Utshovঅধ্যায় 117
117.1
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
নিদর্শনকরং লোকে সজ্জনাচরিতং সদা
117.2
অস্যৈবার্থস্য সদৃশং যচ্ছ্রুতং মে তপোবনে
জামদগ্ন্যস্য রামস্য যদুক্তমৃষিসত্তমৈঃ
117.3
বনে মহতি কস্মিংশ্চিদমনুষ্যনিষেবিতে
ঋষির্মূলফলাহারো নিয়তো নিয়তেন্দ্রিয়ঃ
117.4
দীক্ষাদমপরঃ শান্তঃ স্বাধ্যায়পরমঃ শুচিঃ
উপবাসবিশুদ্ধাত্মা সততং সত্পথে স্থিতঃ
117.5
তস্য সংদৃশ্য সদ্ভাবমুপবিষ্টস্য ধীমতঃ
সর্বসত্ত্বাঃ সমীপস্থা ভবন্তি বনচারিণঃ
117.6
সিংহব্যাঘ্রাঃ সশরভা মত্তাশ্চৈব মহাগজাঃ
দ্বীপিনঃ খড্গভল্লূকা যে চান্যে ভীমদর্শনাঃ
117.7
তে সুখপ্রশ্নদাঃ সর্বে ভবন্তি ক্ষতজাশনাঃ
তস্যর্ষেঃ শিষ্যবচ্চৈব ন্যগ্ভূতাঃ প্রিয়কারিণঃ
117.8
দত্ত্বা চ তে সুখপ্রশ্নং সর্বে যান্তি যথাগতম্
গ্রাম্যস্ত্বেকঃ পশুস্তত্র নাজহাচ্ছ্বা মহামুনিম্
117.9
ভক্তোঽনুরক্তঃ সততমুপবাসকৃশোঽবলঃ
ফলমূলোত্করাহারঃ শান্তঃ শিষ্টাকৃতির্যথা
117.10
তস্যর্ষেরুপবিষ্টস্য পাদমূলে মহামুনেঃ
মনুষ্যবদ্গতো ভাবঃ স্নেহবদ্ধোঽভবদ্ভৃশম্
117.11
ততোঽভ্যয়ান্মহাবীর্যো দ্বীপী ক্ষতজভোজনঃ
শ্বার্থমত্যন্তসংদুষ্টঃ ক্রূরঃ কাল ইবান্তকঃ
117.12
লেলিহ্যমানস্তৃষিতঃ পুচ্ছাস্ফোটনতত্পরঃ
ব্যাদিতাস্যঃ ক্ষুধাভগ্নঃ প্রার্থয়ানস্তদামিষম্
117.13
তং দৃষ্ট্বা ক্রূরমায়ান্তং জীবিতার্থী নরাধিপ
প্রোবাচ শ্বা মুনিং তত্র যত্তচ্ছৃণু মহামতে
117.14
শ্বশত্রুর্ভগবন্নত্র দ্বীপী মাং হন্তুমিচ্ছতি
ত্বত্প্রসাদাদ্ভয়ং ন স্যাত্তস্মান্মম মহামুনে
117.15
মুনিরুবাচ
ন ভয়ং দ্বীপিনঃ কার্যং মৃত্যুতস্তে কথংচন
এষ শ্বরূপরহিতো দ্বীপী ভবসি পুত্রক
117.16
ভীষ্ম উবাচ
ততঃ শ্বা দ্বীপিতাং নীতো জাম্বূনদনিভাকৃতিঃ
চিত্রাঙ্গো বিস্ফুরন্হৃষ্টো বনে বসতি নির্ভয়ঃ
117.17
ততোঽভ্যয়ান্মহারৌদ্রো ব্যাদিতাস্যঃ ক্ষুধান্বিতঃ
দ্বীপিনং লেলিহদ্বক্ত্রো ব্যাঘ্রো রুধিরলালসঃ
117.18
ব্যাঘ্রং দৃষ্ট্বা ক্ষুধাভগ্নং দংষ্ট্রিণং বনগোচরম্
দ্বীপী জীবিতরক্ষার্থমৃষিং শরণমেয়িবান্
117.19
ততঃ সংবাসজং স্নেহমৃষিণা কুর্বতা সদা
স দ্বীপী ব্যাঘ্রতাং নীতো রিপুভির্বলবত্তরঃ
ততো দৃষ্ট্বা স শার্দূলো নাভ্যহংস্তং বিশাং পতে
117.20
স তু শ্বা ব্যাঘ্রতাং প্রাপ্য বলবান্পিশিতাশনঃ
ন মূলফলভোগেষু স্পৃহামপ্যকরোত্তদা
117.21
যথা মৃগপতির্নিত্যং প্রকাঙ্ক্ষতি বনৌকসঃ
তথৈব স মহারাজ ব্যাঘ্রঃ সমভবত্তদা
117.22
ব্যাঘ্রস্তূটজমূলস্থস্তৃপ্তঃ সুপ্তো হতৈর্মৃগৈঃ
