Utshovঅধ্যায় 127
127.1
যুধিষ্ঠির উবাচ
নামৃতস্যেব পর্যাপ্তির্মমাস্তি ব্রুবতি ত্বয়ি
তস্মাত্কথয় ভূয়স্ত্বং ধর্মমেব পিতামহ
127.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
গৌতমস্য চ সংবাদং যমস্য চ মহাত্মনঃ
127.3
পারিয়াত্রগিরিং প্রাপ্য গৌতমস্যাশ্রমো মহান্
উবাস গৌতমো যত্র কালং তদপি মে শৃণু
127.4
ষষ্টিং বর্ষসহস্রাণি সোঽতপ্যদ্গৌতমস্তপঃ
তমুগ্রতপসং যুক্তং তপসা ভাবিতং মুনিম্
127.5
উপয়াতো নরব্যাঘ্র লোকপালো যমস্তদা
তমপশ্যত্সুতপসমৃষিং বৈ গৌতমং মুনিম্
127.6
স তং বিদিত্বা ব্রহ্মর্ষির্যমমাগতমোজসা
প্রাঞ্জলিঃ প্রয়তো ভূত্বা উপসৃপ্তস্তপোধনঃ
127.7
তং ধর্মরাজো দৃষ্ট্বৈব নমস্কৃত্য নরর্ষভম্
ন্যমন্ত্রয়ত ধর্মেণ ক্রিয়তাং কিমিতি ব্রুবন্
127.8
গৌতম উবাচ
মাতাপিতৃভ্যামানৃণ্যং কিং কৃত্বা সমবাপ্নুয়াৎ
কথং চ লোকানশ্নাতি পুরুষো দুর্লভাঞ্শুভান্
127.9
যম উবাচ
তপঃশৌচবতা নিত্যং সত্যধর্মরতেন চ
মাতাপিত্রোরহরহঃ পূজনং কার্যমঞ্জসা
127.10
অশ্বমেধৈশ্চ যষ্টব্যং বহুভিঃ স্বাপ্তদক্ষিণৈঃ
তেন লোকানুপাশ্নাতি পুরুষোঽদ্ভুতদর্শনান্