UtshovChapter 112
112.1
युधिष्ठिर उवाच
असौम्याः सौम्यरूपेण सौम्याश्चासौम्यदर्शिनः
ईदृशान्पुरुषांस्तात कथं विद्यामहे वयम्
Yudhishthira uvacha
Asaumyah saumyarupena saumyashchasaumyadarshinah
Idrishanpurushanstata katham vidyamahe vayam
112.2
भीष्म उवाच
अत्राप्युदाहरन्तीममितिहासं पुरातनम्
व्याघ्रगोमायुसंवादं तं निबोध युधिष्ठिर
Bhishma uvacha
Atrapyudaharantimamitihasam puratanam
Vyaghragomayusanvadam tam nibodha yudhishthira
112.3
पुरिकायां पुरि पुरा श्रीमत्यां पौरिको नृपः
परहिंसारुचिः क्रूरो बभूव पुरुषाधमः
Purikayam puri pura shrimatyam pauriko nripah
Parahinsaruchih kruro babhuva purushadhamah
112.4
स त्वायुषि परिक्षीणे जगामानीप्सितां गतिम्
गोमायुत्वं च संप्राप्तो दूषितः पूर्वकर्मणा
Sa tvayushi parikshine jagamanipsitam gatim
Gomayutvam cha samprapto dushitah purvakarmana
112.5
संस्मृत्य पूर्वजातिं स निर्वेदं परमं गतः
न भक्षयति मांसानि परैरुपहृतान्यपि
Sansmritya purvajatim sa nirvedam paramam gatah
Na bhakshayati mansani parairupahritanyapi
112.6
अहिंस्रः सर्वभूतेषु सत्यवाक्सुदृढव्रतः
चकार च यथाकाममाहारं पतितैः फलैः
Ahinsrah sarvabhuteshu satyavaksudridhavratah
Chakara cha yathakamamaharam patitaih phalaih
112.7
श्मशाने तस्य चावासो गोमायोः संमतोऽभवत्
जन्मभूम्यनुरोधाच्च नान्यद्वासमरोचयत्
Shmashane tasya chavaso gomayoh sammatobhavat
Janmabhumyanurodhachcha nanyadvasamarochayat
112.8
तस्य शौचममृष्यन्तः सर्वे ते सहजातयः
चालयन्ति स्म तां बुद्धिं वचनैः प्रश्रयोत्तरैः
Tasya shauchamamrishyantah sarve te sahajatayah
Chalayanti sma tam buddhim vachanaih prashrayottaraih
112.9
वसन्पितृवने रौद्रे शौचं लप्सितुमिच्छसि
इयं विप्रतिपत्तिस्ते यदा त्वं पिशिताशनः
Vasanpitrivane raudre shaucham lapsitumichchhasi
Iyam vipratipattiste yada tvam pishitashanah
112.10
तत्समो वा भवास्माभिर्भक्ष्यान्दास्यामहे वयम्
भुङ्क्ष्व शौचं परित्यज्य यद्धि भुक्तं तदस्ति ते
Tatsamo va bhavasmabhirbhakshyandasyamahe vayam
Bhunkshva shaucham parityajya yaddhi bhuktam tadasti te
112.11
इति तेषां वचः श्रुत्वा प्रत्युवाच समाहितः
मधुरैः प्रश्रितैर्वाक्यैर्हेतुमद्भिरनिष्ठुरैः
Iti tesham vachah shrutva pratyuvacha samahitah
Madhuraih prashritairvakyairhetumadbhiranishthuraih
112.12
अप्रमाणं प्रसूतिर्मे शीलतः क्रियते कुलम्
प्रार्थयिष्ये तु तत्कर्म येन विस्तीर्यते यशः
Apramanam prasutirme shilatah kriyate kulam
Prarthayishye tu tatkarma yena vistiryate yashah
112.13
श्मशाने यदि वासो मे समाधिर्मे निशाम्यताम्
आत्मा फलति कर्माणि नाश्रमो धर्मलक्षणम्
Shmashane yadi vaso me samadhirme nishamyatam
Atma phalati karmani nashramo dharmalakshanam
112.14
आश्रमे यो द्विजं हन्याद्गां वा दद्यादनाश्रमे
किं नु तत्पातकं न स्यात्तद्वा दत्तं वृथा भवेत्
Ashrame yo dvijam hanyadgam va dadyadanashrame
Kim nu tatpatakam na syattadva dattam vritha bhavet
112.15
भवन्तः सर्वलोभेन केवलं भक्षणे रताः
