অধ্যায় 130

130.1

যুধিষ্ঠির উবাচ
হীনে পরমকে ধর্মে সর্বলোকাতিলঙ্ঘিনি
সর্বস্মিন্দস্যুসাদ্ভূতে পৃথিব্যামুপজীবনে

কেনাস্মিন্ব্রাহ্মণো জীবেজ্জঘন্যে কাল আগতে
অসংত্যজন্পুত্রপৌত্রাননুক্রোশাত্পিতামহ

ভীষ্ম উবাচ
বিজ্ঞানবলমাস্থায় জীবিতব্যং তথাগতে
সর্বং সাধ্বর্থমেবেদমসাধ্বর্থং ন কিংচন

অসাধুভ্যো নিরাদায় সাধুভ্যো যঃ প্রয়চ্ছতি
আত্মানং সংক্রমং কৃত্বা কৃত্স্নধর্মবিদেব সঃ

সুরোষেণাত্মনো রাজন্রাজ্যে স্থিতিমকোপয়ন্
অদত্তমপ্যাদদীত দাতুর্বিত্তং মমেতি বা

বিজ্ঞানবলপূতো যো বর্ততে নিন্দিতেষ্বপি
বৃত্তবিজ্ঞানবান্ধীরঃ কস্তং কিং বক্তুমর্হতি

যেষাং বলকৃতা বৃত্তির্নৈষামন্যাভিরোচতে
তেজসাভিপ্রবর্ধন্তে বলবন্তো যুধিষ্ঠির

যদেব প্রকৃতং শাস্ত্রমবিশেষেণ বিন্দতি
তদেব মধ্যাঃ সেবন্তে মেধাবী চাপ্যথোত্তরম্

ঋত্বিক্পুরোহিতাচার্যান্সত্কৃতৈরভিপূজিতান্
ন ব্রাহ্মণান্যাতয়েত দোষান্প্রাপ্নোতি যাতয়ন্

এতত্প্রমাণং লোকস্য চক্ষুরেতত্সনাতনম্
তত্প্রমাণোঽবগাহেত তেন তত্সাধ্বসাধু বা

বহূনি গ্রামবাস্তব্যা রোষাদ্ব্রূয়ুঃ পরস্পরম্
ন তেষাং বচনাদ্রাজা সত্কুর্যাদ্যাতয়েত বা

ন বাচ্যঃ পরিবাদো বৈ ন শ্রোতব্যঃ কথংচন
কর্ণাবেব পিধাতব্যৌ প্রস্থেয়ং বা ততোঽন্যতঃ

ন বৈ সতাং বৃত্তমেতত্পরিবাদো ন পৈশুনম্
গুণানামেব বক্তারঃ সন্তঃ সত্সু যুধিষ্ঠির

যথা সমধুরৌ দম্যৌ সুদান্তৌ সাধুবাহিনৌ
ধুরমুদ্যম্য বহতস্তথা বর্তেত বৈ নৃপঃ
যথা যথাস্য বহতঃ সহায়াঃ স্যুস্তথাপরে

আচারমেব মন্যন্তে গরীয়ো ধর্মলক্ষণম্
অপরে নৈবমিচ্ছন্তি যে শঙ্খলিখিতপ্রিয়াঃ
মার্দবাদথ লোভাদ্বা তে ব্রূয়ুর্বাক্যমীদৃশম্

আর্ষমপ্যত্র পশ্যন্তি বিকর্মস্থস্য যাপনম্
ন চার্ষাত্সদৃশং কিংচিত্প্রমাণং বিদ্যতে ক্বচিৎ

দেবা অপি বিকর্মস্থং যাতয়ন্তি নরাধমম্
ব্যাজেন বিন্দন্বিত্তং হি ধর্মাত্তু পরিহীয়তে

সর্বতঃ সত্কৃতঃ সদ্ভির্ভূতিপ্রভবকারণৈঃ
হৃদয়েনাভ্যনুজ্ঞাতো যো ধর্মস্তং ব্যবস্যতি

যশ্চতুর্গুণসংপন্নং ধর্মং বেদ স ধর্মবিৎ
অহেরিব হি ধর্মস্য পদং দুঃখং গবেষিতুম্

যথা মৃগস্য বিদ্ধস্য মৃগব্যাধঃ পদং নয়েৎ
কক্ষে রুধিরপাতেন তথা ধর্মপদং নয়েৎ

এবং সদ্ভির্বিনীতেন পথা গন্তব্যমচ্যুত
রাজর্ষীণাং বৃত্তমেতদবগচ্ছ যুধিষ্ঠির