Utshovঅধ্যায় 118
118.1
ভীষ্ম উবাচ
স শ্বা প্রকৃতিমাপন্নঃ পরং দৈন্যমুপাগমৎ
ঋষিণা হুংকৃতঃ পাপস্তপোবনবহিষ্কৃতঃ
118.2
এবং রাজ্ঞা মতিমতা বিদিত্বা শীলশৌচতাম্
আর্জবং প্রকৃতিং সত্ত্বং কুলং বৃত্তং শ্রুতং দমম্
118.3
অনুক্রোশং বলং বীর্যং ভাবং সংপ্রশমং ক্ষমাম্
ভৃত্যা যে যত্র যোগ্যাঃ স্যুস্তত্র স্থাপ্যাঃ সুশিক্ষিতাঃ
118.4
নাপরীক্ষ্য মহীপালঃ প্রকর্তুং ভৃত্যমর্হতি
অকুলীননরাকীর্ণো ন রাজা সুখমেধতে
118.5
কুলজঃ প্রকৃতো রাজ্ঞা তত্কুলীনতয়া সদা
ন পাপে কুরুতে বুদ্ধিং নিন্দ্যমানোঽপ্যনাগসি
118.6
অকুলীনস্তু পুরুষঃ প্রকৃতঃ সাধুসংক্ষয়াৎ
দুর্লভৈশ্বর্যতাং প্রাপ্তো নিন্দিতঃ শত্রুতাং ব্রজেৎ
118.7
কুলীনং শিক্ষিতং প্রাজ্ঞং জ্ঞানবিজ্ঞানকোবিদম্
সর্বশাস্ত্রার্থতত্ত্বজ্ঞং সহিষ্ণুং দেশজং তথা
118.8
কৃতজ্ঞং বলবন্তং চ ক্ষান্তং দান্তং জিতেন্দ্রিয়ম্
অলুব্ধং লব্ধসংতুষ্টং স্বামিমিত্রবুভূষকম্
118.9
সচিবং দেশকালজ্ঞং সর্বসংগ্রহণে রতম্
সত্কৃতং যুক্তমনসং হিতৈষিণমতন্দ্রিতম্
118.10
যুক্তাচারং স্ববিষয়ে সংধিবিগ্রহকোবিদম্
রাজ্ঞস্ত্রিবর্গবেত্তারং পৌরজানপদপ্রিয়ম্
118.11
খাতকব্যূহতত্ত্বজ্ঞং বলহর্ষণকোবিদম্
ইঙ্গিতাকারতত্ত্বজ্ঞং যাত্রায়ানবিশারদম্
118.12
হস্তিশিক্ষাসু তত্ত্বজ্ঞমহংকারবিবর্জিতম্
প্রগল্ভং দক্ষিণং দান্তং বলিনং যুক্তকারিণম্
118.13
চোক্ষং চোক্ষজনাকীর্ণং সুবেষং সুখদর্শনম্
নায়কং নীতিকুশলং গুণষষ্ট্যা সমন্বিতম্
118.14
অস্তব্ধং প্রশ্রিতং শক্তং মৃদুবাদিনমেব চ
ধীরং শ্লক্ষ্ণং মহর্দ্ধিং চ দেশকালোপপাদকম্
118.15
সচিবং যঃ প্রকুরুতে ন চৈনমবমন্যতে
তস্য বিস্তীর্যতে রাজ্যং জ্যোত্স্না গ্রহপতেরিব
118.16
এতৈরেব গুণৈর্যুক্তো রাজা শাস্ত্রবিশারদঃ
এষ্টব্যো ধর্মপরমঃ প্রজাপালনতত্পরঃ
118.17
ধীরো মর্ষী শুচিঃ শীঘ্রঃ কালে পুরুষকারবিৎ
শুশ্রূষুঃ শ্রুতবাঞ্শ্রোতা ঊহাপোহবিশারদঃ
118.18
মেধাবী ধারণায়ুক্তো যথান্যায়োপপাদকঃ
দান্তঃ সদা প্রিয়াভাষী ক্ষমাবাংশ্চ বিপর্যয়ে
118.19
দানাচ্ছেদে স্বয়ংকারী সুদ্বারঃ সুখদর্শনঃ
আর্তহস্তপ্রদো নিত্যমাপ্তংমন্যো নয়ে রতঃ
118.20
নাহংবাদী ন নির্দ্বংদ্বো ন যত্কিংচনকারকঃ
কৃতে কর্মণ্যমোঘানাং কর্তা ভৃত্যজনপ্রিয়ঃ
118.21
সংগৃহীতজনোঽস্তব্ধঃ প্রসন্নবদনঃ সদা
দাতা ভৃত্যজনাবেক্ষী ন ক্রোধী সুমহামনাঃ
118.22
যুক্তদণ্ডো ন নির্দণ্ডো ধর্মকার্যানুশাসকঃ
চারনেত্রঃ পরাবেক্ষী ধর্মার্থকুশলঃ সদা
118.23
রাজা গুণশতাকীর্ণ এষ্টব্যস্তাদৃশো ভবেৎ
যোধাশ্চৈব মনুষ্যেন্দ্র সর্বৈর্গুণগুণৈর্বৃতাঃ
118.24
অন্বেষ্টব্যাঃ সুপুরুষাঃ সহায়া রাজ্যধারণাঃ
ন বিমানয়িতব্যাশ্চ রাজ্ঞা বৃদ্ধিমভীপ্সতা
118.25
যোধাঃ সমরশৌটীরাঃ কৃতজ্ঞাঃ শস্ত্রকোবিদাঃ
ধর্মশাস্ত্রসমায়ুক্তাঃ পদাতিজনসংয়ুতাঃ
118.26
অর্থমানবিবৃদ্ধাশ্চ রথচর্যাবিশারদাঃ
ইষ্বস্ত্রকুশলা যস্য তস্যেয়ং নৃপতের্মহী
118.27
সর্বসংগ্রহণে যুক্তো নৃপো ভবতি যঃ সদা
উত্থানশীলো মিত্রাঢ্যঃ স রাজা রাজসত্তমঃ
118.28
শক্যা অশ্বসহস্রেণ বীরারোহেণ ভারত
সংগৃহীতমনুষ্যেণ কৃত্স্না জেতুং বসুংধরা