Utshovঅধ্যায় 112
112.1
যুধিষ্ঠির উবাচ
অসৌম্যাঃ সৌম্যরূপেণ সৌম্যাশ্চাসৌম্যদর্শিনঃ
ঈদৃশান্পুরুষাংস্তাত কথং বিদ্যামহে বয়ম্
112.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
ব্যাঘ্রগোমায়ুসংবাদং তং নিবোধ যুধিষ্ঠির
112.3
পুরিকায়াং পুরি পুরা শ্রীমত্যাং পৌরিকো নৃপঃ
পরহিংসারুচিঃ ক্রূরো বভূব পুরুষাধমঃ
112.4
স ত্বায়ুষি পরিক্ষীণে জগামানীপ্সিতাং গতিম্
গোমায়ুত্বং চ সংপ্রাপ্তো দূষিতঃ পূর্বকর্মণা
112.5
সংস্মৃত্য পূর্বজাতিং স নির্বেদং পরমং গতঃ
ন ভক্ষয়তি মাংসানি পরৈরুপহৃতান্যপি
112.6
অহিংস্রঃ সর্বভূতেষু সত্যবাক্সুদৃঢব্রতঃ
চকার চ যথাকামমাহারং পতিতৈঃ ফলৈঃ
112.7
শ্মশানে তস্য চাবাসো গোমায়োঃ সংমতোঽভবৎ
জন্মভূম্যনুরোধাচ্চ নান্যদ্বাসমরোচয়ৎ
112.8
তস্য শৌচমমৃষ্যন্তঃ সর্বে তে সহজাতয়ঃ
চালয়ন্তি স্ম তাং বুদ্ধিং বচনৈঃ প্রশ্রয়োত্তরৈঃ
112.9
বসন্পিতৃবনে রৌদ্রে শৌচং লপ্সিতুমিচ্ছসি
ইয়ং বিপ্রতিপত্তিস্তে যদা ত্বং পিশিতাশনঃ
112.10
তত্সমো বা ভবাস্মাভির্ভক্ষ্যান্দাস্যামহে বয়ম্
ভুঙ্ক্ষ্ব শৌচং পরিত্যজ্য যদ্ধি ভুক্তং তদস্তি তে
112.11
ইতি তেষাং বচঃ শ্রুত্বা প্রত্যুবাচ সমাহিতঃ
মধুরৈঃ প্রশ্রিতৈর্বাক্যৈর্হেতুমদ্ভিরনিষ্ঠুরৈঃ
112.12
অপ্রমাণং প্রসূতির্মে শীলতঃ ক্রিয়তে কুলম্
প্রার্থয়িষ্যে তু তত্কর্ম যেন বিস্তীর্যতে যশঃ
112.13
শ্মশানে যদি বাসো মে সমাধির্মে নিশাম্যতাম্
আত্মা ফলতি কর্মাণি নাশ্রমো ধর্মলক্ষণম্
112.14
আশ্রমে যো দ্বিজং হন্যাদ্গাং বা দদ্যাদনাশ্রমে
কিং নু তত্পাতকং ন স্যাত্তদ্বা দত্তং বৃথা ভবেৎ
112.15
ভবন্তঃ সর্বলোভেন কেবলং ভক্ষণে রতাঃ
অনুবন্ধে তু যে দোষাস্তান্ন পশ্যন্তি মোহিতাঃ
112.16
অপ্রত্যয়কৃতাং গর্হ্যামর্থাপনয়দূষিতাম্
ইহ চামুত্র চানিষ্টাং তস্মাদ্বৃত্তিং ন রোচয়ে
112.17
তং শুচিং পণ্ডিতং মত্বা শার্দূলঃ খ্যাতবিক্রমঃ
কৃত্বাত্মসদৃশাং পূজাং সাচিব্যেঽবর্ধয়ত্স্বয়ম্
112.18
