Utshovঅধ্যায় 120
120.1
যুধিষ্ঠির উবাচ
রাজবৃত্তান্যনেকানি ত্বয়া প্রোক্তানি ভারত
পূর্বৈঃ পূর্বনিয়ুক্তানি রাজধর্মার্থবেদিভিঃ
120.2
তদেব বিস্তরেণোক্তং পূর্বৈর্দৃষ্টং সতাং মতম্
প্রণয়ং রাজধর্মাণাং প্রব্রূহি ভরতর্ষভ
120.3
ভীষ্ম উবাচ
রক্ষণং সর্বভূতানামিতি ক্ষত্রে পরং মতম্
তদ্যথা রক্ষণং কুর্যাত্তথা শৃণু মহীপতে
120.4
যথা বর্হাণি চিত্রাণি বিভর্তি ভুজগাশনঃ
তথা বহুবিধং রাজা রূপং কুর্বীত ধর্মবিৎ
120.5
তৈক্ষ্ণ্যং জিহ্মত্বমাদান্ত্যং সত্যমার্জবমেব চ
মধ্যস্থঃ সত্ত্বমাতিষ্ঠংস্তথা বৈ সুখমৃচ্ছতি
120.6
যস্মিন্নর্থে হিতং যত্স্যাত্তদ্বর্ণং রূপমাবিশেৎ
বহুরূপস্য রাজ্ঞো হি সূক্ষ্মোঽপ্যর্থো ন সীদতি
120.7
নিত্যং রক্ষিতমন্ত্রঃ স্যাদ্যথা মূকঃ শরচ্ছিখী
শ্লক্ষ্ণাক্ষরতনুঃ শ্রীমান্ভবেচ্ছাস্ত্রবিশারদঃ
120.8
আপদ্দ্বারেষু যত্তঃ স্যাজ্জলপ্রস্রবণেষ্বিব
শৈলবর্ষোদকানীব দ্বিজান্সিদ্ধান্সমাশ্রয়েৎ
120.9
অর্থকামঃ শিখাং রাজা কুর্যাদ্ধর্মধ্বজোপমাম্
নিত্যমুদ্যতদণ্ডঃ স্যাদাচরেচ্চাপ্রমাদতঃ
লোকে চায়ব্যয়ৌ দৃষ্ট্বা বৃক্ষাদ্বৃক্ষমিবাপ্লবন্
120.10
মৃজাবান্স্যাত্স্বয়ূথ্যেষু ভাবানি চরণৈঃ ক্ষিপেৎ
জাতপক্ষঃ পরিস্পন্দেদ্রক্ষেদ্বৈকল্যমাত্মনঃ
120.11
দোষান্বিবৃণুয়াচ্ছত্রোঃ পরপক্ষান্বিধূনয়েৎ
কাননেষ্বিব পুষ্পাণি বর্হীবার্থান্সমাচরেৎ
120.12
উচ্ছ্রিতানাশ্রয়েত্স্ফীতান্নরেন্দ্রানচলোপমান্
শ্রয়েচ্ছায়ামবিজ্ঞাতাং গুপ্তং শরণমাশ্রয়েৎ
120.13
প্রাবৃষীবাসিতগ্রীবো মজ্জেত নিশি নির্জনে
মায়ূরেণ গুণেনৈব স্ত্রীভিশ্চালক্ষিতশ্চরেৎ
ন জহ্যাচ্চ তনুত্রাণং রক্ষেদাত্মানমাত্মনা
120.14
চারভূমিষ্বভিগমান্পাশাংশ্চ পরিবর্জয়েৎ
পীডয়েচ্চাপি তাং ভূমিং প্রণশ্যেদ্গহনে পুনঃ
120.15
হন্যাত্ক্রুদ্ধানতিবিষান্যে জিহ্মগতয়োঽহিতান্
নাশ্রয়েদ্বালবর্হাণি সন্নিবাসানি বাসয়েৎ
120.16
সদা বর্হিনিভঃ কামং প্রসক্তিকৃতমাচরেৎ
সর্বতশ্চাদদেত্প্রজ্ঞাং পতংগান্গহনেষ্বিব
এবং ময়ূরবদ্রাজা স্বরাষ্ট্রং পরিপালয়েৎ
120.17
আত্মবৃদ্ধিকরীং নীতিং বিদধীত বিচক্ষণঃ
আত্মসংয়মনং বুদ্ধ্যা পরবুদ্ধ্যাবতারণম্
বুদ্ধ্যা চাত্মগুণপ্রাপ্তিরেতচ্ছাস্ত্রনিদর্শনম্
120.18
পরং চাশ্বাসয়েত্সাম্না স্বশক্তিং চোপলক্ষয়েৎ
আত্মনঃ পরিমর্শেন বুদ্ধিং বুদ্ধ্যা বিচারয়েৎ
সান্ত্বয়োগমতিঃ প্রাজ্ঞঃ কার্যাকার্যবিচারকঃ
120.19
নিগূঢবুদ্ধির্ধীরঃ স্যাদ্বক্তব্যে বক্ষ্যতে তথা
