Utshovঅধ্যায় 124
124.1
যুধিষ্ঠির উবাচ
ইমে জনা নরশ্রেষ্ঠ প্রশংসন্তি সদা ভুবি
ধর্মস্য শীলমেবাদৌ ততো মে সংশয়ো মহান্
124.2
যদি তচ্ছক্যমস্মাভির্জ্ঞাতুং ধর্মভৃতাং বর
শ্রোতুমিচ্ছামি তত্সর্বং যথৈতদুপলভ্যতে
124.3
কথং নু প্রাপ্যতে শীলং শ্রোতুমিচ্ছামি ভারত
কিংলক্ষণং চ তত্প্রোক্তং ব্রূহি মে বদতাং বর
124.4
ভীষ্ম উবাচ
পুরা দুর্যোধনেনেহ ধৃতরাষ্ট্রায় মানদ
আখ্যাতং তপ্যমানেন শ্রিয়ং দৃষ্ট্বা তথাগতাম্
124.5
ইন্দ্রপ্রস্থে মহারাজ তব সভ্রাতৃকস্য হ
সভায়াং চাবহসনং তত্সর্বং শৃণু ভারত
124.6
ভবতস্তাং সভাং দৃষ্ট্বা সমৃদ্ধিং চাপ্যনুত্তমাম্
দুর্যোধনস্তদাসীনঃ সর্বং পিত্রে ন্যবেদয়ৎ
124.7
শ্রুত্বা চ ধৃতরাষ্ট্রোঽপি দুর্যোধনবচস্তদা
অব্রবীত্কর্ণসহিতং দুর্যোধনমিদং বচঃ
124.8
কিমর্থং তপ্যসে পুত্র শ্রোতুমিচ্ছামি তত্ত্বতঃ
শ্রুত্বা ত্বামনুনেষ্যামি যদি সম্যগ্ভবিষ্যসি
124.9
যথা ত্বং মহদৈশ্বর্যং প্রাপ্তঃ পরপুরংজয়
কিংকরা ভ্রাতরঃ সর্বে মিত্রাঃ সংবন্ধিনস্তথা
124.10
আচ্ছাদয়সি প্রাবারানশ্নাসি পিশিতোদনম্
আজানেয়া বহন্তি ত্বাং কস্মাচ্ছোচসি পুত্রক
124.11
দুর্যোধন উবাচ
দশ তানি সহস্রাণি স্নাতকানাং মহাত্মনাম্
ভুঞ্জতে রুক্মপাত্রীষু যুধিষ্ঠিরনিবেশনে
124.12
দৃষ্ট্বা চ তাং সভাং দিব্যাং দিব্যপুষ্পফলান্বিতাম্
অশ্বাংস্তিত্তিরকল্মাষান্রত্নানি বিবিধানি চ
124.13
দৃষ্ট্বা তাং পাণ্ডবেয়ানামৃদ্ধিমিন্দ্রোপমাং শুভাম্
অমিত্রাণাং সুমহতীমনুশোচামি মানদ
124.14
ধৃতরাষ্ট্র উবাচ
যদীচ্ছসি শ্রিয়ং তাত যাদৃশীং তাং যুধিষ্ঠিরে
বিশিষ্টাং বা নরব্যাঘ্র শীলবান্ভব পুত্রক
124.15
শীলেন হি ত্রয়ো লোকাঃ শক্যা জেতুং ন সংশয়ঃ
ন হি কিংচিদসাধ্যং বৈ লোকে শীলবতাং ভবেৎ
124.16
একরাত্রেণ মান্ধাতা ত্র্যহেণ জনমেজয়ঃ
সপ্তরাত্রেণ নাভাগঃ পৃথিবীং প্রতিপেদিবান্
124.17
এতে হি পার্থিবাঃ সর্বে শীলবন্তো দমান্বিতাঃ
অতস্তেষাং গুণক্রীতা বসুধা স্বয়মাগমৎ
124.18
অত্রাপ্যুদাহরন্তীমমিতিহাসং পুরাতনম্