সৌম্য বিজ্ঞাতরূপস্ত্বং গচ্ছ যাত্রাং ময়া সহ
ব্রিয়ন্তামীপ্সিতা ভোগাঃ পরিহার্যাশ্চ পুষ্কলাঃ
112.19
তীক্ষ্ণা বয়মিতি খ্যাতা ভবতো জ্ঞাপয়ামহে
মৃদুপূর্বং ঘাতিনস্তে শ্রেয়শ্চাধিগমিষ্যতি
112.20
অথ সংপূজ্য তদ্বাক্যং মৃগেন্দ্রস্য মহাত্মনঃ
গোমায়ুঃ প্রশ্রিতং বাক্যং বভাষে কিংচিদানতঃ
112.21
সদৃশং মৃগরাজৈতত্তব বাক্যং মদন্তরে
যত্সহায়ান্মৃগয়সে ধর্মার্থকুশলাঞ্শুচীন্
112.22
ন শক্যমনমাত্যেন মহত্ত্বমনুশাসিতুম্
দুষ্টামাত্যেন বা বীর শরীরপরিপন্থিনা
112.23
সহায়াননুরক্তাংস্তু যতেতানুপসংহিতান্
পরস্পরমসংঘুষ্টান্বিজিগীষূনলোলুপান্
112.24
তানতীতোপধান্প্রাজ্ঞান্হিতে যুক্তান্মনস্বিনঃ
পূজয়েথা মহাভাগান্যথাচার্যান্যথা পিতৄন্
112.25
ন ত্বেবং মম সংতোষাদ্রোচতেঽন্যন্মৃগাধিপ
ন কাময়ে সুখান্ভোগানৈশ্বর্যং বা ত্বদাশ্রয়ম্
112.26
ন যোক্ষ্যতি হি মে শীলং তব ভৃত্যৈঃ পুরাতনৈঃ
তে ত্বাং বিভেদয়িষ্যন্তি দুঃখশীলা মদন্তরে
112.27
সংশ্রয়ঃ শ্লাঘনীয়স্ত্বমন্যেষামপি ভাস্বতাম্
কৃতাত্মা সুমহাভাগঃ পাপকেষ্বপ্যদারুণঃ
112.28
দীর্ঘদর্শী মহোত্সাহঃ স্থূললক্ষ্যো মহাবলঃ
কৃতী চামোঘকর্তাসি ভাব্যৈশ্চ সমলংকৃতঃ
112.29
কিং তু স্বেনাস্মি সংতুষ্টো দুঃখা বৃত্তিরনুষ্ঠিতা
সেবায়াশ্চাপি নাভিজ্ঞঃ স্বচ্ছন্দেন বনেচরঃ
112.30
রাজোপক্রোশদোষাশ্চ সর্বে সংশ্রয়বাসিনাম্
বনচর্যা চ নিঃসঙ্গা নির্ভয়া নিরবগ্রহা
112.31
নৃপেণাহূয়মানস্য যত্তিষ্ঠতি ভয়ং হৃদি
ন তত্তিষ্ঠতি তুষ্টানাং বনে মূলফলাশিনাম্
112.32
পানীয়ং বা নিরায়াসং স্বাদ্বন্নং বা ভয়োত্তরম্
বিচার্য খলু পশ্যামি তত্সুখং যত্র নির্বৃতিঃ
112.33
অপরাধৈর্ন তাবন্তো ভৃত্যাঃ শিষ্টা নরাধিপৈঃ
উপঘাতৈর্যথা ভৃত্যা দূষিতা নিধনং গতাঃ
112.34
যদি ত্বেতন্ময়া কার্যং মৃগেন্দ্রো যদি মন্যতে
সময়ং কৃতমিচ্ছামি বর্তিতব্যং যথা ময়ি
112.35
মদীয়া মাননীয়াস্তে শ্রোতব্যং চ হিতং বচঃ
কল্পিতা যা চ তে বৃত্তিঃ সা ভবেত্তব সুস্থিরা
112.36