সংনিকৃষ্টাং কথাং প্রাজ্ঞো যদি বুদ্ধ্যা বৃহস্পতিঃ
স্বভাবমেষ্যতে তপ্তং কৃষ্ণায়সমিবোদকে
120.20
অনুয়ুঞ্জীত কৃত্যানি সর্বাণ্যেব মহীপতিঃ
আগমৈরুপদিষ্টানি স্বস্য চৈব পরস্য চ
120.21
ক্ষুদ্রং ক্রূরং তথা প্রাজ্ঞং শূরং চার্থবিশারদম্
স্বকর্মণি নিয়ুঞ্জীত যে চান্যে বচনাধিকাঃ
120.22
অপ্যদৃষ্ট্বা নিয়ুক্তানি অনুরূপেষু কর্মসু
সর্বাংস্তাননুবর্তেত স্বরাংস্তন্ত্রীরিবায়তা
120.23
ধর্মাণামবিরোধেন সর্বেষাং প্রিয়মাচরেৎ
মমায়মিতি রাজা যঃ স পর্বত ইবাচলঃ
120.24
ব্যবসায়ং সমাধায় সূর্যো রশ্মিমিবায়তাম্
ধর্মমেবাভিরক্ষেত কৃত্বা তুল্যে প্রিয়াপ্রিয়ে
120.25
কুলপ্রকৃতিদেশানাং ধর্মজ্ঞান্মৃদুভাষিণঃ
মধ্যে বয়সি নির্দোষান্হিতে যুক্তাঞ্জিতেন্দ্রিয়ান্
120.26
অলুব্ধাঞ্শিক্ষিতান্দান্তান্ধর্মেষু পরিনিষ্ঠিতান্
স্থাপয়েত্সর্বকার্যেষু রাজা ধর্মার্থরক্ষিণঃ
120.27
এতেনৈব প্রকারেণ কৃত্যানামাগতিং গতিম্
যুক্তঃ সমনুতিষ্ঠেত তুষ্টশ্চারৈরুপস্কৃতঃ
120.28
অমোঘক্রোধহর্ষস্য স্বয়ং কৃত্যান্ববেক্ষিণঃ
আত্মপ্রত্যয়কোশস্য বসুধৈব বসুংধরা
120.29
ব্যক্তশ্চানুগ্রহো যস্য যথার্থশ্চাপি নিগ্রহঃ
গুপ্তাত্মা গুপ্তরাষ্ট্রশ্চ স রাজা রাজধর্মবিৎ
120.30
নিত্যং রাষ্ট্রমবেক্ষেত গোভিঃ সূর্য ইবোত্পতন্
চারাংশ্চ নচরান্বিদ্যাত্তথা বুদ্ধ্যা ন সংজ্বরেৎ
120.31
কালপ্রাপ্তমুপাদদ্যান্নার্থং রাজা প্রসূচয়েৎ
অহন্যহনি সংদুহ্যান্মহীং গামিব বুদ্ধিমান্
120.32
যথা ক্রমেণ পুষ্পেভ্যশ্চিনোতি মধু ষট্পদঃ
তথা দ্রব্যমুপাদায় রাজা কুর্বীত সংচয়ম্
120.33
যদ্ধি গুপ্তাবশিষ্টং স্যাত্তদ্ধিতং ধর্মকাময়োঃ
সংচয়ানুবিসর্গী স্যাদ্রাজা শাস্ত্রবিদাত্মবান্
120.34
নাল্পমর্থং পরিভবেন্নাবমন্যেত শাত্রবান্
বুদ্ধ্যাববুধ্যেদাত্মানং ন চাবুদ্ধিষু বিশ্বসেৎ
120.35
ধৃতির্দাক্ষ্যং সংয়মো বুদ্ধিরগ্র্যা; ধৈর্যং শৌর্যং দেশকালোঽপ্রমাদঃ
স্বল্পস্য বা মহতো বাপি বৃদ্ধৌ; ধনস্যৈতান্যষ্ট সমিন্ধনানি
120.36
অগ্নিস্তোকো বর্ধতে হ্যাজ্যসিক্তো; বীজং চৈকং বহুসাহস্রমেতি
ক্ষয়োদয়ৌ বিপুলৌ সংনিশাম্য; তস্মাদল্পং নাবমন্যেত বিদ্বান্
120.37
বালোঽবালঃ স্থবিরো বা রিপুর্যঃ; সদা প্রমত্তং পুরুষং নিহন্যাৎ
কালেনান্যস্তস্য মূলং হরেত; কালজ্ঞাতা পার্থিবানাং বরিষ্ঠঃ
120.38
হরেত্কীর্তিং ধর্মমস্যোপরুন্ধ্যা;দর্থে দীর্ঘং বীর্যমস্যোপহন্যাৎ
রিপুর্দ্বেষ্টা দুর্বলো বা বলী বা; তস্মাচ্ছত্রৌ নৈব হেডেদ্যতাত্মা
120.39
