Utshovঅধ্যায় 121
121.1
যুধিষ্ঠির উবাচ
অয়ং পিতামহেনোক্তো রাজধর্মঃ সনাতনঃ
ঈশ্বরশ্চ মহাদণ্ডো দণ্ডে সর্বং প্রতিষ্ঠিতম্
121.2
দেবতানামৃষীণাং চ পিতৄণাং চ মহাত্মনাম্
যক্ষরক্ষঃপিশাচানাং মর্ত্যানাং চ বিশেষতঃ
121.3
সর্বেষাং প্রাণিনাং লোকে তির্যক্ষ্বপি নিবাসিনাম্
সর্বব্যাপী মহাতেজা দণ্ডঃ শ্রেয়ানিতি প্রভো
121.4
ইত্যেতদুক্তং ভবতা সর্বং দণ্ড্যং চরাচরম্
দৃশ্যতে লোকমাসক্তং সসুরাসুরমানুষম্
121.5
এতদিচ্ছাম্যহং জ্ঞাতুং তত্ত্বেন ভরতর্ষভ
কো দণ্ডঃ কীদৃশো দণ্ডঃ কিংরূপঃ কিংপরায়ণঃ
121.6
কিমাত্মকঃ কথংভূতঃ কতিমূর্তিঃ কথংপ্রভুঃ
জাগর্তি স কথং দণ্ডঃ প্রজাস্ববহিতাত্মকঃ
121.7
কশ্চ পূর্বাপরমিদং জাগর্তি পরিপালয়ন্
কশ্চ বিজ্ঞায়তে পূর্বং কোঽপরো দণ্ডসংজ্ঞিতঃ
কিংসংস্থশ্চ ভবেদ্দণ্ডঃ কা চাস্য গতিরিষ্যতে
121.8
ভীষ্ম উবাচ
শৃণু কৌরব্য যো দণ্ডো ব্যবহার্যো যথা চ সঃ
যস্মিন্হি সর্বমায়ত্তং স দণ্ড ইহ কেবলঃ
121.9
ধর্মস্যাখ্যা মহারাজ ব্যবহার ইতীষ্যতে
তস্য লোপঃ কথং ন স্যাল্লোকেষ্ববহিতাত্মনঃ
ইত্যর্থং ব্যবহারস্য ব্যবহারত্বমিষ্যতে
121.10
অপি চৈতত্পুরা রাজন্মনুনা প্রোক্তমাদিতঃ
সুপ্রণীতেন দণ্ডেন প্রিয়াপ্রিয়সমাত্মনা
প্রজা রক্ষতি যঃ সম্যগ্ধর্ম এব স কেবলঃ
121.11
অথোক্তমেতদ্বচনং প্রাগেব মনুনা পুরা
জন্ম চোক্তং বসিষ্ঠেন ব্রহ্মণো বচনং মহৎ
121.12
প্রাগিদং বচনং প্রোক্তমতঃ প্রাগ্বচনং বিদুঃ
ব্যবহারস্য চাখ্যানাদ্ব্যবহার ইহোচ্যতে
121.13
দণ্ডাত্ত্রিবর্গঃ সততং সুপ্রণীতাত্প্রবর্ততে
দৈবং হি পরমো দণ্ডো রূপতোঽগ্নিরিবোচ্ছিখঃ
121.14
নীলোত্পলদলশ্যামশ্চতুর্দংষ্ট্রশ্চতুর্ভুজঃ
অষ্টপান্নৈকনয়নঃ শঙ্কুকর্ণোর্ধ্বরোমবান্
121.15
জটী দ্বিজিহ্বস্তাম্রাস্যো মৃগরাজতনুচ্ছদঃ
এতদ্রূপং বিভর্ত্যুগ্রং দণ্ডো নিত্যং দুরাবরঃ
121.16
অসির্গদা ধনুঃ শক্তিস্ত্রিশূলং মুদ্গরঃ শরঃ
মুসলং পরশুশ্চক্রং প্রাসো দণ্ডর্ষ্টিতোমরাঃ
121.17
সর্বপ্রহরণীয়ানি সন্তি যানীহ কানিচিৎ
দণ্ড এব হি সর্বাত্মা লোকে চরতি মূর্তিমান্
121.18
ভিন্দংশ্ছিন্দন্রুজন্কৃন্তন্দারয়ন্পাটয়ংস্তথা
ঘাতয়ন্নভিধাবংশ্চ দণ্ড এব চরত্যুত
121.19
অসির্বিশসনো ধর্মস্তীক্ষ্ণবর্ত্মা দুরাসদঃ
শ্রীগর্ভো বিজয়ঃ শাস্তা ব্যবহারঃ প্রজাগরঃ
