Utshovঅধ্যায় 122
122.1
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
অঙ্গেষু রাজা দ্যুতিমান্বসুহোম ইতি শ্রুতঃ
122.2
স রাজা ধর্মনিত্যঃ সন্সহ পত্ন্যা মহাতপাঃ
মুঞ্জপৃষ্ঠং জগামাথ দেবর্ষিগণপূজিতম্
122.3
তত্র শৃঙ্গে হিমবতো মেরৌ কনকপর্বতে
যত্র মুঞ্জবটে রামো জটাহরণমাদিশৎ
122.4
তদাপ্রভৃতি রাজেন্দ্র ঋষিভিঃ সংশিতব্রতৈঃ
মুঞ্জপৃষ্ঠ ইতি প্রোক্তঃ স দেশো রুদ্রসেবিতঃ
122.5
স তত্র বহুভির্যুক্তঃ সদা শ্রুতিময়ৈর্গুণৈঃ
ব্রাহ্মণানামনুমতো দেবর্ষিসদৃশোঽভবৎ
122.6
তং কদাচিদদীনাত্মা সখা শক্রস্য মানিতঃ
অভ্যাগচ্ছন্মহীপালো মান্ধাতা শত্রুকর্শনঃ
122.7
সোঽভিসৃত্য তু মান্ধাতা বসুহোমং নরাধিপম্
দৃষ্ট্বা প্রকৃষ্টং তপসা বিনয়েনাভ্যতিষ্ঠত
122.8
বসুহোমোঽপি রাজ্ঞো বৈ গামর্ঘ্যং চ ন্যবেদয়ৎ
অষ্টাঙ্গস্য চ রাজ্যস্য পপ্রচ্ছ কুশলং তদা
122.9
সদ্ভিরাচরিতং পূর্বং যথাবদনুয়ায়িনম্
অপৃচ্ছদ্বসুহোমস্তং রাজন্কিং করবাণি তে
122.10
সোঽব্রবীত্পরমপ্রীতো মান্ধাতা রাজসত্তমম্
বসুহোমং মহাপ্রাজ্ঞমাসীনং কুরুনন্দন
122.11
বৃহস্পতের্মতং রাজন্নধীতং সকলং ত্বয়া
তথৈবৌশনসং শাস্ত্রং বিজ্ঞাতং তে নরাধিপ
122.12
তদহং শ্রোতুমিচ্ছামি দণ্ড উত্পদ্যতে কথম্
কিং বাপি পূর্বং জাগর্তি কিং বা পরমমুচ্যতে
122.13
কথং ক্ষত্রিয়সংস্থশ্চ দণ্ডঃ সংপ্রত্যবস্থিতঃ
ব্রূহি মে সুমহাপ্রাজ্ঞ দদাম্যাচার্যবেতনম্
122.14
বসুহোম উবাচ
শৃণু রাজন্যথা দণ্ডঃ সংভূতো লোকসংগ্রহঃ
প্রজাবিনয়রক্ষার্থং ধর্মস্যাত্মা সনাতনঃ
122.15
ব্রহ্মা যিয়ক্ষুর্ভগবান্সর্বলোকপিতামহঃ
ঋত্বিজং নাত্মনা তুল্যং দদর্শেতি হি নঃ শ্রুতম্
122.16
স গর্ভং শিরসা দেবো বর্ষপূগানধারয়ৎ
পূর্ণে বর্ষসহস্রে তু স গর্ভঃ ক্ষুবতোঽপতৎ
122.17
স ক্ষুপো নাম সংভূতঃ প্রজাপতিররিংদম
ঋত্বিগাসীত্তদা রাজন্যজ্ঞে তস্য মহাত্মনঃ
122.18
তস্মিন্প্রবৃত্তে সত্রে তু ব্রহ্মণঃ পার্থিবর্ষভ
হৃষ্টরূপপ্রচারত্বাদ্দণ্ডঃ সোঽন্তর্হিতোঽভবৎ
122.19
তস্মিন্নন্তর্হিতে চাথ প্রজানাং সংকরোঽভবৎ
