অধ্যায় 114

114.1

যুধিষ্ঠির উবাচ
রাজা রাজ্যমনুপ্রাপ্য দুর্বলো ভরতর্ষভ
অমিত্রস্যাতিবৃদ্ধস্য কথং তিষ্ঠেদসাধনঃ

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
সরিতাং চৈব সংবাদং সাগরস্য চ ভারত

সুরারিনিলয়ঃ শশ্বত্সাগরঃ সরিতাং পতিঃ
পপ্রচ্ছ সরিতঃ সর্বাঃ সংশয়ং জাতমাত্মনঃ

সমূলশাখান্পশ্যামি নিহতাংশ্ছায়িনো দ্রুমান্
যুষ্মাভিরিহ পূর্ণাভিরন্যাংস্তত্র ন বেতসম্

অকায়শ্চাল্পসারশ্চ বেতসঃ কূলজশ্চ বঃ
অবজ্ঞায় নশক্যো বা কিংচিদ্বা তেন বঃ কৃতম্

তদহং শ্রোতুমিচ্ছামি সর্বাসামেব বো মতম্
যথা কূলানি চেমানি ভিত্ত্বা নানীয়তে বশম্

ততঃ প্রাহ নদী গঙ্গা বাক্যমুত্তরমর্থবৎ
হেতুমদ্গ্রাহকং চৈব সাগরং সরিতাং পতিম্

তিষ্ঠন্ত্যেতে যথাস্থানং নগা হ্যেকনিকেতনাঃ
ততস্ত্যজন্তি তত্স্থানং প্রাতিলোম্যাদচেতসঃ

বেতসো বেগমায়ান্তং দৃষ্ট্বা নমতি নেতরঃ
স চ বেগেঽভ্যতিক্রান্তে স্থানমাসাদ্য তিষ্ঠতি

কালজ্ঞঃ সময়জ্ঞশ্চ সদা বশ্যশ্চ নোদ্রুমঃ
অনুলোমস্তথাস্তব্ধস্তেন নাভ্যেতি বেতসঃ

মারুতোদকবেগেন যে নমন্ত্যুন্নমন্তি চ
ওষধ্যঃ পাদপা গুল্মা ন তে যান্তি পরাভবম্

যো হি শত্রোর্বিবৃদ্ধস্য প্রভোর্বধবিনাশনে
পূর্বং ন সহতে বেগং ক্ষিপ্রমেব স নশ্যতি

সারাসারং বলং বীর্যমাত্মনো দ্বিষতশ্চ যঃ
জানন্বিচরতি প্রাজ্ঞো ন স যাতি পরাভবম্

এবমেব যদা বিদ্বান্মন্যেতাতিবলং রিপুম্
সংশ্রয়েদ্বৈতসীং বৃত্তিমেবং প্রজ্ঞানলক্ষণম্