अनुबन्धे तु ये दोषास्तान्न पश्यन्ति मोहिताः
Bhavantah sarvalobhena kevalam bhakshane ratah
Anubandhe tu ye doshastanna pashyanti mohitah
112.16
अप्रत्ययकृतां गर्ह्यामर्थापनयदूषिताम्
इह चामुत्र चानिष्टां तस्माद्वृत्तिं न रोचये
Apratyayakritam garhyamarthapanayadushitam
Iha chamutra chanishtam tasmadvrittim na rochaye
112.17
तं शुचिं पण्डितं मत्वा शार्दूलः ख्यातविक्रमः
कृत्वात्मसदृशां पूजां साचिव्येऽवर्धयत्स्वयम्
Tam shuchim panditam matva shardulah khyatavikramah
Kritvatmasadrisham pujam sachivyevardhayatsvayam
112.18
सौम्य विज्ञातरूपस्त्वं गच्छ यात्रां मया सह
व्रियन्तामीप्सिता भोगाः परिहार्याश्च पुष्कलाः
Saumya vigyatarupastvam gachchha yatram maya saha
Vriyantamipsita bhogah pariharyashcha pushkalah
112.19
तीक्ष्णा वयमिति ख्याता भवतो ज्ञापयामहे
मृदुपूर्वं घातिनस्ते श्रेयश्चाधिगमिष्यति
Tikshna vayamiti khyata bhavato gyapayamahe
Mridupurvam ghatinaste shreyashchadhigamishyati
112.20
अथ संपूज्य तद्वाक्यं मृगेन्द्रस्य महात्मनः
गोमायुः प्रश्रितं वाक्यं बभाषे किंचिदानतः
Atha sampujya tadvakyam mrigendrasya mahatmanah
Gomayuh prashritam vakyam babhashe kinchidanatah
112.21
सदृशं मृगराजैतत्तव वाक्यं मदन्तरे
यत्सहायान्मृगयसे धर्मार्थकुशलाञ्शुचीन्
Sadrisham mrigarajaitattava vakyam madantare
Yatsahayanmrigayase dharmarthakushalanshuchin
112.22
न शक्यमनमात्येन महत्त्वमनुशासितुम्
दुष्टामात्येन वा वीर शरीरपरिपन्थिना
Na shakyamanamatyena mahattvamanushasitum
Dushtamatyena va vira shariraparipanthina
112.23
सहायाननुरक्तांस्तु यतेतानुपसंहितान्
परस्परमसंघुष्टान्विजिगीषूनलोलुपान्
Sahayananuraktanstu yatetanupasanhitan
Parasparamasanghushtanvijigishunalolupan
112.24
तानतीतोपधान्प्राज्ञान्हिते युक्तान्मनस्विनः
पूजयेथा महाभागान्यथाचार्यान्यथा पितॄन्
Tanatitopadhanpragyanhite yuktanmanasvinah
Pujayetha mahabhaganyathacharyanyatha pitrin
112.25
न त्वेवं मम संतोषाद्रोचतेऽन्यन्मृगाधिप
न कामये सुखान्भोगानैश्वर्यं वा त्वदाश्रयम्
Na tvevam mama santoshadrochatenyanmrigadhipa
Na kamaye sukhanbhoganaishvaryam va tvadashrayam
112.26
न योक्ष्यति हि मे शीलं तव भृत्यैः पुरातनैः
ते त्वां विभेदयिष्यन्ति दुःखशीला मदन्तरे
Na yokshyati hi me shilam tava bhrityaih puratanaih
Te tvam vibhedayishyanti duhkhashila madantare
112.27
संश्रयः श्लाघनीयस्त्वमन्येषामपि भास्वताम्
कृतात्मा सुमहाभागः पापकेष्वप्यदारुणः
Sanshrayah shlaghaniyastvamanyeshamapi bhasvatam
Kritatma sumahabhagah papakeshvapyadarunah
112.28
दीर्घदर्शी महोत्साहः स्थूललक्ष्यो महाबलः
कृती चामोघकर्तासि भाव्यैश्च समलंकृतः
Dirghadarshi mahotsahah sthulalakshyo mahabalah
Kriti chamoghakartasi bhavyaishcha samalankritah
112.29
किं तु स्वेनास्मि संतुष्टो दुःखा वृत्तिरनुष्ठिता
सेवायाश्चापि नाभिज्ञः स्वच्छन्देन वनेचरः
Kim tu svenasmi santushto duhkha vrittiranushthita
Sevayashchapi nabhigyah svachchhandena vanecharah
112.30
राजोपक्रोशदोषाश्च सर्वे संश्रयवासिनाम्
