অধ্যায় 116

116.1

যুধিষ্ঠির উবাচ
পিতামহ মহাপ্রাজ্ঞ সংশয়ো মে মহানয়ম্
স চ্ছেত্তব্যস্ত্বয়া রাজন্ভবান্কুলকরো হি নঃ

পুরুষাণাময়ং তাত দুর্বৃত্তানাং দুরাত্মনাম্
কথিতো বাক্যসংচারস্ততো বিজ্ঞাপয়ামি তে

যদ্ধিতং রাজ্যতন্ত্রস্য কুলস্য চ সুখোদয়ম্
আয়ত্যাং চ তদাত্বে চ ক্ষেমবৃদ্ধিকরং চ যৎ

পুত্রপৌত্রাভিরামং চ রাষ্ট্রবৃদ্ধিকরং চ যৎ
অন্নপানে শরীরে চ হিতং যত্তদ্ব্রবীহি মে

অভিষিক্তো হি যো রাজা রাজ্যস্থো মিত্রসংবৃতঃ
অসুহৃত্সমুপেতো বা স কথং রঞ্জয়েত্প্রজাঃ

যো হ্যসত্প্রগ্রহরতিঃ স্নেহরাগবলাত্কৃতঃ
ইন্দ্রিয়াণামনীশত্বাদসজ্জনবুভূষকঃ

তস্য ভৃত্যা বিগুণতাং যান্তি সর্বে কুলোদ্গতাঃ
ন চ ভৃত্যফলৈরর্থৈঃ স রাজা সংপ্রয়ুজ্যতে

এতান্মে সংশয়স্থস্য রাজধর্মান্সুদুর্লভান্
বৃহস্পতিসমো বুদ্ধ্যা ভবাঞ্শংসিতুমর্হতি

শংসিতা পুরুষব্যাঘ্র ত্বং নঃ কুলহিতে রতঃ
ক্ষত্তা চৈব পটুপ্রজ্ঞো যো নঃ শংসতি সর্বদা

ত্বত্তঃ কুলহিতং বাক্যং শ্রুত্বা রাজ্যহিতোদয়ম্
অমৃতস্যাব্যয়স্যেব তৃপ্তঃ স্বপ্স্যাম্যহং সুখম্

কীদৃষাঃ সংনিকর্ষস্থা ভৃত্যাঃ স্যুর্বা গুণান্বিতাঃ
কীদৃশৈঃ কিংকুলীনৈর্বা সহ যাত্রা বিধীয়তে

ন হ্যেকো ভৃত্যরহিতো রাজা ভবতি রক্ষিতা
রাজ্যং চেদং জনঃ সর্বস্তত্কুলীনোঽভিশংসতি

ন হি প্রশাস্তুং রাজ্যং হি শক্যমেকেন ভারত
অসহায়বতা তাত নৈবার্থাঃ কেচিদপ্যুত
লব্ধুং লব্ধ্বা চাপি সদা রক্ষিতুং ভরতর্ষভ

ভীষ্ম উবাচ
যস্য ভৃত্যজনঃ সর্বো জ্ঞানবিজ্ঞানকোবিদঃ
হিতৈষী কুলজঃ স্নিগ্ধঃ স রাজ্যফলমশ্নুতে

মন্ত্রিণো যস্য কুলজা অসংহার্যাঃ সহোষিতাঃ
নৃপতের্মতিদাঃ সন্তি সংবন্ধজ্ঞানকোবিদাঃ

অনাগতবিধাতারঃ কালজ্ঞানবিশারদাঃ
অতিক্রান্তমশোচন্তঃ স রাজ্যফলমশ্নুতে

সমদুঃখসুখা যস্য সহায়াঃ সত্যকারিণঃ
অর্থচিন্তাপরা যস্য স রাজ্যফলমশ্নুতে

যস্য নার্তো জনপদঃ সংনিকর্ষগতঃ সদা
অক্ষুদ্রঃ সত্পথালম্বী স রাজ্যফলভাগ্ভবেৎ

কোশাক্ষপটলং যস্য কোশবৃদ্ধিকরৈর্জনৈঃ
আপ্তৈস্তুষ্টৈশ্চ সততং ধার্যতে স নৃপোত্তমঃ

কোষ্ঠাগারমসংহার্যৈরাপ্তৈঃ সংচয়তত্পরৈঃ
পাত্রভূতৈরলুব্ধৈশ্চ পাল্যমানং গুণীভবেৎ

ব্যবহারশ্চ নগরে যস্য কর্মফলোদয়ঃ
দৃশ্যতে শঙ্খলিখিতঃ স ধর্মফলভাগ্ভবেৎ

সংগৃহীতমনুষ্যশ্চ যো রাজা রাজধর্মবিৎ
ষড্বর্গং প্রতিগৃহ্ণন্স ধর্মাত্ফলমুপাশ্নুতে