Utshovঅধ্যায় 126
126.1
ভীষ্ম উবাচ
ততস্তেষাং সমস্তানামৃষীণামৃষিসত্তমঃ
ঋষভো নাম বিপ্রর্ষিঃ স্ময়ন্নিব ততোঽব্রবীৎ
126.2
পুরাহং রাজশার্দূল তীর্থান্যনুচরন্প্রভো
সমাসাদিতবান্দিব্যং নরনারায়ণাশ্রমম্
126.3
যত্র সা বদরী রম্যা হ্রদো বৈহায়সস্তথা
যত্র চাশ্বশিরা রাজন্বেদান্পঠতি শাশ্বতান্
126.4
তস্মিন্সরসি কৃত্বাহং বিধিবত্তর্পণং পুরা
পিতৄণাং দেবতানাং চ ততোঽঽশ্রমমিয়াং তদা
126.5
রেমাতে যত্র তৌ নিত্যং নরনারায়ণাবৃষী
অদূরাদাশ্রমং কংচিদ্বাসার্থমগমং ততঃ
126.6
ততশ্চীরাজিনধরং কৃশমুচ্চমতীব চ
অদ্রাক্ষমৃষিমায়ান্তং তনুং নাম তপোনিধিম্
126.7
অন্যৈর্নরৈর্মহাবাহো বপুষাষ্টগুণান্বিতম্
কৃশতা চাপি রাজর্ষে ন দৃষ্টা তাদৃশী ক্বচিৎ
126.8
শরীরমপি রাজেন্দ্র তস্য কানিষ্ঠিকাসমম্
গ্রীবা বাহূ তথা পাদৌ কেশাশ্চাদ্ভুতদর্শনাঃ
126.9
শিরঃ কায়ানুরূপং চ কর্ণৌ নেত্রে তথৈব চ
তস্য বাক্চৈব চেষ্টা চ সামান্যে রাজসত্তম
126.10
দৃষ্ট্বাহং তং কৃশং বিপ্রং ভীতঃ পরমদুর্মনাঃ
পাদৌ তস্যাভিবাদ্যাথ স্থিতঃ প্রাঞ্জলিরগ্রতঃ
126.11
নিবেদ্য নাম গোত্রং চ পিতরং চ নরর্ষভ
প্রদিষ্টে চাসনে তেন শনৈরহমুপাবিশম্
126.12
ততঃ স কথয়ামাস কথা ধর্মার্থসংহিতাঃ
ঋষিমধ্যে মহারাজ তত্র ধর্মভৃতাং বরঃ
126.13
তস্মিংস্তু কথয়ত্যেব রাজা রাজীবলোচনঃ
উপায়াজ্জবনৈরশ্বৈঃ সবলঃ সাবরোধনঃ
126.14
স্মরন্পুত্রমরণ্যে বৈ নষ্টং পরমদুর্মনাঃ
ভূরিদ্যুম্নপিতা ধীমান্রঘুশ্রেষ্ঠো মহায়শাঃ
126.15
ইহ দ্রক্ষ্যামি তং পুত্রং দ্রক্ষ্যামীহেতি পার্থিবঃ
এবমাশাকৃতো রাজংশ্চরন্বনমিদং পুরা
126.16
দুর্লভঃ স ময়া দ্রষ্টুং নূনং পরমধার্মিকঃ
একঃ পুত্রো মহারণ্যে নষ্ট ইত্যসকৃত্তদা
126.17
দুর্লভঃ স ময়া দ্রষ্টুমাশা চ মহতী মম
তয়া পরীতগাত্রোঽহং মুমূর্ষুর্নাত্র সংশয়ঃ
126.18
এতচ্ছ্রুত্বা স ভগবাংস্তনুর্মুনিবরোত্তমঃ
অবাক্শিরা ধ্যানপরো মুহূর্তমিব তস্থিবান্
126.19
তমনুধ্যান্তমালক্ষ্য রাজা পরমদুর্মনাঃ
উবাচ বাক্যং দীনাত্মা মন্দং মন্দমিবাসকৃৎ
126.20
দুর্লভং কিং নু বিপ্রর্ষে আশায়াশ্চৈব কিং ভবেৎ
ব্রবীতু ভগবানেতদ্যদি গুহ্যং ন তন্ময়ি
126.21
মহর্ষির্ভগবাংস্তেন পূর্বমাসীদ্বিমানিতঃ
বালিশাং বুদ্ধিমাস্থায় মন্দভাগ্যতয়াত্মনঃ
126.22
অর্থয়ন্কলশং রাজন্কাঞ্চনং বল্কলানি চ
নির্বিণ্ণঃ স তু বিপ্রর্ষির্নিরাশঃ সমপদ্যত
126.23
এবমুক্ত্বাভিবাদ্যাথ তমৃষিং লোকপূজিতম্
শ্রান্তো ন্যষীদদ্ধর্মাত্মা যথা ত্বং নরসত্তম
126.24
অর্ঘ্যং ততঃ সমানীয় পাদ্যং চৈব মহানৃষিঃ
আরণ্যকেন বিধিনা রাজ্ঞে সর্বং ন্যবেদয়ৎ
126.25
ততস্তে মুনয়ঃ সর্বে পরিবার্য নরর্ষভম্
উপাবিশন্পুরস্কৃত্য সপ্তর্ষয় ইব ধ্রুবম্
126.26
অপৃচ্ছংশ্চৈব তে তত্র রাজানমপরাজিতম্
প্রয়োজনমিদং সর্বমাশ্রমস্য প্রবেশনম্
126.27
রাজোবাচ
বীরদ্যুম্ন ইতি খ্যাতো রাজাহং দিক্ষু বিশ্রুতঃ
