অধ্যায় 132

132.1

ভীষ্ম উবাচ
অত্র কর্মান্তবচনং কীর্তয়ন্তি পুরাবিদঃ
প্রত্যক্ষাবেব ধর্মার্থৌ ক্ষত্রিয়স্য বিজানতঃ
তত্র ন ব্যবধাতব্যং পরোক্ষা ধর্ময়াপনা

অধর্মো ধর্ম ইত্যেতদ্যথা বৃকপদং তথা
ধর্মাধর্মফলে জাতু ন দদর্শেহ কশ্চন

বুভূষেদ্বলবানেব সর্বং বলবতো বশে
শ্রিয়ং বলমমাত্যাংশ্চ বলবানিহ বিন্দতি

যো হ্যনাঢ্যঃ স পতিতস্তদুচ্ছিষ্টং যদল্পকম্
বহ্বপথ্যং বলবতি ন কিংচিত্ত্রায়তে ভয়াৎ

উভৌ সত্যাধিকারৌ তৌ ত্রায়েতে মহতো ভয়াৎ
অতি ধর্মাদ্বলং মন্যে বলাদ্ধর্মঃ প্রবর্ততে

বলে প্রতিষ্ঠিতো ধর্মো ধরণ্যামিব জঙ্গমঃ
ধূমো বায়োরিব বশং বলং ধর্মোঽনুবর্ততে

অনীশ্বরে বলং ধর্মো দ্রুমং বল্লীব সংশ্রিতা
বশ্যো বলবতাং ধর্মঃ সুখং ভোগবতামিব
নাস্ত্যসাধ্যং বলবতাং সর্বং বলবতাং শুচি

দুরাচারঃ ক্ষীণবলঃ পরিমাণং নিয়চ্ছতি
অথ তস্মাদুদ্বিজতে সর্বো লোকো বৃকাদিব

অপধ্বস্তো হ্যবমতো দুঃখং জীবতি জীবিতম্
জীবিতং যদবক্ষিপ্তং যথৈব মরণং তথা

যদেনমাহুঃ পাপেন চারিত্রেণ বিনিক্ষতম্
স ভৃশং তপ্যতেঽনেন বাক্শল্যেন পরিক্ষতঃ

অত্রৈতদাহুরাচার্যাঃ পাপস্য পরিমোক্ষণে
ত্রয়ীং বিদ্যাং নিষেবেত তথোপাসীত স দ্বিজান্

প্রসাদয়েন্মধুরয়া বাচাপ্যথ চ কর্মণা
মহামনাশ্চৈব ভবেদ্বিবহেচ্চ মহাকুলে

ইত্যস্মীতি বদেদেবং পরেষাং কীর্তয়ন্গুণান্
জপেদুদকশীলঃ স্যাত্পেশলো নাতিজল্পনঃ

ব্রহ্মক্ষত্রং সংপ্রবিশেদ্বহু কৃত্বা সুদুষ্করম্
উচ্যমানোঽপি লোকেন বহু তত্তদচিন্তয়ন্

অপাপো হ্যেবমাচারঃ ক্ষিপ্রং বহুমতো ভবেৎ
সুখং বিত্তং চ ভুঞ্জীত বৃত্তেনৈতেন গোপয়েৎ
লোকে চ লভতে পূজাং পরত্র চ মহত্ফলম্