অধ্যায় 119

119.1

ভীষ্ম উবাচ
এবং শুনাসমান্ভৃত্যান্স্বস্থানে যো নরাধিপঃ
নিয়োজয়তি কৃত্যেষু স রাজ্যফলমশ্নুতে

ন শ্বা স্বস্থানমুত্ক্রম্য প্রমাণমভি সত্কৃতঃ
আরোপ্যঃ শ্বা স্বকাত্স্থানাদুত্ক্রম্যান্যত্প্রপদ্যতে

স্বজাতিকুলসংপন্নাঃ স্বেষু কর্মস্ববস্থিতাঃ
প্রকর্তব্যা বুধা ভৃত্যা নাস্থানে প্রক্রিয়া ক্ষমা

অনুরূপাণি কর্মাণি ভৃত্যেভ্যো যঃ প্রয়চ্ছতি
স ভৃত্যগুণসংপন্নং রাজা ফলমুপাশ্নুতে

শরভঃ শরভস্থানে সিংহঃ সিংহ ইবোর্জিতঃ
ব্যাঘ্রো ব্যাঘ্র ইব স্থাপ্যো দ্বীপী দ্বীপী যথা তথা

কর্মস্বিহানুরূপেষু ন্যস্যা ভৃত্যা যথাবিধি
প্রতিলোমং ন ভৃত্যাস্তে স্থাপ্যাঃ কর্মফলৈষিণা

যঃ প্রমাণমতিক্রম্য প্রতিলোমং নরাধিপঃ
ভৃত্যান্স্থাপয়তেঽবুদ্ধির্ন স রঞ্জয়তে প্রজাঃ

ন বালিশা ন চ ক্ষুদ্রা ন চাপ্রতিমিতেন্দ্রিয়াঃ
নাকুলীনা নরাঃ পার্শ্বে স্থাপ্যা রাজ্ঞা হিতৈষিণা

সাধবঃ কুশলাঃ শূরা জ্ঞানবন্তোঽনসূয়কাঃ
অক্ষুদ্রাঃ শুচয়ো দক্ষা নরাঃ স্যুঃ পারিপার্শ্বকাঃ

ন্যগ্ভূতাস্তত্পরাঃ ক্ষান্তাশ্চৌক্ষাঃ প্রকৃতিজাঃ শুভাঃ
স্বে স্বে স্থানেঽপরিক্রুষ্টাস্তে স্যূ রাজ্ঞো বহিশ্চরাঃ

সিংহস্য সততং পার্শ্বে সিংহ এব জনো ভবেৎ
অসিংহঃ সিংহসহিতঃ সিংহবল্লভতে ফলম্

যস্তু সিংহঃ শ্বভিঃ কীর্ণঃ সিংহকর্মফলে রতঃ
ন স সিংহফলং ভোক্তুং শক্তঃ শ্বভিরুপাসিতঃ

এবমেতৈর্মনুষ্যেন্দ্র শূরৈঃ প্রাজ্ঞৈর্বহুশ্রুতৈঃ
কুলীনৈঃ সহ শক্যেত কৃত্স্নাং জেতুং বসুংধরাম্

নাবৈদ্যো নানৃজুঃ পার্শ্বে নাবিদ্যো নামহাধনঃ
সংগ্রাহ্যো বসুধাপালৈর্ভৃত্যো ভৃত্যবতাং বর

বাণবদ্বিসৃতা যান্তি স্বামিকার্যপরা জনাঃ
যে ভৃত্যাঃ পার্থিবহিতাস্তেষাং সান্ত্বং প্রয়োজয়েৎ

কোশশ্চ সততং রক্ষ্যো যত্নমাস্থায় রাজভিঃ
কোশমূলা হি রাজানঃ কোশমূলকরো ভব

কোষ্ঠাগারং চ তে নিত্যং স্ফীতং ধান্যৈঃ সুসংচিতম্
সদাস্তু সত্সু সংন্যস্তং ধনধান্যপরো ভব

নিত্যয়ুক্তাশ্চ তে ভৃত্যা ভবন্তু রণকোবিদাঃ
বাজিনাং চ প্রয়োগেষু বৈশারদ্যমিহেষ্যতে

জ্ঞাতিবন্ধুজনাবেক্ষী মিত্রসংবন্ধিসংবৃতঃ
পৌরকার্যহিতান্বেষী ভব কৌরবনন্দন

এষা তে নৈষ্ঠিকী বুদ্ধিঃ প্রজ্ঞা চাভিহিতা ময়া
শ্বা তে নিদর্শনং তাত কিং ভূয়ঃ শ্রোতুমিচ্ছসি