর্বসত্ত্বেষু যুধ্যতা
নিত্যং গোব্রাহ্মণে স্বস্তি যোদ্ধব্যং চ তদর্থতঃ
133.15
সস্যং চ নাপহন্তব্যং সীরবিঘ্নং চ মা কৃথাঃ
পূজ্যন্তে যত্র দেবাশ্চ পিতরোঽতিথয়স্তথা
133.16
সর্বভূতেষ্বপি চ বৈ ব্রাহ্মণো মোক্ষমর্হতি
কার্যা চাপচিতিস্তেষাং সর্বস্বেনাপি যা ভবেৎ
133.17
যস্য হ্যেতে সংপ্ররুষ্টা মন্ত্রয়ন্তি পরাভবম্
ন তস্য ত্রিষু লোকেষু ত্রাতা ভবতি কশ্চন
133.18
যো ব্রাহ্মণান্পরিভবেদ্বিনাশং বাপি রোচয়েৎ
সূর্যোদয় ইবাবশ্যং ধ্রুবং তস্য পরাভবঃ
133.19
ইহৈব ফলমাসীনঃ প্রত্যাকাঙ্ক্ষতি শক্তিতঃ
যে যে নো ন প্রদাস্যন্তি তাংস্তান্সেনাভিয়াস্যতি
133.20
শিষ্ট্যর্থং বিহিতো দণ্ডো ন বধার্থং বিনিশ্চয়ঃ
যে চ শিষ্টান্প্রবাধন্তে ধর্মস্তেষাং বধঃ স্মৃতঃ
133.21
যে হি রাষ্ট্রোপরোধেন বৃত্তিং কুর্বন্তি কেচন
তদেব তেঽনু মীয়ন্তে কুণপং কৃময়ো যথা
133.22
যে পুনর্ধর্মশাস্ত্রেণ বর্তেরন্নিহ দস্যবঃ
অপি তে দস্যবো ভূত্বা ক্ষিপ্রং সিদ্ধিমবাপ্নুয়ুঃ
133.23
ভীষ্ম উবাচ
তত্সর্বমুপচক্রুস্তে কাপব্যস্যানুশাসনম্
বৃত্তিং চ লেভিরে সর্বে পাপেভ্যশ্চাপ্যুপারমন্
133.24
কাপব্যঃ কর্মণা তেন মহতীং সিদ্ধিমাপ্তবান্
সাধূনামাচরন্ক্ষেমং দস্যূন্পাপান্নিবর্তয়ন্
133.25
ইদং কাপব্যচরিতং যো নিত্যমনুকীর্তয়েৎ
নারণ্যেভ্যঃ স ভূতেভ্যো ভয়মার্ছেত্কদাচন
133.26
ভয়ং তস্য ন মর্ত্যেভ্যো নামর্ত্যেভ্যঃ কথংচন
ন সতো নাসতো রাজন্স হ্যরণ্যেষু গোপতিঃ