ভূরিদ্যুম্নং সুতং নষ্টমন্বেষ্টুং বনমাগতঃ
126.28
একপুত্রঃ স বিপ্রাগ্র্য বাল এব চ সোঽনঘ
ন দৃশ্যতে বনে চাস্মিংস্তমন্বেষ্টুং চরাম্যহম্
126.29
ঋষভ উবাচ
এবমুক্তে তু বচনে রাজ্ঞা মুনিরধোমুখঃ
তূষ্ণীমেবাভবত্তত্র ন চ প্রত্যুক্তবান্নৃপম্
126.30
স হি তেন পুরা বিপ্রো রাজ্ঞা নাত্যর্থমানিতঃ
আশাকৃশং চ রাজেন্দ্র তপো দীর্ঘং সমাস্থিতঃ
126.31
প্রতিগ্রহমহং রাজ্ঞাং ন করিষ্যে কথংচন
অন্যেষাং চৈব বর্ণানামিতি কৃত্বা ধিয়ং তদা
126.32
আশা হি পুরুষং বালং লালাপয়তি তস্থুষী
তামহং ব্যপনেষ্যামি ইতি কৃত্বা ব্যবস্থিতঃ
126.33
রাজোবাচ
আশায়াঃ কিং কৃশত্বং চ কিং চেহ ভুবি দুর্লভম্
ব্রবীতু ভগবানেতত্ত্বং হি ধর্মার্থদর্শিবান্
126.34
ঋষভ উবাচ
ততঃ সংস্মৃত্য তত্সর্বং স্মারয়িষ্যন্নিবাব্রবীৎ
রাজানং ভগবান্বিপ্রস্ততঃ কৃশতনুস্তনুঃ
126.35
কৃশত্বে ন সমং রাজন্নাশায়া বিদ্যতে নৃপ
তস্যা বৈ দুর্লভত্বাত্তু প্রার্থিতাঃ পার্থিবা ময়া
126.36
রাজোবাচ
কৃশাকৃশে ময়া ব্রহ্মন্গৃহীতে বচনাত্তব
দুর্লভত্বং চ তস্যৈব বেদবাক্যমিব দ্বিজ
126.37
সংশয়স্তু মহাপ্রাজ্ঞ সংজাতো হৃদয়ে মম
তন্মে সত্তম তত্ত্বেন বক্তুমর্হসি পৃচ্ছতঃ
126.38
ত্বত্তঃ কৃশতরং কিং নু ব্রবীতু ভগবানিদম্
যদি গুহ্যং ন তে বিপ্র লোকেঽস্মিন্কিং নু দুর্লভম্
126.39
কৃশতনুরুবাচ
দুর্লভোঽপ্যথ বা নাস্তি যোঽর্থী ধৃতিমিবাপ্নুয়াৎ
সুদুর্লভতরস্তাত যোঽর্থিনং নাবমন্যতে
126.40
সংশ্রুত্য নোপক্রিয়তে পরং শক্ত্যা যথার্হতঃ
সক্তা যা সর্বভূতেষু সাশা কৃশতরী ময়া
126.41
একপুত্রঃ পিতা পুত্রে নষ্টে বা প্রোষিতে তথা
প্রবৃত্তিং যো ন জানাতি সাশা কৃশতরী ময়া
126.42
প্রসবে চৈব নারীণাং বৃদ্ধানাং পুত্রকারিতা
তথা নরেন্দ্র ধনিনামাশা কৃশতরী ময়া
126.43
ঋষভ উবাচ
এতচ্ছ্রুত্বা ততো রাজন্স রাজা সাবরোধনঃ
সংস্পৃশ্য পাদৌ শিরসা নিপপাত দ্বিজর্ষভে
126.44
রাজোবাচ
প্রসাদয়ে ত্বা ভগবন্পুত্রেণেচ্ছামি সংগতিম্
বৃণীষ্ব চ বরং বিপ্র যমিচ্ছসি যথাবিধি
126.45
ঋষভ উবাচ
অব্রবীচ্চ হি তং বাক্যং রাজা রাজীবলোচনঃ
সত্যমেতদ্যথা বিপ্র ত্বয়োক্তং নাস্ত্যতো মৃষা
126.46
ততঃ প্রহস্য ভগবাংস্তনুর্ধর্মভৃতাং বরঃ
পুত্রমস্যানয়ত্ক্ষিপ্রং তপসা চ শ্রুতেন চ
126.47
তং সমানায্য পুত্রং তু তদোপালভ্য পার্থিবম্
আত্মানং দর্শয়ামাস ধর্মং ধর্মভৃতাং বরঃ
126.48
সংদর্শয়িত্বা চাত্মানং দিব্যমদ্ভুতদর্শনম্
বিপাপ্মা বিগতক্রোধশ্চচার বনমন্তিকাৎ
126.49
এতদ্দৃষ্টং ময়া রাজংস্ততশ্চ বচনং শ্রুতম্
আশামপনয়স্বাশু ততঃ কৃশতরীমিমাম্
126.50
ভীষ্ম উবাচ
স তত্রোক্তো মহারাজ ঋষভেণ মহাত্মনা
সুমিত্রোঽপনয়ত্ক্ষিপ্রমাশাং কৃশতরীং তদা
126.51
এবং ত্বমপি কৌন্তেয় শ্রুত্বা বাণীমিমাং মম
স্থিরো ভব যথা রাজন্হিমবানচলোত্তমঃ
126.52
ত্বং হি দ্রষ্টা চ শ্রোতা চ কৃচ্ছ্রেষ্বর্থকৃতেষ্বিহ
শ্রুত্বা মম মহারাজ ন সংতপ্তুমিহার্হসি