নৈব কার্যং ন চাকার্যং ভোজ্যাভোজ্যং ন বিদ্যতে
122.20
পেয়াপেয়ং কুতঃ সিদ্ধির্হিংসন্তি চ পরস্পরম্
গম্যাগম্যং তদা নাসীত্পরস্বং স্বং চ বৈ সমম্
122.21
পরস্পরং বিলুম্পন্তে সারমেয়া ইবামিষম্
অবলং বলিনো জঘ্নুর্নির্মর্যাদমবর্তত
122.22
ততঃ পিতামহো বিষ্ণুং ভগবন্তং সনাতনম্
সংপূজ্য বরদং দেবং মহাদেবমথাব্রবীৎ
122.23
অত্র সাধ্বনুকম্পাং বৈ কর্তুমর্হসি কেবলম্
সংকরো ন ভবেদত্র যথা বৈ তদ্বিধীয়তাম্
122.24
ততঃ স ভগবান্ধ্যাত্বা চিরং শূলজটাধরঃ
আত্মানমাত্মনা দণ্ডমসৃজদ্দেবসত্তমঃ
122.25
তস্মাচ্চ ধর্মচরণাং নীতিং দেবীং সরস্বতীম্
অসৃজদ্দণ্ডনীতিঃ সা ত্রিষু লোকেষু বিশ্রুতা
122.26
ভূয়ঃ স ভগবান্ধ্যাত্বা চিরং শূলবরায়ুধঃ
তস্য তস্য নিকায়স্য চকারৈকৈকমীশরম্
122.27
দেবানামীশ্বরং চক্রে দেবং দশশতেক্ষণম্
যমং বৈবস্বতং চাপি পিতৄণামকরোত্পতিম্
122.28
ধনানাং রক্ষসাং চাপি কুবেরমপি চেশ্বরম্
পর্বতানাং পতিং মেরুং সরিতাং চ মহোদধিম্
122.29
অপাং রাজ্যে সুরাণাং চ বিদধে বরুণং প্রভুম্
মৃত্যুং প্রাণেশ্বরমথো তেজসাং চ হুতাশনম্
122.30
রুদ্রাণামপি চেশানং গোপ্তারং বিদধে প্রভুঃ
মহাত্মানং মহাদেবং বিশালাক্ষং সনাতনম্
122.31
বসিষ্ঠমীশং বিপ্রাণাং বসূনাং জাতবেদসম্
তেজসাং ভাস্করং চক্রে নক্ষত্রাণাং নিশাকরম্
122.32
বীরুধামংশুমন্তং চ ভূতানাং চ প্রভুং বরম্
কুমারং দ্বাদশভুজং স্কন্দং রাজানমাদিশৎ
122.33
কালং সর্বেশমকরোত্সংহারবিনয়াত্মকম্
মৃত্যোশ্চতুর্বিভাগস্য দুঃখস্য চ সুখস্য চ
122.34
ঈশ্বরঃ সর্বদেহস্তু রাজরাজো ধনাধিপঃ
সর্বেষামেব রুদ্রাণাং শূলপাণিরিতি শ্রুতিঃ
122.35
তমেকং ব্রহ্মণঃ পুত্রমনুজাতং ক্ষুপং দদৌ
প্রজানামধিপং শ্রেষ্ঠং সর্বধর্মভৃতামপি
122.36
মহাদেবস্ততস্তস্মিন্বৃত্তে যজ্ঞে যথাবিধি
দণ্ডং ধর্মস্য গোপ্তারং বিষ্ণবে সত্কৃতং দদৌ
122.37
বিষ্ণুরঙ্গিরসে প্রাদাদঙ্গিরা মুনিসত্তমঃ
প্রাদাদিন্দ্রমরীচিভ্যাং মরীচির্ভৃগবে দদৌ
122.38
ভৃগুর্দদাবৃষিভ্যস্তু তং দণ্ডং ধর্মসংহিতম্
