Utshovঅধ্যায় 125
125.1
যুধিষ্ঠির উবাচ
শীলং প্রধানং পুরুষে কথিতং তে পিতামহ
কথমাশা সমুত্পন্না যা চ সা তদ্বদস্ব মে
125.2
সংশয়ো মে মহানেষ সমুত্পন্নঃ পিতামহ
ছেত্তা চ তস্য নান্যোঽস্তি ত্বত্তঃ পরপুরংজয়
125.3
পিতামহাশা মহতী মমাসীদ্ধি সুয়োধনে
প্রাপ্তে যুদ্ধে তু যদ্যুক্তং তত্কর্তায়মিতি প্রভো
125.4
সর্বস্যাশা সুমহতী পুরুষস্যোপজায়তে
তস্যাং বিহন্যমানায়াং দুঃখো মৃত্যুরসংশয়ম্
125.5
সোঽহং হতাশো দুর্বুদ্ধিঃ কৃতস্তেন দুরাত্মনা
ধার্তরাষ্ট্রেণ রাজেন্দ্র পশ্য মন্দাত্মতাং মম
125.6
আশাং মহত্তরাং মন্যে পর্বতাদপি সদ্রুমাৎ
আকাশাদপি বা রাজন্নপ্রমেয়ৈব বা পুনঃ
125.7
এষা চৈব কুরুশ্রেষ্ঠ দুর্বিচিন্ত্যা সুদুর্লভা
দুর্লভত্বাচ্চ পশ্যামি কিমন্যদ্দুর্লভং ততঃ
125.8
ভীষ্ম উবাচ
অত্র তে বর্তয়িষ্যামি যুধিষ্ঠির নিবোধ তৎ
ইতিহাসং সুমিত্রস্য নির্বৃত্তমৃষভস্য চ
125.9
সুমিত্রো নাম রাজর্ষির্হৈহয়ো মৃগয়াং গতঃ
সসার স মৃগং বিদ্ধ্বা বাণেন নতপর্বণা
125.10
স মৃগো বাণমাদায় যয়াবমিতবিক্রমঃ
স চ রাজা বলী তূর্ণং সসার মৃগমন্তিকাৎ
125.11
ততো নিম্নং স্থলং চৈব স মৃগোঽদ্রবদাশুগঃ
মুহূর্তমেব রাজেন্দ্র সমেন স পথাগমৎ
125.12
ততঃ স রাজা তারুণ্যাদৌরসেন বলেন চ
সসার বাণাসনভৃত্সখড্গো হংসবত্তদা
125.13
তীর্ত্বা নদান্নদীশ্চৈব পল্বলানি বনানি চ
অতিক্রম্যাভ্যতিক্রম্য সসারৈব বনে চরন্
125.14
স তু কামান্মৃগো রাজন্নাসাদ্যাসাদ্য তং নৃপম্
পুনরভ্যেতি জবনো জবেন মহতা ততঃ
125.15
স তস্য বাণৈর্বহুভিঃ সমভ্যস্তো বনেচরঃ
প্রক্রীডন্নিব রাজেন্দ্র পুনরভ্যেতি চান্তিকম্
125.16
পুনশ্চ জবমাস্থায় জবনো মৃগয়ূথপঃ
অতীত্যাতীত্য রাজেন্দ্র পুনরভ্যেতি চান্তিকম্
125.17
তস্য মর্মচ্ছিদং ঘোরং সুমিত্রোঽমিত্রকর্শনঃ
সমাদায় শরশ্রেষ্ঠং কার্মুকান্নিরবাসৃজৎ
125.18
ততো গব্যূতিমাত্রেণ মৃগয়ূথপয়ূথপঃ
তস্য বাণপথং ত্যক্ত্বা তস্থিবান্প্রহসন্নিব
125.19