ন মন্ত্রয়েয়মন্যৈস্তে সচিবৈঃ সহ কর্হিচিৎ
নীতিমন্তঃ পরীপ্সন্তো বৃথা ব্রূয়ুঃ পরে ময়ি
112.37
এক একেন সংগম্য রহো ব্রূয়াং হিতং তব
ন চ তে জ্ঞাতিকার্যেষু প্রষ্টব্যোঽহং হিতাহিতে
112.38
ময়া সংমন্ত্র্য পশ্চাচ্চ ন হিংস্যাঃ সচিবাস্ত্বয়া
মদীয়ানাং চ কুপিতো মা ত্বং দণ্ডং নিপাতয়েঃ
112.39
এবমস্ত্বিতি তেনাসৌ মৃগেন্দ্রেণাভিপূজিতঃ
প্রাপ্তবান্মতিসাচিব্যং গোমায়ুর্ব্যাঘ্রয়োনিতঃ
112.40
তং তথা সত্কৃতং দৃষ্ট্বা যুজ্যমানং চ কর্মণি
প্রাদ্বিষন্কৃতসংঘাতাঃ পূর্বভৃত্যা মুহুর্মুহুঃ
112.41
মিত্রবুদ্ধ্যা চ গোমায়ুং সান্ত্বয়িত্বা প্রবেশ্য চ
দোষেষু সমতাং নেতুমৈচ্ছন্নশুভবুদ্ধয়ঃ
112.42
অন্যথা হ্যুচিতাঃ পূর্বং পরদ্রব্যাপহারিণঃ
অশক্তাঃ কিংচিদাদাতুং দ্রব্যং গোমায়ুয়ন্ত্রিতাঃ
112.43
ব্যুত্থানং চাত্র কাঙ্ক্ষদ্ভিঃ কথাভিঃ প্রবিলোভ্যতে
ধনেন মহতা চৈব বুদ্ধিরস্য বিলোভ্যতে
112.44
ন চাপি স মহাপ্রাজ্ঞস্তস্মাদ্ধৈর্যাচ্চচাল হ
অথাস্য সময়ং কৃত্বা বিনাশায় স্থিতাঃ পরে
112.45
ঈপ্সিতং চ মৃগেন্দ্রস্য মাংসং যত্তত্র সংস্কৃতম্
অপনীয় স্বয়ং তদ্ধি তৈর্ন্যস্তং তস্য বেশ্মনি
112.46
যদর্থং চাপ্যপহৃতং যেন যচ্চৈব মন্ত্রিতম্
তস্য তদ্বিদিতং সর্বং কারণার্থং চ মর্ষিতম্
112.47
সময়োঽয়ং কৃতস্তেন সাচিব্যমুপগচ্ছতা
নোপঘাতস্ত্বয়া গ্রাহ্যো রাজন্মৈত্রীমিহেচ্ছতা
112.48
ভোজনে চোপহর্তব্যে তন্মাংসং ন স্ম দৃশ্যতে
মৃগরাজেন চাজ্ঞপ্তং মৃগ্যতাং চোর ইত্যুত
112.49
কৃতকৈশ্চাপি তন্মাংসং মৃগেন্দ্রায়োপবর্ণিতম্
সচিবেনোপনীতং তে বিদুষা প্রাজ্ঞমানিনা
112.50
সরোষস্ত্বথ শার্দূলঃ শ্রুত্বা গোমায়ুচাপলম্
বভূবামর্ষিতো রাজা বধং চাস্যাভ্যরোচয়ৎ
112.51
ছিদ্রং তু তস্য তদ্দৃষ্ট্বা প্রোচুস্তে পূর্বমন্ত্রিণঃ
সর্বেষামেব সোঽস্মাকং বৃত্তিভঙ্গেষু বর্ততে
112.52
ইদং চাস্যেদৃশং কর্ম বাল্লভ্যেন তু রক্ষ্যতে
শ্রুতশ্চ স্বামিনা পূর্বং যাদৃশো নৈষ তাদৃশঃ
112.53