ঋষয়ো লোকপালেভ্যো লোকপালাঃ ক্ষুপায় চ
122.39
ক্ষুপস্তু মনবে প্রাদাদাদিত্যতনয়ায় চ
পুত্রেভ্যঃ শ্রাদ্ধদেবস্তু সূক্ষ্মধর্মার্থকারণাৎ
তং দদৌ সূর্যপুত্রস্তু মনুর্বৈ রক্ষণাত্মকম্
122.40
বিভজ্য দণ্ডঃ কর্তব্যো ধর্মেণ ন যদৃচ্ছয়া
দুর্বাচা নিগ্রহো বন্ধো হিরণ্যং বাহ্যতঃক্রিয়া
122.41
ব্যঙ্গত্বং চ শরীরস্য বধো বা নাল্পকারণাৎ
শরীরপীডাস্তাস্তাস্তু দেহত্যাগো বিবাসনম্
122.42
আনুপূর্ব্যা চ দণ্ডোঽসৌ প্রজা জাগর্তি পালয়ন্
ইন্দ্রো জাগর্তি ভগবানিন্দ্রাদগ্নির্বিভাবসুঃ
122.43
অগ্নের্জাগর্তি বরুণো বরুণাচ্চ প্রজাপতিঃ
প্রজাপতেস্ততো ধর্মো জাগর্তি বিনয়াত্মকঃ
122.44
ধর্মাচ্চ ব্রহ্মণঃ পুত্রো ব্যবসায়ঃ সনাতনঃ
ব্যবসায়াত্ততস্তেজো জাগর্তি পরিপালয়ন্
122.45
ওষধ্যস্তেজসস্তস্মাদোষধিভ্যশ্চ পর্বতাঃ
পর্বতেভ্যশ্চ জাগর্তি রসো রসগুণাত্তথা
122.46
জাগর্তি নিরৃতির্দেবী জ্যোতীংষি নিরৃতেরপি
বেদাঃ প্রতিষ্ঠা জ্যোতির্ভ্যস্ততো হয়শিরাঃ প্রভুঃ
122.47
ব্রহ্মা পিতামহস্তস্মাজ্জাগর্তি প্রভুরব্যয়ঃ
পিতামহান্মহাদেবো জাগর্তি ভগবাঞ্শিবঃ
122.48
বিশ্বেদেবাঃ শিবাচ্চাপি বিশ্বেভ্যশ্চ তথর্ষয়ঃ
ঋষিভ্যো ভগবান্সোমঃ সোমাদ্দেবাঃ সনাতনাঃ
122.49
দেবেভ্যো ব্রাহ্মণা লোকে জাগ্রতীত্যুপধারয়
ব্রাহ্মণেভ্যশ্চ রাজন্যা লোকান্রক্ষন্তি ধর্মতঃ
স্থাবরং জঙ্গমং চৈব ক্ষত্রিয়েভ্যঃ সনাতনম্
122.50
প্রজা জাগ্রতি লোকেঽস্মিন্দণ্ডো জাগর্তি তাসু চ
সর্বসংক্ষেপকো দণ্ডঃ পিতামহসমঃ প্রভুঃ
122.51
জাগর্তি কালঃ পূর্বং চ মধ্যে চান্তে চ ভারত
ঈশ্বরঃ সর্বলোকস্য মহাদেবঃ প্রজাপতিঃ
122.52
দেবদেবঃ শিবঃ শর্বো জাগর্তি সততং প্রভুঃ
কপর্দী শংকরো রুদ্রো ভবঃ স্থাণুরুমাপতিঃ
122.53
ইত্যেষ দণ্ডো বিখ্যাত আদৌ মধ্যে তথাবরে
ভূমিপালো যথান্যায়ং বর্তেতানেন ধর্মবিৎ
122.54
ভীষ্ম উবাচ
ইতীদং বসুহোমস্য শৃণুয়াদ্যো মতং নরঃ
শ্রুত্বা চ সম্যগ্বর্তেত স কামানাপ্নুয়ান্নৃপঃ
122.55
ইতি তে সর্বমাখ্যাতং যো দণ্ডো মনুজর্ষভ
নিয়ন্তা সর্বলোকস্য ধর্মাক্রান্তস্য ভারত