121.20
শাস্ত্রং ব্রাহ্মণমন্ত্রশ্চ শাস্তা প্রাগ্বচনং গতঃ
ধর্মপালোঽক্ষরো দেবঃ সত্যগো নিত্যগো গ্রহঃ
121.21
অসঙ্গো রুদ্রতনয়ো মনুজ্যেষ্ঠঃ শিবংকরঃ
নামান্যেতানি দণ্ডস্য কীর্তিতানি যুধিষ্ঠির
121.22
দণ্ডো হি ভগবান্বিষ্ণুর্যজ্ঞো নারায়ণঃ প্রভুঃ
শশ্বদ্রূপং মহদ্বিভ্রন্মহাপুরুষ উচ্যতে
121.23
যথোক্তা ব্রহ্মকন্যেতি লক্ষ্মীর্নীতিঃ সরস্বতী
দণ্ডনীতির্জগদ্ধাত্রী দণ্ডো হি বহুবিগ্রহঃ
121.24
অর্থানর্থৌ সুখং দুঃখং ধর্মাধর্মৌ বলাবলে
দৌর্ভাগ্যং ভাগধেয়ং চ পুণ্যাপুণ্যে গুণাগুণৌ
121.25
কামাকামাবৃতুর্মাসঃ শর্বরী দিবসঃ ক্ষণঃ
অপ্রসাদঃ প্রসাদশ্চ হর্ষঃ ক্রোধঃ শমো দমঃ
121.26
দৈবং পুরুষকারশ্চ মোক্ষামোক্ষৌ ভয়াভয়ে
হিংসাহিংসে তপো যজ্ঞঃ সংয়মোঽথ বিষাবিষম্
121.27
অন্তশ্চাদিশ্চ মধ্যং চ কৃত্যানাং চ প্রপঞ্চনম্
মদঃ প্রমাদো দর্পশ্চ দম্ভো ধৈর্যং নয়ানয়ৌ
121.28
অশক্তিঃ শক্তিরিত্যেব মানস্তম্ভৌ ব্যয়াব্যয়ৌ
বিনয়শ্চ বিসর্গশ্চ কালাকালৌ চ ভারত
121.29
অনৃতং জ্ঞাজ্ঞতা সত্যং শ্রদ্ধাশ্রদ্ধে তথৈব চ
ক্লীবতা ব্যবসায়শ্চ লাভালাভৌ জয়াজয়ৌ
121.30
তীক্ষ্ণতা মৃদুতা মৃত্যুরাগমানাগমৌ তথা
বিরাদ্ধিশ্চৈব রাদ্ধিশ্চ কার্যাকার্যে বলাবলে
121.31
অসূয়া চানসূয়া চ ধর্মাধর্মৌ তথৈব চ
অপত্রপানপত্রপে হ্রীশ্চ সংপদ্বিপচ্চ হ
121.32
তেজঃ কর্মণি পাণ্ডিত্যং বাক্শক্তিস্তত্ত্ববুদ্ধিতা
এবং দণ্ডস্য কৌরব্য লোকেঽস্মিন্বহুরূপতা
121.33
ন স্যাদ্যদীহ দণ্ডো বৈ প্রমথেয়ুঃ পরস্পরম্
ভয়াদ্দণ্ডস্য চান্যোন্যং ঘ্নন্তি নৈব যুধিষ্ঠির
121.34
দণ্ডেন রক্ষ্যমাণা হি রাজন্নহরহঃ প্রজাঃ
রাজানং বর্ধয়ন্তীহ তস্মাদ্দণ্ডঃ পরায়ণম্
121.35
ব্যবস্থাপয়তি ক্ষিপ্রমিমং লোকং নরেশ্বর
সত্যে ব্যবস্থিতো ধর্মো ব্রাহ্মণেষ্ববতিষ্ঠতে
121.36
ধর্ময়ুক্তা দ্বিজাঃ শ্রেষ্ঠা বেদয়ুক্তা ভবন্তি চ
বভূব যজ্ঞো বেদেভ্যো যজ্ঞঃ প্রীণাতি দেবতাঃ
121.37
প্রীতাশ্চ দেবতা নিত্যমিন্দ্রে পরিদদত্যুত
অন্নং দদাতি শক্রশ্চাপ্যনুগৃহ্ণন্নিমাঃ প্রজাঃ
121.38
প্রাণাশ্চ সর্বভূতানাং নিত্যমন্নে প্রতিষ্ঠিতাঃ
তস্মাত্প্রজাঃ প্রতিষ্ঠন্তে দণ্ডো জাগর্তি তাসু চ
121.39
এবংপ্রয়োজনশ্চৈব দণ্ডঃ ক্ষত্রিয়তাং গতঃ