বাঙ্মাত্রেণৈব ধর্মিষ্ঠঃ স্বভাবেন তু দারুণঃ
ধর্মচ্ছদ্মা হ্যয়ং পাপো বৃথাচারপরিগ্রহঃ
কার্যার্থং ভোজনার্থেষু ব্রতেষু কৃতবাঞ্শ্রমম্
112.54
মাংসাপনয়নং জ্ঞাত্বা ব্যাঘ্রস্তেষাং তু তদ্বচঃ
আজ্ঞাপয়ামাস তদা গোমায়ুর্বধ্যতামিতি
112.55
শার্দূলবচনং শ্রুত্বা শার্দূলজননী ততঃ
মৃগরাজং হিতৈর্বাক্যৈঃ সংবোধয়িতুমাগমৎ
112.56
পুত্র নৈতত্ত্বয়া গ্রাহ্যং কপটারম্ভসংবৃতম্
কর্মসংঘর্ষজৈর্দোষৈর্দুষ্যত্যশুচিভিঃ শুচিঃ
112.57
নোচ্ছ্রিতং সহতে কশ্চিত্প্রক্রিয়া বৈরকারিকা
শুচেরপি হি যুক্তস্য দোষ এব নিপাত্যতে
112.58
লুব্ধানাং শুচয়ো দ্বেষ্যাঃ কাতরাণাং তরস্বিনঃ
মূর্খাণাং পণ্ডিতা দ্বেষ্যা দরিদ্রাণাং মহাধনাঃ
অধার্মিকাণাং ধর্মিষ্ঠা বিরূপাণাং সুরূপকাঃ
112.59
বহবঃ পণ্ডিতা লুব্ধাঃ সর্বে মায়োপজীবিনঃ
কুর্যুর্দোষমদোষস্য বৃহস্পতিমতেরপি
112.60
শূন্যাত্তচ্চ গৃহান্মাংসং যদদ্যাপহৃতং তব
নেচ্ছতে দীয়মানং চ সাধু তাবদ্বিমৃশ্যতাম্
112.61
অসত্যাঃ সত্যসংকাশাঃ সত্যাশ্চাসত্যদর্শিনঃ
দৃশ্যন্তে বিবিধা ভাবাস্তেষু যুক্তং পরীক্ষণম্
112.62
তলবদ্দৃশ্যতে ব্যোম খদ্যোতো হব্যবাডিব
ন চৈবাস্তি তলং ব্যোম্নি ন খদ্যোতে হুতাশনঃ
112.63
তস্মাত্প্রত্যক্ষদৃষ্টোঽপি যুক্তমর্থঃ পরীক্ষিতুম্
পরীক্ষ্য জ্ঞাপয়ন্হ্যর্থান্ন পশ্চাত্পরিতপ্যতে
112.64
ন দুষ্করমিদং পুত্র যত্প্রভুর্ঘাতয়েত্পরম্
শ্লাঘনীয়া চ বর্যা চ লোকে প্রভবতাং ক্ষমা
112.65
স্থাপিতোঽয়ং পুত্র ত্বয়া সামন্তেষ্বধি বিশ্রুতঃ
দুঃখেনাসাদ্যতে পাত্রং ধার্যতামেষ তে সুহৃৎ
112.66
দূষিতং পরদোষৈর্হি গৃহ্ণীতে যোঽন্যথা শুচিম্
স্বয়ং সংদূষিতামাত্যঃ ক্ষিপ্রমেব বিনশ্যতি
112.67
তস্মাদথারিসংঘাতাদ্গোমায়োঃ কশ্চিদাগতঃ
ধর্মাত্মা তেন চাখ্যাতং যথৈতত্কপটং কৃতম্
112.68
ততো বিজ্ঞাতচারিত্রঃ সত্কৃত্য স বিমোক্ষিতঃ
পরিষ্বক্তশ্চ সস্নেহং মৃগেন্দ্রেণ পুনঃ পুনঃ
112.69
অনুজ্ঞাপ্য মৃগেন্দ্রং তু গোমায়ুর্নীতিশাস্ত্রবিৎ
