Utshovঅধ্যায় 123
123.1
যুধিষ্ঠির উবাচ
তাত ধর্মার্থকামানাং শ্রোতুমিচ্ছামি নিশ্চয়ম্
লোকয়াত্রা হি কার্ত্স্ন্যেন ত্রিষ্বেতেষু প্রতিষ্ঠিতা
123.2
ধর্মার্থকামাঃ কিংমূলাস্ত্রয়াণাং প্রভবশ্চ কঃ
অন্যোন্যং চানুষজ্জন্তে বর্তন্তে চ পৃথক্পৃথক্
123.3
ভীষ্ম উবাচ
যদা তে স্যুঃ সুমনসো লোকসংস্থার্থনিশ্চয়ে
কালপ্রভবসংস্থাসু সজ্জন্তে চ ত্রয়স্তদা
123.4
ধর্মমূলস্তু দেহোঽর্থঃ কামোঽর্থফলমুচ্যতে
সংকল্পমূলাস্তে সর্বে সংকল্পো বিষয়াত্মকঃ
123.5
বিষয়াশ্চৈব কার্ত্স্ন্যেন সর্ব আহারসিদ্ধয়ে
মূলমেতত্ত্রিবর্গস্য নিবৃত্তির্মোক্ষ উচ্যতে
123.6
ধর্মঃ শরীরসংগুপ্তির্ধর্মার্থং চার্থ ইষ্যতে
কামো রতিফলশ্চাত্র সর্বে চৈতে রজস্বলাঃ
123.7
সংনিকৃষ্টাংশ্চরেদেনান্ন চৈনান্মনসা ত্যজেৎ
বিমুক্তস্তমসা সর্বান্ধর্মাদীন্কামনৈষ্ঠিকান্
123.8
শ্রেষ্ঠবুদ্ধিস্ত্রিবর্গস্য যদয়ং প্রাপ্নুয়াত্ক্ষণাৎ
বুদ্ধ্যা বুধ্যেদিহার্থে ন তদহ্না তু নিকৃষ্টয়া
123.9
অপধ্যানমলো ধর্মো মলোঽর্থস্য নিগূহনম্
সংপ্রমোদমলঃ কামো ভূয়ঃ স্বগুণবর্তিতঃ
123.10
অত্রাপ্যুদাহরন্তীমমিতিহাসং পুরাতনম্
কামন্দস্য চ সংবাদমঙ্গারিষ্ঠস্য চোভয়োঃ
123.11
কামন্দমৃষিমাসীনমভিবাদ্য নরাধিপঃ
অঙ্গারিষ্ঠোঽথ পপ্রচ্ছ কৃত্বা সময়পর্যয়ম্
123.12
যঃ পাপং কুরুতে রাজা কামমোহবলাত্কৃতঃ
প্রত্যাসন্নস্য তস্যর্ষে কিং স্যাত্পাপপ্রণাশনম্
123.13
অধর্মো ধর্ম ইতি হ যোঽজ্ঞানাদাচরেদিহ
তং চাপি প্রথিতং লোকে কথং রাজা নিবর্তয়েৎ
123.14
কামন্দ উবাচ
যো ধর্মার্থৌ সমুত্সৃজ্য কামমেবানুবর্ততে
স ধর্মার্থপরিত্যাগাত্প্রজ্ঞানাশমিহার্ছতি
123.15
প্রজ্ঞাপ্রণাশকো মোহস্তথা ধর্মার্থনাশকঃ
তস্মান্নাস্তিকতা চৈব দুরাচারশ্চ জায়তে
123.16
দুরাচারান্যদা রাজা প্রদুষ্টান্ন নিয়চ্ছতি
তস্মাদুদ্বিজতে লোকঃ সর্পাদ্বেশ্মগতাদিব
123.17
তং প্রজা নানুবর্তন্তে ব্রাহ্মণা ন চ সাধবঃ
ততঃ সংক্ষয়মাপ্নোতি তথা বধ্যত্বমেতি চ
123.18
অপধ্বস্তস্ত্ববমতো দুঃখং জীবতি জীবিতম্
জীবেচ্চ যদপধ্বস্তস্তচ্ছুদ্ধং মরণং ভবেৎ
123.19
অত্রৈতদাহুরাচার্যাঃ পাপস্য চ নিবর্হণম্
সেবিতব্যা ত্রয়ী বিদ্যা সত্কারো ব্রাহ্মণেষু চ
123.20
মহামনা ভবেদ্ধর্মে বিবহেচ্চ মহাকুলে
ব্রাহ্মণাংশ্চাপি সেবেত ক্ষমায়ুক্তান্মনস্বিনঃ
123.21
জপেদুদকশীলঃ স্যাত্সুমুখো নান্যদাস্থিতঃ
ধর্মান্বিতান্সংপ্রবিশেদ্বহিঃ কৃত্বৈব দুষ্কৃতীন্
123.22
প্রসাদয়েন্মধুরয়া বাচাপ্যথ চ কর্মণা
ইত্যস্মীতি বদেন্নিত্যং পরেষাং কীর্তয়ন্গুণান্
123.23
অপাপো হ্যেবমাচারঃ ক্ষিপ্রং বহুমতো ভবেৎ
পাপান্যপি চ কৃচ্ছ্রাণি শময়েন্নাত্র সংশয়ঃ
123.24
গুরবোঽপি পরং ধর্মং যদ্ব্রূয়ুস্তত্তথা কুরু
গুরূণাং হি প্রসাদাদ্ধি শ্রেয়ঃ পরমবাপ্স্যসি