নাগশ্চাগাত্তমুদ্দেশং মত্তো মেঘ ইবোত্থিতঃ
117.23
প্রভিন্নকরটঃ প্রাংশুঃ পদ্মী বিততমস্তকঃ
সুবিষাণো মহাকায়ো মেঘগম্ভীরনিস্বনঃ
117.24
তং দৃষ্ট্বা কুঞ্জরং মত্তমায়ান্তং মদগর্বিতম্
ব্যাঘ্রো হস্তিভয়াত্ত্রস্তস্তমৃষিং শরণং যয়ৌ
117.25
ততোঽনয়ত্কুঞ্জরতাং তং ব্যাঘ্রমৃষিসত্তমঃ
মহামেঘোপমং দৃষ্ট্বা তং স ভীতোঽভবদ্গজঃ
117.26
ততঃ কমলষণ্ডানি শল্লকীগহনানি চ
ব্যচরত্স মুদা যুক্তঃ পদ্মরেণুবিভূষিতঃ
117.27
কদাচিদ্রমমাণস্য হস্তিনঃ সুমুখং তদা
ঋষেস্তস্যোটজস্থস্য কালোঽগচ্ছন্নিশানিশম্
117.28
অথাজগাম তং দেশং কেসরী কেসরারুণঃ
গিরিকন্দরজো ভীমঃ সিংহো নাগকুলান্তকঃ
117.29
তং দৃষ্ট্বা সিংহমায়ান্তং নাগঃ সিংহভয়াকুলঃ
ঋষিং শরণমাপেদে বেপমানো ভয়াতুরঃ
117.30
ততঃ স সিংহতাং নীতো নাগেন্দ্রো মুনিনা তদা
বন্যং নাগণয়ত্সিংহং তুল্যজাতিসমন্বয়াৎ
117.31
দৃষ্ট্বা চ সোঽনশত্সিংহো বন্যো ভীসন্নবাগ্বলঃ
স চাশ্রমেঽবসত্সিংহস্তস্মিন্নেব বনে সুখী
117.32
ন ত্বন্যে ক্ষুদ্রপশবস্তপোবননিবাসিনঃ
ব্যদৃশ্যন্ত ভয়ত্রস্তা জীবিতাকাঙ্ক্ষিণঃ সদা
117.33
কদাচিত্কালয়োগেন সর্বপ্রাণিবিহিংসকঃ
বলবান্ক্ষতজাহারো নানাসত্ত্বভয়ংকরঃ
117.34
অষ্টপাদূর্ধ্বচরণঃ শরভো বনগোচরঃ
তং সিংহং হন্তুমাগচ্ছন্মুনেস্তস্য নিবেশনম্
117.35
তং মুনিঃ শরভং চক্রে বলোত্কটমরিংদম
ততঃ স শরভো বন্যো মুনেঃ শরভমগ্রতঃ
দৃষ্ট্বা বলিনমত্যুগ্রং দ্রুতং সংপ্রাদ্রবদ্ভয়াৎ
117.36
স এবং শরভস্থানে ন্যস্তো বৈ মুনিনা তদা
মুনেঃ পার্শ্বগতো নিত্যং শারভ্যং সুখমাপ্তবান্
117.37
ততঃ শরভসংত্রস্তাঃ সর্বে মৃগগণা বনাৎ
দিশঃ সংপ্রাদ্রবন্রাজন্ভয়াজ্জীবিতকাঙ্ক্ষিণঃ
117.38
শরভোঽপ্যতিসংদুষ্টো নিত্যং প্রাণিবধে রতঃ
ফলমূলাশনং শান্তং নৈচ্ছত্স পিশিতাশনঃ
117.39
ততো রুধিরতর্ষেণ বলিনা শরভোঽন্বিতঃ
ইয়েষ তং মুনিং হন্তুমকৃতজ্ঞঃ শ্বয়োনিজঃ
117.40
ততস্তেন তপঃশক্ত্যা বিদিতো জ্ঞানচক্ষুষা
বিজ্ঞায় চ মহাপ্রাজ্ঞো মুনিঃ শ্বানং তমুক্তবান্
117.41
শ্বা ত্বং দ্বীপিত্বমাপন্নো দ্বীপী ব্যাঘ্রত্বমাগতঃ
ব্যাঘ্রো নাগো মদপটুর্নাগঃ সিংহত্বমাপ্তবান্
117.42
সিংহোঽতিবলসংয়ুক্তো ভূয়ঃ শরভতাং গতঃ
ময়া স্নেহপরীতেন ন বিমৃষ্টঃ কুলান্বয়ঃ
117.43
যস্মাদেবমপাপং মাং পাপ হিংসিতুমিচ্ছসি
তস্মাত্স্বয়োনিমাপন্নঃ শ্বৈব ত্বং হি ভবিষ্যসি
117.44
ততো মুনিজনদ্বেষাদ্দুষ্টাত্মা শ্বাকৃতোঽবুধঃ
ঋষিণা শরভঃ শপ্তঃ স্বং রূপং পুনরাপ্তবান্