তেনামর্ষেণ সংতপ্তঃ প্রায়মাসিতুমৈচ্ছত
112.70
শার্দূলস্তত্র গোমায়ুং স্নেহাত্প্রস্রুতলোচনঃ
অবারয়ত্স ধর্মিষ্ঠং পূজয়া প্রতিপূজয়ন্
112.71
তং স গোমায়ুরালোক্য স্নেহাদাগতসংভ্রমম্
বভাষে প্রণতো বাক্যং বাষ্পগদ্গদয়া গিরা
112.72
পূজিতোঽহং ত্বয়া পূর্বং পশ্চাচ্চৈব বিমানিতঃ
পরেষামাস্পদং নীতো বস্তুং নার্হাম্যহং ত্বয়ি
112.73
স্বসংতুষ্টাশ্চ্যুতাঃ স্থানান্মানাত্প্রত্যবরোপিতাঃ
স্বয়ং চোপহৃতা ভৃত্যা যে চাপ্যুপহৃতাঃ পরৈঃ
112.74
পরিক্ষীণাশ্চ লুব্ধাশ্চ ক্রূরাঃ কারাভিতাপিতাঃ
হৃতস্বা মানিনো যে চ ত্যক্তোপাত্তা মহেপ্সবঃ
112.75
সংতাপিতাশ্চ যে কেচিদ্ব্যসনৌঘপ্রতীক্ষিণঃ
অন্তর্হিতাঃ সোপহিতাঃ সর্বে তে পরসাধনাঃ
112.76
অবমানেন যুক্তস্য স্থাপিতস্য চ মে পুনঃ
কথং যাস্যসি বিশ্বাসমহমেষ্যামি বা পুনঃ
112.77
সমর্থ ইতি সংগৃহ্য স্থাপয়িত্বা পরীক্ষ্য চ
কৃতং চ সময়ং ভিত্ত্বা ত্বয়াহমবমানিতঃ
112.78
প্রথমং যঃ সমাখ্যাতঃ শীলবানিতি সংসদি
ন বাচ্যং তস্য বৈগুণ্যং প্রতিজ্ঞাং পরিরক্ষতা
112.79
এবং চাবমতস্যেহ বিশ্বাসং কিং প্রয়াস্যসি
ত্বয়ি চৈব হ্যবিশ্বাসে মমোদ্বেগো ভবিষ্যতি
112.80
শঙ্কিতস্ত্বমহং ভীতঃ পরে ছিদ্রানুদর্শিনঃ
অস্নিগ্ধাশ্চৈব দুস্তোষাঃ কর্ম চৈতদ্বহুচ্ছলম্
112.81
দুঃখেন শ্লেষ্যতে ভিন্নং শ্লিষ্টং দুঃখেন ভিদ্যতে
ভিন্নশ্লিষ্টা তু যা প্রীতির্ন সা স্নেহেন বর্ততে
112.82
কশ্চিদেব হি ভীতস্তু দৃশ্যতে ন পরাত্মনোঃ
কার্যাপেক্ষা হি বর্তন্তে ভাবাঃ স্নিগ্ধাস্তু দুর্লভাঃ
112.83
সুদুঃখং পুরুষজ্ঞানং চিত্তং হ্যেষাং চলাচলম্
সমর্থো বাপ্যশক্তো বা শতেষ্বেকোঽধিগম্যতে
112.84
অকস্মাত্প্রক্রিয়া নৄণামকস্মাচ্চাপকর্ষণম্
শুভাশুভে মহত্ত্বং চ প্রকর্তুং বুদ্ধিলাঘবাৎ
112.85
এবং বহুবিধং সান্ত্বমুক্ত্বা ধর্মার্থহেতুমৎ
প্রসাদয়িত্বা রাজানং গোমায়ুর্বনমভ্যগাৎ
112.86
অগৃহ্যানুনয়ং তস্য মৃগেন্দ্রস্য স বুদ্ধিমান্
গোমায়ুঃ প্রায়মাসীনস্ত্যক্ত্বা দেহং দিবং যয়ৌ