অধ্যায় 113

113.1

যুধিষ্ঠির উবাচ
কিং পার্থিবেন কর্তব্যং কিং চ কৃত্বা সুখী ভবেৎ
তন্মমাচক্ষ্ব তত্ত্বেন সর্বং ধর্মভৃতাং বর

ভীষ্ম উবাচ
হন্ত তেঽহং প্রবক্ষ্যামি শৃণু কার্যৈকনিশ্চয়ম্
যথা রাজ্ঞেহ কর্তব্যং যচ্চ কৃত্বা সুখী ভবেৎ

ন ত্বেবং বর্তিতব্যং স্ম যথেদমনুশুশ্রুমঃ
উষ্ট্রস্য সুমহদ্বৃত্তং তন্নিবোধ যুধিষ্ঠির

জাতিস্মরো মহানুষ্ট্রঃ প্রাজাপত্যয়ুগোদ্ভবঃ
তপঃ সুমহদাতিষ্ঠদরণ্যে সংশিতব্রতঃ

তপসস্তস্য চান্তে বৈ প্রীতিমানভবত্প্রভুঃ
বরেণ ছন্দয়ামাস ততশ্চৈনং পিতামহঃ

উষ্ট্র উবাচ
ভগবংস্ত্বত্প্রসাদান্মে দীর্ঘা গ্রীবা ভবেদিয়ম্
যোজনানাং শতং সাগ্রং যা গচ্ছেচ্চরিতুং বিভো

ভীষ্ম উবাচ
এবমস্ত্বিতি চোক্তঃ স বরদেন মহাত্মনা
প্রতিলভ্য বরং শ্রেষ্ঠং যয়াবুষ্ট্রঃ স্বকং বনম্

স চকার তদালস্যং বরদানাত্স দুর্মতিঃ
ন চৈচ্ছচ্চরিতুং গন্তুং দুরাত্মা কালমোহিতঃ

স কদাচিত্প্রসার্যৈবং তাং গ্রীবাং শতয়োজনাম্
চচারাশ্রান্তহৃদয়ো বাতশ্চাগাত্ততো মহান্

স গুহায়াং শিরোগ্রীবং নিধায় পশুরাত্মনঃ
আস্তাথ বর্ষমভ্যাগাত্সুমহত্প্লাবয়জ্জগৎ

অথ শীতপরীতাঙ্গো জম্বুকঃ ক্ষুচ্ছ্রমান্বিতঃ
সদারস্তাং গুহামাশু প্রবিবেশ জলার্দিতঃ

স দৃষ্ট্বা মাংসজীবী তু সুভৃশং ক্ষুচ্ছ্রমান্বিতঃ
অভক্ষয়ত্ততো গ্রীবামুষ্ট্রস্য ভরতর্ষভ

যদা ত্ববুধ্যতাত্মানং ভক্ষ্যমাণং স বৈ পশুঃ
তদা সংকোচনে যত্নমকরোদ্ভৃশদুঃখিতঃ

যাবদূর্ধ্বমধশ্চৈব গ্রীবাং সংক্ষিপতে পশুঃ
তাবত্তেন সদারেণ জম্বুকেন স ভক্ষিতঃ

স হত্বা ভক্ষয়িত্বা চ জম্বুকোষ্ট্রং ততস্তদা
বিগতে বাতবর্ষে চ নিশ্চক্রাম গুহামুখাৎ

এবং দুর্বুদ্ধিনা প্রাপ্তমুষ্ট্রেণ নিধনং তদা
আলস্যস্য ক্রমাত্পশ্য মহদ্দোষমুপাগতম্

ত্বমপ্যেতং বিধিং ত্যক্ত্বা যোগেন নিয়তেন্দ্রিয়ঃ
বর্তস্ব বুদ্ধিমূলং হি বিজয়ং মনুরব্রবীৎ

বুদ্ধিশ্রেষ্ঠানি কর্মাণি বাহুমধ্যানি ভারত
তানি জঙ্ঘাজঘন্যানি ভারপ্রত্যবরাণি চ

রাজ্যং তিষ্ঠতি দক্ষস্য সংগৃহীতেন্দ্রিয়স্য চ
গুপ্তমন্ত্রশ্রুতবতঃ সুসহায়স্য চানঘ

পরীক্ষ্যকারিণোঽর্থাশ্চ তিষ্ঠন্তীহ যুধিষ্ঠির
সহায়য়ুক্তেন মহী কৃত্স্না শক্যা প্রশাসিতুম্

ইদং হি সদ্ভিঃ কথিতং বিধিজ্ঞৈঃ; পুরা মহেন্দ্রপ্রতিমপ্রভাব
ময়াপি চোক্তং তব শাস্ত্রদৃষ্ট্যা; ত্বমত্র যুক্তঃ প্রচরস্ব রাজন্