Utshovঅধ্যায় 128
128.1
যুধিষ্ঠির উবাচ
মিত্রৈঃ প্রহীয়মাণস্য বহ্বমিত্রস্য কা গতিঃ
রাজ্ঞঃ সংক্ষীণকোশস্য বলহীনস্য ভারত
128.2
দুষ্টামাত্যসহায়স্য স্রুতমন্ত্রস্য সর্বতঃ
রাজ্যাত্প্রচ্যবমানস্য গতিমন্যামপশ্যতঃ
128.3
পরচক্রাভিয়াতস্য দুর্বলস্য বলীয়সা
অসংবিহিতরাষ্ট্রস্য দেশকালাবজানতঃ
128.4
অপ্রাপ্যং চ ভবেত্সান্ত্বং ভেদো বাপ্যতিপীডনাৎ
জীবিতং চার্থহেতোর্বা তত্র কিং সুকৃতং ভবেৎ
128.5
ভীষ্ম উবাচ
গুহ্যং মা ধর্মমপ্রাক্ষীরতীব ভরতর্ষভ
অপৃষ্টো নোত্সহে বক্তুং ধর্মমেনং যুধিষ্ঠির
128.6
ধর্মো হ্যণীয়ান্বচনাদ্বুদ্ধেশ্চ ভরতর্ষভ
শ্রুত্বোপাস্য সদাচারৈঃ সাধুর্ভবতি স ক্বচিৎ
128.7
কর্মণা বুদ্ধিপূর্বেণ ভবত্যাঢ্যো ন বা পুনঃ
তাদৃশোঽয়মনুপ্রশ্নঃ স ব্যবস্যস্ত্বয়া ধিয়া
128.8
উপায়ং ধর্মবহুলং যাত্রার্থং শৃণু ভারত
নাহমেতাদৃশং ধর্মং বুভূষে ধর্মকারণাৎ
দুঃখাদান ইহাঢ্যেষু স্যাত্তু পশ্চাত্ক্ষমো মতঃ
128.9
অনুগম্য গতীনাং চ সর্বাসামেব নিশ্চয়ম্
যথা যথা হি পুরুষো নিত্যং শাস্ত্রমবেক্ষতে
তথা তথা বিজানাতি বিজ্ঞানং চাস্য রোচতে
128.10
অবিজ্ঞানাদয়োগশ্চ পুরুষস্যোপজায়তে
অবিজ্ঞানাদয়োগো হি যোগো ভূতিকরঃ পুনঃ
128.11
অশঙ্কমানো বচনমনসূয়ুরিদং শৃণু
রাজ্ঞঃ কোশক্ষয়াদেব জায়তে বলসংক্ষয়ঃ
128.12
কোশং সংজনয়েদ্রাজা নির্জলেভ্যো যথা জলম্
কালং প্রাপ্যানুগৃহ্ণীয়াদেষ ধর্মোঽত্র সাংপ্রতম্
128.13
উপায়ধর্মং প্রাপ্যৈনং পূর্বৈরাচরিতং জনৈঃ
অন্যো ধর্মঃ সমর্থানামাপত্স্বন্যশ্চ ভারত
128.14
প্রাক্কোশঃ প্রোচ্যতে ধর্মো বুদ্ধির্ধর্মাদ্গরীয়সী
ধর্মং প্রাপ্য ন্যায়বৃত্তিমবলীয়ান্ন বিন্দতি
128.15
যস্মাদ্ধনস্যোপপত্তিরেকান্তেন ন বিদ্যতে
তস্মাদাপদ্যধর্মোঽপি শ্রূয়তে ধর্মলক্ষণঃ
128.16
অধর্মো জায়তে যস্মিন্নিতি বৈ কবয়ো বিদুঃ
অনন্তরঃ ক্ষত্রিয়স্য ইতি বৈ বিচিকিত্সসে
128.17
যথাস্য ধর্মো ন গ্লায়েন্নেয়াচ্ছত্রুবশং যথা
তত্কর্তব্যমিহেত্যাহুর্নাত্মানমবসাদয়েৎ
128.18
সন্নাত্মা নৈব ধর্মস্য ন পরস্য ন চাত্মনঃ
সর্বোপায়ৈরুজ্জিহীর্ষেদাত্মানমিতি নিশ্চয়ঃ
128.19
তত্র ধর্মবিদাং তাত নিশ্চয়ো ধর্মনৈপুণে
উদ্যমো জীবনং ক্ষত্রে বাহুবীর্যাদিতি শ্রুতিঃ
128.20
ক্ষত্রিয়ো বৃত্তিসংরোধে কস্য নাদাতুমর্হতি
অন্যত্র তাপসস্বাচ্চ ব্রাহ্মণস্বাচ্চ ভারত
128.21
যথা বৈ ব্রাহ্মণঃ সীদন্নয়াজ্যমপি যাজয়েৎ
অভোজ্যান্নানি চাশ্নীয়াত্তথেদং নাত্র সংশয়ঃ
128.22
পীডিতস্য কিমদ্বারমুত্পথো নিধৃতস্য বা
অদ্বারতঃ প্রদ্রবতি যদা ভবতি পীডিতঃ
128.23
তস্য কোশবলজ্যান্যা সর্বলোকপরাভবঃ
ভৈক্ষচর্যা ন বিহিতা ন চ বিট্শূদ্রজীবিকা
128.24
স্বধর্মানন্তরা বৃত্তির্যান্যাননুপজীবতঃ
বহতঃ প্রথমং কল্পমনুকল্পেন জীবনম্
128.25
আপদ্গতেন ধর্মাণামন্যায়েনোপজীবনম্