তস্মিন্নিপতিতে বাণে ভূমৌ প্রজ্বলিতে ততঃ
প্রবিবেশ মহারণ্যং মৃগো রাজাপ্যথাদ্রবৎ
125.20
প্রবিশ্য তু মহারণ্যং তাপসানামথাশ্রমম্
আসসাদ ততো রাজা শ্রান্তশ্চোপাবিশত্পুনঃ
125.21
তং কার্মুকধরং দৃষ্ট্বা শ্রমার্তং ক্ষুধিতং তদা
সমেত্য ঋষয়স্তস্মিন্পূজাং চক্রুর্যথাবিধি
125.22
ঋষয়ো রাজশার্দূলমপৃচ্ছন্স্বং প্রয়োজনম্
কেন ভদ্রমুখার্থেন সংপ্রাপ্তোঽসি তপোবনম্
125.23
পদাতির্বদ্ধনিস্ত্রিংশো ধন্বী বাণী নরেশ্বর
এতদিচ্ছাম বিজ্ঞাতুং কুতঃ প্রাপ্তোঽসি মানদ
কস্মিন্কুলে হি জাতস্ত্বং কিংনামাসি ব্রবীহি নঃ
125.24
ততঃ স রাজা সর্বেভ্যো দ্বিজেভ্যঃ পুরুষর্ষভ
আচখ্যৌ তদ্যথান্যায়ং পরিচর্যাং চ ভারত
125.25
হৈহয়ানাং কুলে জাতঃ সুমিত্রো মিত্রনন্দনঃ
চরামি মৃগয়ূথানি নিঘ্নন্বাণৈঃ সহস্রশঃ
বলেন মহতা গুপ্তঃ সামাত্যঃ সাবরোধনঃ
125.26
মৃগস্তু বিদ্ধো বাণেন ময়া সরতি শল্যবান্
তং দ্রবন্তমনু প্রাপ্তো বনমেতদ্যদৃচ্ছয়া
ভবত্সকাশে নষ্টশ্রীর্হতাশঃ শ্রমকর্শিতঃ
125.27
কিং নু দুঃখমতোঽন্যদ্বৈ যদহং শ্রমকর্শিতঃ
ভবতামাশ্রমং প্রাপ্তো হতাশো নষ্টলক্ষণঃ
125.28
ন রাজলক্ষণত্যাগো ন পুরস্য তপোধনাঃ
দুঃখং করোতি তত্তীব্রং যথাশা বিহতা মম
125.29
হিমবান্বা মহাশৈলঃ সমুদ্রো বা মহোদধিঃ
মহত্ত্বান্নান্বপদ্যেতাং রোদস্যোরন্তরং যথা
আশায়াস্তপসি শ্রেষ্ঠাস্তথা নান্তমহং গতঃ
125.30
ভবতাং বিদিতং সর্বং সর্বজ্ঞা হি তপোধনাঃ
ভবন্তঃ সুমহাভাগাস্তস্মাত্প্রক্ষ্যামি সংশয়ম্
125.31
আশাবান্পুরুষো যঃ স্যাদন্তরিক্ষমথাপি বা
কিং নু জ্যায়স্তরং লোকে মহত্ত্বাত্প্রতিভাতি বঃ
এতদিচ্ছামি তত্ত্বেন শ্রোতুং কিমিহ দুর্লভম্
125.32
যদি গুহ্যং তপোনিত্যা ন বো ব্রূতেহ মাচিরম্
ন হি গুহ্যমতঃ শ্রোতুমিচ্ছামি দ্বিজপুংগবাঃ
125.33
ভবত্তপোবিঘাতো বা যেন স্যাদ্বিরমে ততঃ
যদি বাস্তি কথায়োগো যোঽয়ং প্রশ্নো ময়েরিতঃ
125.34
এতত্কারণসামগ্র্যং শ্রোতুমিচ্ছামি তত্ত্বতঃ
ভবন্তো হি তপোনিত্যা ব্রূয়ুরেতত্সমাহিতাঃ