নারদেন পুরা প্রোক্তং শীলমাশ্রিত্য ভারত
124.19
প্রহ্রাদেন হৃতং রাজ্যং মহেন্দ্রস্য মহাত্মনঃ
শীলমাশ্রিত্য দৈত্যেন ত্রৈলোক্যং চ বশীকৃতম্
124.20
ততো বৃহস্পতিং শক্রঃ প্রাঞ্জলিঃ সমুপস্থিতঃ
উবাচ চ মহাপ্রাজ্ঞঃ শ্রেয় ইচ্ছামি বেদিতুম্
124.21
ততো বৃহস্পতিস্তস্মৈ জ্ঞানং নৈঃশ্রেয়সং পরম্
কথয়ামাস ভগবান্দেবেন্দ্রায় কুরূদ্বহ
124.22
এতাবচ্ছ্রেয় ইত্যেব বৃহস্পতিরভাষত
ইন্দ্রস্তু ভূয়ঃ পপ্রচ্ছ ক্ব বিশেষো ভবেদিতি
124.23
বৃহস্পতিরুবাচ
বিশেষোঽস্তি মহাংস্তাত ভার্গবস্য মহাত্মনঃ
তত্রাগময় ভদ্রং তে ভূয় এব পুরংদর
124.24
ধৃতরাষ্ট্র উবাচ
আত্মনস্তু ততঃ শ্রেয়ো ভার্গবাত্সুমহায়শাঃ
জ্ঞানমাগময়ত্প্রীত্যা পুনঃ স পরমদ্যুতিঃ
124.25
তেনাপি সমনুজ্ঞাতো ভার্গবেণ মহাত্মনা
শ্রেয়োঽস্তীতি পুনর্ভূয়ঃ শুক্রমাহ শতক্রতুঃ
124.26
ভার্গবস্ত্বাহ ধর্মজ্ঞঃ প্রহ্রাদস্য মহাত্মনঃ
জ্ঞানমস্তি বিশেষেণ ততো হৃষ্টশ্চ সোঽভবৎ
124.27
স ততো ব্রাহ্মণো ভূত্বা প্রহ্রাদং পাকশাসনঃ
সৃত্বা প্রোবাচ মেধাবী শ্রেয় ইচ্ছামি বেদিতুম্
124.28
প্রহ্রাদস্ত্বব্রবীদ্বিপ্রং ক্ষণো নাস্তি দ্বিজর্ষভ
ত্রৈলোক্যরাজ্যে সক্তস্য ততো নোপদিশামি তে
124.29
ব্রাহ্মণস্ত্বব্রবীদ্বাক্যং কস্মিন্কালে ক্ষণো ভবেৎ
ততোপদিষ্টমিচ্ছামি যদ্যত্কার্যান্তরং ভবেৎ
124.30
ততঃ প্রীতোঽভবদ্রাজা প্রহ্রাদো ব্রহ্মবাদিনে
তথেত্যুক্ত্বা শুভে কালে জ্ঞানতত্ত্বং দদৌ তদা
124.31
ব্রাহ্মণোঽপি যথান্যায়ং গুরুবৃত্তিমনুত্তমাম্
চকার সর্বভাবেন যদ্বত্স মনসেচ্ছতি
124.32
পৃষ্টশ্চ তেন বহুশঃ প্রাপ্তং কথমরিংদম
ত্রৈলোক্যরাজ্যং ধর্মজ্ঞ কারণং তদ্ব্রবীহি মে
124.33
প্রহ্রাদ উবাচ
নাসূয়ামি দ্বিজশ্রেষ্ঠ রাজাস্মীতি কদাচন
কব্যানি বদতাং তাত সংয়চ্ছামি বহামি চ
124.34
তে বিস্রব্ধাঃ প্রভাষন্তে সংয়চ্ছন্তি চ মাং সদা
তে মা কব্যপদে সক্তং শুশ্রূষুমনসূয়কম্
124.35
ধর্মাত্মানং জিতক্রোধং সংয়তং সংয়তেন্দ্রিয়ম্
সমাচিন্বন্তি শাস্তারঃ ক্ষৌদ্রং মধ্বিব মক্ষিকাঃ
124.36