অপি হ্যেতদ্ব্রাহ্মণেষু দৃষ্টং বৃত্তিপরিক্ষয়ে
128.26
ক্ষত্রিয়ে সংশয়ঃ কঃ স্যাদিত্যেতন্নিশ্চিতং সদা
আদদীত বিশিষ্টেভ্যো নাবসীদেত্কথংচন
128.27
হন্তারং রক্ষিতারং চ প্রজানাং ক্ষত্রিয়ং বিদুঃ
তস্মাত্সংরক্ষতা কার্যমাদানং ক্ষত্রবন্ধুনা
128.28
অন্যত্র রাজন্হিংসায়া বৃত্তির্নেহাস্তি কস্যচিৎ
অপ্যরণ্যসমুত্থস্য একস্য চরতো মুনেঃ
128.29
ন শঙ্খলিখিতাং বৃত্তিং শক্যমাস্থায় জীবিতুম্
বিশেষতঃ কুরুশ্রেষ্ঠ প্রজাপালনমীপ্সতা
128.30
পরস্পরাভিসংরক্ষা রাজ্ঞা রাষ্ট্রেণ চাপদি
নিত্যমেবেহ কর্তব্যা এষ ধর্মঃ সনাতনঃ
128.31
রাজা রাষ্ট্রং যথাপত্সু দ্রব্যৌঘৈঃ পরিরক্ষতি
রাষ্ট্রেণ রাজা ব্যসনে পরিরক্ষ্যস্তথা ভবেৎ
128.32
কোশং দণ্ডং বলং মিত্রং যদন্যদপি সংচিতম্
ন কুর্বীতান্তরং রাষ্ট্রে রাজা পরিগতে ক্ষুধা
128.33
বীজং ভক্তেন সংপাদ্যমিতি ধর্মবিদো বিদুঃ
অত্রৈতচ্ছম্বরস্যাহুর্মহামায়স্য দর্শনম্
128.34
ধিক্তস্য জীবিতং রাজ্ঞো রাষ্ট্রে যস্যাবসীদতি
অবৃত্ত্যান্ত্যমনুষ্যোঽপি যো বৈ বেদ শিবের্বচঃ
128.35
রাজ্ঞঃ কোশবলং মূলং কোশমূলং পুনর্বলম্
তন্মূলং সর্বধর্মাণাং ধর্মমূলাঃ পুনঃ প্রজাঃ
128.36
নান্যানপীডয়িত্বেহ কোশঃ শক্যঃ কুতো বলম্
তদর্থং পীডয়িত্বা চ দোষং ন প্রাপ্তুমর্হতি
128.37
অকার্যমপি যজ্ঞার্থং ক্রিয়তে যজ্ঞকর্মসু
এতস্মাত্কারণাদ্রাজা ন দোষং প্রাপ্তুমর্হতি
128.38
অর্থার্থমন্যদ্ভবতি বিপরীতমথাপরম্
অনর্থার্থমথাপ্যন্যত্তত্সর্বং হ্যর্থলক্ষণম্
এবং বুদ্ধ্যা সংপ্রপশ্যেন্মেধাবী কার্যনিশ্চয়ম্
128.39
যজ্ঞার্থমন্যদ্ভবতি যজ্ঞে নার্থস্তথাপরঃ
যজ্ঞস্যার্থার্থমেবান্যত্তত্সর্বং যজ্ঞসাধনম্
128.40
উপমামত্র বক্ষ্যামি ধর্মতত্ত্বপ্রকাশিনীম্
যূপং ছিন্দন্তি যজ্ঞার্থং তত্র যে পরিপন্থিনঃ
128.41
দ্রুমাঃ কেচন সামন্তা ধ্রুবং ছিন্দন্তি তানপি
তে চাপি নিপতন্তোঽন্যান্নিঘ্নন্তি চ বনস্পতীন্
128.42
এবং কোশস্য মহতো যে নরাঃ পরিপন্থিনঃ
তানহত্বা ন পশ্যামি সিদ্ধিমত্র পরংতপ
128.43
ধনেন জয়তে লোকাবুভৌ পরমিমং তথা
সত্যং চ ধর্মবচনং যথা নাস্ত্যধনস্তথা
128.44
সর্বোপায়ৈরাদদীত ধনং যজ্ঞপ্রয়োজনম্
ন তুল্যদোষঃ স্যাদেবং কার্যাকার্যেষু ভারত
128.45
নৈতৌ সংভবতো রাজন্কথংচিদপি ভারত
ন হ্যরণ্যেষু পশ্যামি ধনবৃদ্ধানহং ক্বচিৎ
128.46
যদিদং দৃশ্যতে বিত্তং পৃথিব্যামিহ কিংচন
মমেদং স্যান্মমেদং স্যাদিত্যয়ং কাঙ্ক্ষতে জনঃ
128.47
ন চ রাজ্যসমো ধর্মঃ কশ্চিদস্তি পরংতপ
ধর্মং শংসন্তি তে রাজ্ঞামাপদর্থমিতোঽন্যথা
128.48
দানেন কর্মণা চান্যে তপসান্যে তপস্বিনঃ
বুদ্ধ্যা দাক্ষ্যেণ চাপ্যন্যে চিন্বন্তি ধনসংচয়ান্
128.49
অধনং দুর্বলং প্রাহুর্ধনেন বলবান্ভবেৎ
সর্বং ধনবতঃ প্রাপ্যং সর্বং তরতি কোশবান্
কোশাদ্ধর্মশ্চ কামশ্চ পরো লোকস্তথাপ্যয়ম্