অধ্যায় 129

129.1

যুধিষ্ঠির উবাচ
ক্ষীণস্য দীর্ঘসূত্রস্য সানুক্রোশস্য বন্ধুষু
বিরক্তপৌররাষ্ট্রস্য নির্দ্রব্যনিচয়স্য চ

পরিশঙ্কিতমুখ্যস্য স্রুতমন্ত্রস্য ভারত
অসংভাবিতমিত্রস্য ভিন্নামাত্যস্য সর্বশঃ

পরচক্রাভিয়াতস্য দুর্বলস্য বলীয়সা
আপন্নচেতসো ব্রূহি কিং কার্যমবশিষ্যতে

ভীষ্ম উবাচ
বাহ্যশ্চেদ্বিজিগীষুঃ স্যাদ্ধর্মার্থকুশলঃ শুচিঃ
জবেন সংধিং কুর্বীত পূর্বান্পূর্বান্বিমোক্ষয়ন্

অধর্মবিজিগীষুশ্চেদ্বলবান্পাপনিশ্চয়ঃ
আত্মনঃ সংনিরোধেন সংধিং তেনাভিয়োজয়েৎ

অপাস্য রাজধানীং বা তরেদন্যেন বাপদম্
তদ্ভাবভাবে দ্রব্যাণি জীবন্পুনরুপার্জয়েৎ

যাস্তু স্যুঃ কেবলত্যাগাচ্ছক্যাস্তরিতুমাপদঃ
কস্তত্রাধিকমাত্মানং সংত্যজেদর্থধর্মবিৎ

অবরোধাজ্জুগুপ্সেত কা সপত্নধনে দয়া
ন ত্বেবাত্মা প্রদাতব্যঃ শক্যে সতি কথংচন

যুধিষ্ঠির উবাচ
আভ্যন্তরে প্রকুপিতে বাহ্যে চোপনিপীডিতে
ক্ষীণে কোশে স্রুতে মন্ত্রে কিং কার্যমবশিষ্যতে

ভীষ্ম উবাচ
ক্ষিপ্রং বা সংধিকামঃ স্যাত্ক্ষিপ্রং বা তীক্ষ্ণবিক্রমঃ
পদাপনয়নং ক্ষিপ্রমেতাবত্সাংপরায়িকম্

অনুরক্তেন পুষ্টেন হৃষ্টেন জগতীপতে
অল্পেনাপি হি সৈন্যেন মহীং জয়তি পার্থিবঃ

হতো বা দিবমারোহেদ্বিজয়ী ক্ষিতিমাবসেৎ
যুদ্ধে তু সংত্যজন্প্রাণাঞ্শক্রস্যৈতি সলোকতাম্

সর্বলোকাগমং কৃত্বা মৃদুত্বং গন্তুমেব চ
বিশ্বাসাদ্বিনয়ং কুর্যাদ্ব্যবস্যেদ্বাপ্যুপানহৌ

অপক্রমিতুমিচ্ছেদ্বা যথাকামং তু সান্ত্বয়েৎ
বিলিঙ্গমিত্বা মিত্রেণ ততঃ স্বয়মুপক্রমেৎ