সোঽহং বাগগ্রপিষ্টানাং রসানামবলেহিতা
স্বজাত্যানধিতিষ্ঠামি নক্ষত্রাণীব চন্দ্রমাঃ
124.37
এতত্পৃথিব্যামমৃতমেতচ্চক্ষুরনুত্তমম্
যদ্ব্রাহ্মণমুখে কব্যমেতচ্ছ্রুত্বা প্রবর্ততে
124.38
ধৃতরাষ্ট্র উবাচ
এতাবচ্ছ্রেয় ইত্যাহ প্রহ্রাদো ব্রহ্মবাদিনম্
শুশ্রূষিতস্তেন তদা দৈত্যেন্দ্রো বাক্যমব্রবীৎ
124.39
যথাবদ্গুরুবৃত্ত্যা তে প্রীতোঽস্মি দ্বিজসত্তম
বরং বৃণীষ্ব ভদ্রং তে প্রদাতাস্মি ন সংশয়ঃ
124.40
কৃতমিত্যেব দৈত্যেন্দ্রমুবাচ স চ বৈ দ্বিজঃ
প্রহ্রাদস্ত্বব্রবীত্প্রীতো গৃহ্যতাং বর ইত্যুত
124.41
ব্রাহ্মণ উবাচ
যদি রাজন্প্রসন্নস্ত্বং মম চেচ্ছসি চেদ্ধিতম্
ভবতঃ শীলমিচ্ছামি প্রাপ্তুমেষ বরো মম
124.42
ধৃতরাষ্ট্র উবাচ
ততঃ প্রীতশ্চ দৈত্যেন্দ্রো ভয়ং চাস্যাভবন্মহৎ
বরে প্রদিষ্টে বিপ্রেণ নাল্পতেজায়মিত্যুত
124.43
এবমস্ত্বিতি তং প্রাহ প্রহ্রাদো বিস্মিতস্তদা
উপাকৃত্য তু বিপ্রায় বরং দুঃখান্বিতোঽভবৎ
124.44
দত্তে বরে গতে বিপ্রে চিন্তাসীন্মহতী ততঃ
প্রহ্রাদস্য মহারাজ নিশ্চয়ং ন চ জগ্মিবান্
124.45
তস্য চিন্তয়তস্তাত ছায়াভূতং মহাদ্যুতে
তেজো বিগ্রহবত্তাত শরীরমজহাত্তদা
124.46
তমপৃচ্ছন্মহাকায়ং প্রহ্রাদঃ কো ভবানিতি
প্রত্যাহ ননু শীলোঽস্মি ত্যক্তো গচ্ছাম্যহং ত্বয়া
124.47
তস্মিন্দ্বিজবরে রাজন্বত্স্যাম্যহমনিন্দিতম্
যোঽসৌ শিষ্যত্বমাগম্য ত্বয়ি নিত্যং সমাহিতঃ
ইত্যুক্ত্বান্তর্হিতং তদ্বৈ শক্রং চান্ববিশত্প্রভো
124.48
তস্মিংস্তেজসি যাতে তু তাদৃগ্রূপস্ততোঽপরঃ
শরীরান্নিঃসৃতস্তস্য কো ভবানিতি চাব্রবীৎ
124.49
ধর্মং প্রহ্রাদ মাং বিদ্ধি যত্রাসৌ দ্বিজসত্তমঃ
তত্র যাস্যামি দৈত্যেন্দ্র যতঃ শীলং ততো হ্যহম্
124.50
ততোঽপরো মহারাজ প্রজ্বলন্নিব তেজসা
শরীরান্নিঃসৃতস্তস্য প্রহ্রাদস্য মহাত্মনঃ
124.51
কো ভবানিতি পৃষ্টশ্চ তমাহ স মহাদ্যুতিঃ
সত্যমস্ম্যসুরেন্দ্রাগ্র্য যাস্যেঽহং ধর্মমন্বিহ
124.52
তস্মিন্ননুগতে ধর্মং পুরুষে পুরুষোঽপরঃ
নিশ্চক্রাম ততস্তস্মাত্পৃষ্টশ্চাহ মহাত্মনা
বৃত্তং প্রহ্রাদ মাং বিদ্ধি যতঃ সত্যং ততো হ্যহম্