वनचर्या च निःसङ्गा निर्भया निरवग्रहा
Rajopakroshadoshashcha sarve sanshrayavasinam
Vanacharya cha nihsanga nirbhaya niravagraha
112.31
नृपेणाहूयमानस्य यत्तिष्ठति भयं हृदि
न तत्तिष्ठति तुष्टानां वने मूलफलाशिनाम्
Nripenahuyamanasya yattishthati bhayam hridi
Na tattishthati tushtanam vane mulaphalashinam
112.32
पानीयं वा निरायासं स्वाद्वन्नं वा भयोत्तरम्
विचार्य खलु पश्यामि तत्सुखं यत्र निर्वृतिः
Paniyam va nirayasam svadvannam va bhayottaram
Vicharya khalu pashyami tatsukham yatra nirvritih
112.33
अपराधैर्न तावन्तो भृत्याः शिष्टा नराधिपैः
उपघातैर्यथा भृत्या दूषिता निधनं गताः
Aparadhairna tavanto bhrityah shishta naradhipaih
Upaghatairyatha bhritya dushita nidhanam gatah
112.34
यदि त्वेतन्मया कार्यं मृगेन्द्रो यदि मन्यते
समयं कृतमिच्छामि वर्तितव्यं यथा मयि
Yadi tvetanmaya karyam mrigendro yadi manyate
Samayam kritamichchhami vartitavyam yatha mayi
112.35
मदीया माननीयास्ते श्रोतव्यं च हितं वचः
कल्पिता या च ते वृत्तिः सा भवेत्तव सुस्थिरा
Madiya mananiyaste shrotavyam cha hitam vachah
Kalpita ya cha te vrittih sa bhavettava susthira
112.36
न मन्त्रयेयमन्यैस्ते सचिवैः सह कर्हिचित्
नीतिमन्तः परीप्सन्तो वृथा ब्रूयुः परे मयि
Na mantrayeyamanyaiste sachivaih saha karhichit
Nitimantah paripsanto vritha bruyuh pare mayi
112.37
एक एकेन संगम्य रहो ब्रूयां हितं तव
न च ते ज्ञातिकार्येषु प्रष्टव्योऽहं हिताहिते
Eka ekena sangamya raho bruyam hitam tava
Na cha te gyatikaryeshu prashtavyoham hitahite
112.38
मया संमन्त्र्य पश्चाच्च न हिंस्याः सचिवास्त्वया
मदीयानां च कुपितो मा त्वं दण्डं निपातयेः
Maya sammantrya pashchachcha na hinsyah sachivastvaya
Madiyanam cha kupito ma tvam dandam nipatayeh
112.39
एवमस्त्विति तेनासौ मृगेन्द्रेणाभिपूजितः
प्राप्तवान्मतिसाचिव्यं गोमायुर्व्याघ्रयोनितः
Evamastviti tenasau mrigendrenabhipujitah
Praptavanmatisachivyam gomayurvyaghrayonitah
112.40
तं तथा सत्कृतं दृष्ट्वा युज्यमानं च कर्मणि
प्राद्विषन्कृतसंघाताः पूर्वभृत्या मुहुर्मुहुः
Tam tatha satkritam drishtva yujyamanam cha karmani
Pradvishankritasanghatah purvabhritya muhurmuhuh
112.41
मित्रबुद्ध्या च गोमायुं सान्त्वयित्वा प्रवेश्य च
दोषेषु समतां नेतुमैच्छन्नशुभबुद्धयः
Mitrabuddhya cha gomayum santvayitva praveshya cha
Dosheshu samatam netumaichchhannashubhabuddhayah
112.42
अन्यथा ह्युचिताः पूर्वं परद्रव्यापहारिणः
अशक्ताः किंचिदादातुं द्रव्यं गोमायुयन्त्रिताः
Anyatha hyuchitah purvam paradravyapaharinah
Ashaktah kinchidadatum dravyam gomayuyantritah
112.43
व्युत्थानं चात्र काङ्क्षद्भिः कथाभिः प्रविलोभ्यते
धनेन महता चैव बुद्धिरस्य विलोभ्यते
Vyutthanam chatra kankshadbhih kathabhih pravilobhyate
Dhanena mahata chaiva buddhirasya vilobhyate
112.44
न चापि स महाप्राज्ञस्तस्माद्धैर्याच्चचाल ह
अथास्य समयं कृत्वा विनाशाय स्थिताः परे
Na chapi sa mahapragyastasmaddhairyachchachala ha