ক্ষয়ং শত্রোঃ সংচয়ং পালনং চা;প্যুভৌ চার্থৌ সহিতৌ ধর্মকামৌ
অতশ্চান্যন্মতিমান্সংদধীত; তস্মাদ্রাজা বুদ্ধিমন্তং শ্রয়েত
120.40
বুদ্ধির্দীপ্তা বলবন্তং হিনস্তি; বলং বুদ্ধ্যা বর্ধতে পাল্যমানম্
শত্রুর্বুদ্ধ্যা সীদতে বর্ধমানো; বুদ্ধেঃ পশ্চাত্কর্ম যত্তত্প্রশস্তম্
120.41
সর্বান্কামান্কাময়ানো হি ধীরঃ; সত্ত্বেনাল্পেনাপ্লুতে হীনদেহঃ
যথাত্মানং প্রার্থয়তেঽর্থমানৈঃ; শ্রেয়ঃপাত্রং পূরয়তে হ্যনল্পম্
120.42
তস্মাদ্রাজা প্রগৃহীতঃ পরেষু; মূলং লক্ষ্ম্যাঃ সর্বতোঽভ্যাদদীত
দীর্ঘং কালমপি সংপীড্যমানো; বিদ্যুত্সংপাতমিব মানোর্জিতঃ স্যাৎ
120.43
বিদ্যা তপো বা বিপুলং ধনং বা; সর্বমেতদ্ব্যবসায়েন শক্যম্
ব্রহ্ম যত্তং নিবসতি দেহবত্সু; তস্মাদ্বিদ্যাদ্ব্যবসায়ং প্রভূতম্
120.44
যত্রাসতে মতিমন্তো মনস্বিনঃ; শক্রো বিষ্ণুর্যত্র সরস্বতী চ
বসন্তি ভূতানি চ যত্র নিত্যং; তস্মাদ্বিদ্বান্নাবমন্যেত দেহম্
120.45
লুব্ধং হন্যাত্সংপ্রদানেন নিত্যং; লুব্ধস্তৃপ্তিং পরবিত্তস্য নৈতি
সর্বো লুব্ধঃ কর্মগুণোপভোগে; যোঽর্থৈর্হীনো ধর্মকামৌ জহাতি
120.46
ধনং ভোজ্যং পুত্রদারং সমৃদ্ধিং; সর্বো লুব্ধঃ প্রার্থয়তে পরেষাম্
লুব্ধে দোষাঃ সংভবন্তীহ সর্বে; তস্মাদ্রাজা ন প্রগৃহ্ণীত লুব্ধান্
120.47
সংদর্শনে সত্পুরুষং জঘন্যমপি চোদয়েৎ
আরম্ভান্দ্বিষতাং প্রাজ্ঞঃ সর্বানর্থাংস্তু সূদয়েৎ
120.48
ধর্মান্বিতেষু বিজ্ঞাতো মন্ত্রী গুপ্তশ্চ পাণ্ডব
আপ্তো রাজন্কুলীনশ্চ পর্যাপ্তো রাজ্যসংগ্রহে
120.49
বিধিপ্রবৃত্তান্নরদেবধর্মা;নুক্তান্সমাসেন নিবোধ বুদ্ধ্যা
ইমান্বিদধ্যাদ্ব্যনুসৃত্য যো বৈ; রাজা মহীং পালয়িতুং স শক্তঃ
120.50
অনীতিজং যদ্যবিধানজং সুখং; হঠপ্রণীতং বিবিধং প্রদৃশ্যতে
ন বিদ্যতে তস্য গতির্মহীপতে;র্ন বিদ্যতে রাষ্ট্রজমুত্তমং সুখম্
120.51
ধনৈর্বিশিষ্টান্মতিশীলপূজিতা;ন্গুণোপপন্নান্যুধি দৃষ্টবিক্রমান্
গুণেষু দৃষ্টানচিরাদিহাত্মবা;ন্সতোঽভিসংধায় নিহন্তি শাত্রবান্
120.52
পশ্যেদুপায়ান্বিবিধৈঃ ক্রিয়াপথৈ;র্ন চানুপায়েন মতিং নিবেশয়েৎ
শ্রিয়ং বিশিষ্টাং বিপুলং যশো ধনং; ন দোষদর্শী পুরুষঃ সমশ্নুতে
120.53
প্রীতিপ্রবৃত্তৌ বিনিবর্তনে তথা; সুহৃত্সু বিজ্ঞায় নিবৃত্য চোভয়োঃ
যদেব মিত্রং গুরুভারমাবহে;ত্তদেব সুস্নিগ্ধমুদাহরেদ্বুধঃ
120.54
এতান্ময়োক্তাংস্তব রাজধর্মা;ন্নৃণাং চ গুপ্তৌ মতিমাদধত্স্ব
অবাপ্স্যসে পুণ্যফলং সুখেন; সর্বো হি লোকোত্তমধর্মমূলঃ