অধ্যায় 131

131.1

ভীষ্ম উবাচ
স্বরাষ্ট্রাত্পররাষ্ট্রাচ্চ কোশং সংজনয়েন্নৃপঃ
কোশাদ্ধি ধর্মঃ কৌন্তেয় রাজ্যমূলঃ প্রবর্ততে

তস্মাত্সংজনয়েত্কোশং সংহৃত্য পরিপালয়েৎ
পরিপাল্যানুগৃহ্ণীয়াদেষ ধর্মঃ সনাতনঃ

ন কোশঃ শুদ্ধশৌচেন ন নৃশংসেন জায়তে
পদং মধ্যমমাস্থায় কোশসংগ্রহণং চরেৎ

অবলস্য কুতঃ কোশো হ্যকোশস্য কুতো বলম্
অবলস্য কুতো রাজ্যমরাজ্ঞঃ শ্রীঃ কুতো ভবেৎ

উচ্চৈর্বৃত্তেঃ শ্রিয়ো হানির্যথৈব মরণং তথা
তস্মাত্কোশং বলং মিত্রাণ্যথ রাজা বিবর্ধয়েৎ

হীনকোশং হি রাজানমবজানন্তি মানবাঃ
ন চাস্যাল্পেন তুষ্যন্তি কার্যমভ্যুত্সহন্তি চ

শ্রিয়ো হি কারণাদ্রাজা সত্ক্রিয়াং লভতে পরাম্
সাস্য গূহতি পাপানি বাসো গুহ্যমিব স্ত্রিয়াঃ

ঋদ্ধিমস্যানুবর্তন্তে পুরা বিপ্রকৃতা জনাঃ
শালাবৃকা ইবাজস্রং জিঘাংসূনিব বিন্দতি
ঈদৃশস্য কুতো রাজ্ঞঃ সুখং ভরতসত্তম

উদ্যচ্ছেদেব ন গ্লায়েদুদ্যমো হ্যেব পৌরুষম্
অপ্যপর্বণি ভজ্যেত ন নমেতেহ কস্যচিৎ

অপ্যরণ্যং সমাশ্রিত্য চরেদ্দস্যুগণৈঃ সহ
ন ত্বেবোদ্ধৃতমর্যাদৈর্দস্যুভিঃ সহিতশ্চরেৎ
দস্যূনাং সুলভা সেনা রৌদ্রকর্মসু ভারত

একান্তেন হ্যমর্যাদাত্সর্বোঽপ্যুদ্বিজতে জনঃ
দস্যবোঽপ্যুপশঙ্কন্তে নিরনুক্রোশকারিণঃ

স্থাপয়েদেব মর্যাদাং জনচিত্তপ্রসাদিনীম্
অল্পাপ্যথেহ মর্যাদা লোকে ভবতি পূজিতা

নায়ং লোকোঽস্তি ন পর ইতি ব্যবসিতো জনঃ
নালং গন্তুং চ বিশ্বাসং নাস্তিকে ভয়শঙ্কিনি

যথা সদ্ভিঃ পরাদানমহিংসা দস্যুভিস্তথা
অনুরজ্যন্তি ভূতানি সমর্যাদেষু দস্যুষু

অয়ুধ্যমানস্য বধো দারামর্শঃ কৃতঘ্নতা
ব্রহ্মবিত্তস্য চাদানং নিঃশেষকরণং তথা
স্ত্রিয়া মোষঃ পরিস্থানং দস্যুষ্বেতদ্বিগর্হিতম্

স এষ এব ভবতি দস্যুরেতানি বর্জয়ন্
অভিসংদধতে যে ন বিনাশায়াস্য ভারত
নশেষমেবোপালভ্য ন কুর্বন্তীতি নিশ্চয়ঃ

তস্মাত্সশেষং কর্তব্যং স্বাধীনমপি দস্যুভিঃ
ন বলস্থোঽহমস্মীতি নৃশংসানি সমাচরেৎ

সশেষকারিণস্তাত শেষং পশ্যন্তি সর্বতঃ
নিঃশেষকারিণো নিত্যমশেষকরণাদ্ভয়ম্