অধ্যায় 115

115.1

যুধিষ্ঠির উবাচ
বিদ্বান্মূর্খপ্রগল্ভেন মৃদুস্তীক্ষ্ণেন ভারত
আক্রুশ্যমানঃ সদসি কথং কুর্যাদরিংদম

ভীষ্ম উবাচ
শ্রূয়তাং পৃথিবীপাল যথৈষোঽর্থোঽনুগীয়তে
সদা সুচেতাঃ সহতে নরস্যেহাল্পচেতসঃ

অরুষ্যন্ক্রুশ্যমানস্য সুকৃতং নাম বিন্দতি
দুষ্কৃতং চাত্মনো মর্ষী রুষ্যত্যেবাপমার্ষ্টি বৈ

টিট্টিভং তমুপেক্ষেত বাশমানমিবাতুরম্
লোকবিদ্বেষমাপন্নো নিষ্ফলং প্রতিপদ্যতে

ইতি স শ্লাঘতে নিত্যং তেন পাপেন কর্মণা
ইদমুক্তো ময়া কশ্চিত্সংমতো জনসংসদি
স তত্র ব্রীডিতঃ শুষ্কো মৃতকল্পোঽবতিষ্ঠতি

শ্লাঘন্নশ্লাঘনীয়েন কর্মণা নিরপত্রপঃ
উপেক্ষিতব্যো দান্তেন তাদৃশঃ পুরুষাধমঃ

যদ্যদ্ব্রূয়াদল্পমতিস্তত্তদস্য সহেত্সদা
প্রাকৃতো হি প্রশংসন্বা নিন্দন্বা কিং করিষ্যতি
বনে কাক ইবাবুদ্ধির্বাশমানো নিরর্থকম্

যদি বাগ্ভিঃ প্রয়োগঃ স্যাত্প্রয়োগে পাপকর্মণঃ
বাগেবার্থো ভবেত্তস্য ন হ্যেবার্থো জিঘাংসতঃ

নিষেকং বিপরীতং স আচষ্টে বৃত্তচেষ্টয়া
ময়ূর ইব কৌপীনং নৃত্যন্সংদর্শয়ন্নিব

যস্যাবাচ্যং ন লোকেঽস্তি নাকার্যং বাপি কিংচন
বাচং তেন ন সংদধ্যাচ্ছুচিঃ সংক্লিষ্টকর্মণা

প্রত্যক্ষং গুণবাদী যঃ পরোক্ষং তু বিনিন্দকঃ
স মানবঃ শ্ববল্লোকে নষ্টলোকপরায়ণঃ

তাদৃগ্জনশতস্যাপি যদ্দদাতি জুহোতি চ
পরোক্ষেণাপবাদেন তন্নাশয়তি স ক্ষণাৎ

তস্মাত্প্রাজ্ঞো নরঃ সদ্যস্তাদৃশং পাপচেতসম্
বর্জয়েত্সাধুভির্বর্জ্যং সারমেয়ামিষং যথা

পরিবাদং ব্রুবাণো হি দুরাত্মা বৈ মহাত্মনে
প্রকাশয়তি দোষান্স্বান্সর্পঃ ফণমিবোচ্ছ্রিতম্

তং স্বকর্মাণি কুর্বাণং প্রতিকর্তুং য ইচ্ছতি
ভস্মকূট ইবাবুদ্ধিঃ খরো রজসি মজ্জতি

মনুষ্যশালাবৃকমপ্রশান্তং; জনাপবাদে সততং নিবিষ্টম্
মাতঙ্গমুন্মত্তমিবোন্নদন্তং; ত্যজেত তং শ্বানমিবাতিরৌদ্রম্

অধীরজুষ্টে পথি বর্তমানং; দমাদপেতং বিনয়াচ্চ পাপম্
অরিব্রতং নিত্যমভূতিকামং; ধিগস্তু তং পাপমতিং মনুষ্যম্

প্রত্যুচ্যমানস্তু হি ভূয় এভি;র্নিশাম্য মা ভূস্ত্বমথার্তরূপঃ
উচ্চস্য নীচেন হি সংপ্রয়োগং; বিগর্হয়ন্তি স্থিরবুদ্ধয়ো যে

ক্রুদ্ধো দশার্ধেন হি তাডয়েদ্বা; স পাংসুভির্বাপকিরেত্তুষৈর্বা
বিবৃত্য দন্তাংশ্চ বিভীষয়েদ্বা; সিদ্ধং হি মূর্খে কুপিতে নৃশংসে

বিগর্হণাং পরমদুরাত্মনা কৃতাং; সহেত যঃ সংসদি দুর্জনান্নরঃ
পঠেদিদং চাপি নিদর্শনং সদা; ন বাঙ্ময়ং স লভতি কিংচিদপ্রিয়ম্