124.53
তস্মিন্গতে মহাশ্বেতঃ শরীরাত্তস্য নির্যয়ৌ
পৃষ্টশ্চাহ বলং বিদ্ধি যতো বৃত্তমহং ততঃ
ইত্যুক্ত্বা চ যয়ৌ তত্র যতো বৃত্তং নরাধিপ
124.54
ততঃ প্রভাময়ী দেবী শরীরাত্তস্য নির্যয়ৌ
তামপৃচ্ছত্স দৈত্যেন্দ্রঃ সা শ্রীরিত্যেবমব্রবীৎ
124.55
উষিতাস্মি সুখং বীর ত্বয়ি সত্যপরাক্রমে
ত্বয়া ত্যক্তা গমিষ্যামি বলং যত্র ততো হ্যহম্
124.56
ততো ভয়ং প্রাদুরাসীত্প্রহ্রাদস্য মহাত্মনঃ
অপৃচ্ছত চ তাং ভূয়ঃ ক্ব যাসি কমলালয়ে
124.57
ত্বং হি সত্যব্রতা দেবী লোকস্য পরমেশ্বরী
কশ্চাসৌ ব্রাহ্মণশ্রেষ্ঠস্তত্ত্বমিচ্ছামি বেদিতুম্
124.58
শ্রীরুবাচ
স শক্রো ব্রহ্মচারী চ যস্ত্বয়া চোপশিক্ষিতঃ
ত্রৈলোক্যে তে যদৈশ্বর্যং তত্তেনাপহৃতং প্রভো
124.59
শীলেন হি ত্বয়া লোকাঃ সর্বে ধর্মজ্ঞ নির্জিতাঃ
তদ্বিজ্ঞায় মহেন্দ্রেণ তব শীলং হৃতং প্রভো
124.60
ধর্মঃ সত্যং তথা বৃত্তং বলং চৈব তথা হ্যহম্
শীলমূলা মহাপ্রাজ্ঞ সদা নাস্ত্যত্র সংশয়ঃ
124.61
ভীষ্ম উবাচ
এবমুক্ত্বা গতা তু শ্রীস্তে চ সর্বে যুধিষ্ঠির
দুর্যোধনস্তু পিতরং ভূয় এবাব্রবীদিদম্
124.62
শীলস্য তত্ত্বমিচ্ছামি বেত্তুং কৌরবনন্দন
প্রাপ্যতে চ যথা শীলং তমুপায়ং বদস্ব মে
124.63
ধৃতরাষ্ট্র উবাচ
সোপায়ং পূর্বমুদ্দিষ্টং প্রহ্রাদেন মহাত্মনা
সংক্ষেপতস্তু শীলস্য শৃণু প্রাপ্তিং নরাধিপ
124.64
অদ্রোহঃ সর্বভূতেষু কর্মণা মনসা গিরা
অনুগ্রহশ্চ দানং চ শীলমেতত্প্রশস্যতে
124.65
যদন্যেষাং হিতং ন স্যাদাত্মনঃ কর্ম পৌরুষম্
অপত্রপেত বা যেন ন তত্কুর্যাত্কথংচন
124.66
তত্তু কর্ম তথা কুর্যাদ্যেন শ্লাঘেত সংসদি
এতচ্ছীলং সমাসেন কথিতং কুরুসত্তম
124.67
যদ্যপ্যশীলা নৃপতে প্রাপ্নুবন্তি ক্বচিচ্ছ্রিয়ম্
ন ভুঞ্জতে চিরং তাত সমূলাশ্চ পতন্তি তে
124.68
এতদ্বিদিত্বা তত্ত্বেন শীলবান্ভব পুত্রক
যদীচ্ছসি শ্রিয়ং তাত সুবিশিষ্টাং যুধিষ্ঠিরাৎ
124.69
ভীষ্ম উবাচ
এতত্কথিতবান্পুত্রে ধৃতরাষ্ট্রো নরাধিপ
এতত্কুরুষ্ব কৌন্তেয় ততঃ প্রাপ্স্যসি তত্ফলম্