রক্ষন্প্রজাঃ প্রজাগর্তি নিত্যং সুবিহিতোঽক্ষরঃ
121.40
ঈশ্বরঃ পুরুষঃ প্রাণঃ সত্ত্বং বিত্তং প্রজাপতিঃ
ভূতাত্মা জীব ইত্যেব নামভিঃ প্রোচ্যতেঽষ্টভিঃ
121.41
অদদদ্দণ্ড এবাস্মৈ ধ্রুবমৈশ্বর্যমেব চ
বলে নয়শ্চ সংয়ুক্তঃ সদা পঞ্চবিধাত্মকঃ
121.42
কুলবাহুধনামাত্যাঃ প্রজ্ঞা চোক্তা বলানি চ
আহার্যং চাষ্টকৈর্দ্রব্যৈর্বলমন্যদ্যুধিষ্ঠির
121.43
হস্তিনোঽশ্বা রথাঃ পত্তির্নাবো বিষ্টিস্তথৈব চ
দৈশিকাশ্চারকাশ্চৈব তদষ্টাঙ্গং বলং স্মৃতম্
121.44
অষ্টাঙ্গস্য তু যুক্তস্য হস্তিনো হস্তিয়ায়িনঃ
অশ্বারোহাঃ পদাতাশ্চ মন্ত্রিণো রসদাশ্চ যে
121.45
ভিক্ষুকাঃ প্রাড্বিবাকাশ্চ মৌহূর্তা দৈবচিন্তকাঃ
কোশো মিত্রাণি ধান্যং চ সর্বোপকরণানি চ
121.46
সপ্তপ্রকৃতি চাষ্টাঙ্গং শরীরমিহ যদ্বিদুঃ
রাজ্যস্য দণ্ড এবাঙ্গং দণ্ডঃ প্রভব এব চ
121.47
ঈশ্বরেণ প্রয়ত্নেন ধারণে ক্ষত্রিয়স্য হি
দণ্ডো দত্তঃ সমানাত্মা দণ্ডো হীদং সনাতনম্
রাজ্ঞাং পূজ্যতমো নান্যো যথাধর্মপ্রদর্শনঃ
121.48
ব্রহ্মণা লোকরক্ষার্থং স্বধর্মস্থাপনায় চ
ভর্তৃপ্রত্যয় উত্পন্নো ব্যবহারস্তথাপরঃ
তস্মাদ্যঃ সহিতো দৃষ্টো ভর্তৃপ্রত্যয়লক্ষণঃ
121.49
ব্যবহারস্তু বেদাত্মা বেদপ্রত্যয় উচ্যতে
মৌলশ্চ নরশার্দূল শাস্ত্রোক্তশ্চ তথাপরঃ
121.50
উক্তো যশ্চাপি দণ্ডোঽসৌ ভর্তৃপ্রত্যয়লক্ষণঃ
জ্ঞেয়ো ন স নরেন্দ্রস্থো দণ্ডপ্রত্যয় এব চ
121.51
দণ্ডপ্রত্যয়দৃষ্টোঽপি ব্যবহারাত্মকঃ স্মৃতঃ
ব্যবহারঃ স্মৃতো যশ্চ স বেদবিষয়াত্মকঃ
121.52
যশ্চ বেদপ্রসূতাত্মা স ধর্মো গুণদর্শকঃ
ধর্মপ্রত্যয় উত্পন্নো যথাধর্মঃ কৃতাত্মভিঃ
121.53
ব্যবহারঃ প্রজাগোপ্তা ব্রহ্মদিষ্টো যুধিষ্ঠির
ত্রীন্ধারয়তি লোকান্বৈ সত্যাত্মা ভূতিবর্ধনঃ
121.54
যশ্চ দণ্ডঃ স দৃষ্টো নো ব্যবহারঃ সনাতনঃ
ব্যবহারশ্চ যো দৃষ্টঃ স ধর্ম ইতি নঃ শ্রুতঃ
যশ্চ বেদঃ স বৈ ধর্মো যশ্চ ধর্মঃ স সত্পথঃ
121.55
ব্রহ্মা প্রজাপতিঃ পূর্বং বভূবাথ পিতামহঃ
লোকানাং স হি সর্বেষাং সসুরাসুররক্ষসাম্
সমনুষ্যোরগবতাং কর্তা চৈব স ভূতকৃৎ
121.56
ততো নো ব্যবহারোঽয়ং ভর্তৃপ্রত্যয়লক্ষণঃ
তস্মাদিদমবোচাম ব্যবহারনিদর্শনম্
121.57
মাতা পিতা চ ভ্রাতা চ ভার্যা চাথ পুরোহিতঃ
নাদণ্ড্যো বিদ্যতে রাজ্ঞাং যঃ স্বধর্মে ন তিষ্ঠতি