Athasya samayam kritva vinashaya sthitah pare
112.45
ईप्सितं च मृगेन्द्रस्य मांसं यत्तत्र संस्कृतम्
अपनीय स्वयं तद्धि तैर्न्यस्तं तस्य वेश्मनि
Ipsitam cha mrigendrasya mansam yattatra sanskritam
Apaniya svayam taddhi tairnyastam tasya veshmani
112.46
यदर्थं चाप्यपहृतं येन यच्चैव मन्त्रितम्
तस्य तद्विदितं सर्वं कारणार्थं च मर्षितम्
Yadartham chapyapahritam yena yachchaiva mantritam
Tasya tadviditam sarvam karanartham cha marshitam
112.47
समयोऽयं कृतस्तेन साचिव्यमुपगच्छता
नोपघातस्त्वया ग्राह्यो राजन्मैत्रीमिहेच्छता
Samayoyam kritastena sachivyamupagachchhata
Nopaghatastvaya grahyo rajanmaitrimihechchhata
112.48
भोजने चोपहर्तव्ये तन्मांसं न स्म दृश्यते
मृगराजेन चाज्ञप्तं मृग्यतां चोर इत्युत
Bhojane chopahartavye tanmansam na sma drishyate
Mrigarajena chagyaptam mrigyatam chora ityuta
112.49
कृतकैश्चापि तन्मांसं मृगेन्द्रायोपवर्णितम्
सचिवेनोपनीतं ते विदुषा प्राज्ञमानिना
Kritakaishchapi tanmansam mrigendrayopavarnitam
Sachivenopanitam te vidusha pragyamanina
112.50
सरोषस्त्वथ शार्दूलः श्रुत्वा गोमायुचापलम्
बभूवामर्षितो राजा वधं चास्याभ्यरोचयत्
Saroshastvatha shardulah shrutva gomayuchapalam
Babhuvamarshito raja vadham chasyabhyarochayat
112.51
छिद्रं तु तस्य तद्दृष्ट्वा प्रोचुस्ते पूर्वमन्त्रिणः
सर्वेषामेव सोऽस्माकं वृत्तिभङ्गेषु वर्तते
Chhidram tu tasya taddrishtva prochuste purvamantrinah
Sarveshameva sosmakam vrittibhangeshu vartate
112.52
इदं चास्येदृशं कर्म वाल्लभ्येन तु रक्ष्यते
श्रुतश्च स्वामिना पूर्वं यादृशो नैष तादृशः
Idam chasyedrisham karma vallabhyena tu rakshyate
Shrutashcha svamina purvam yadrisho naisha tadrishah
112.53
वाङ्मात्रेणैव धर्मिष्ठः स्वभावेन तु दारुणः
धर्मच्छद्मा ह्ययं पापो वृथाचारपरिग्रहः
कार्यार्थं भोजनार्थेषु व्रतेषु कृतवाञ्श्रमम्
Vanmatrenaiva dharmishthah svabhavena tu darunah
Dharmachchhadma hyayam papo vrithacharaparigrahah
Karyartham bhojanartheshu vrateshu kritavanshramam
112.54
मांसापनयनं ज्ञात्वा व्याघ्रस्तेषां तु तद्वचः
आज्ञापयामास तदा गोमायुर्वध्यतामिति
Mansapanayanam gyatva vyaghrastesham tu tadvachah
Agyapayamasa tada gomayurvadhyatamiti
112.55
शार्दूलवचनं श्रुत्वा शार्दूलजननी ततः
मृगराजं हितैर्वाक्यैः संबोधयितुमागमत्
Shardulavachanam shrutva shardulajanani tatah
Mrigarajam hitairvakyaih sambodhayitumagamat
112.56
पुत्र नैतत्त्वया ग्राह्यं कपटारम्भसंवृतम्
कर्मसंघर्षजैर्दोषैर्दुष्यत्यशुचिभिः शुचिः
Putra naitattvaya grahyam kapatarambhasanvritam
Karmasangharshajairdoshairdushyatyashuchibhih shuchih
112.57
नोच्छ्रितं सहते कश्चित्प्रक्रिया वैरकारिका
शुचेरपि हि युक्तस्य दोष एव निपात्यते
Nochchhritam sahate kashchitprakriya vairakarika
Shucherapi hi yuktasya dosha eva nipatyate
112.58
लुब्धानां शुचयो द्वेष्याः कातराणां तरस्विनः
मूर्खाणां पण्डिता द्वेष्या दरिद्राणां महाधनाः
अधार्मिकाणां धर्मिष्ठा विरूपाणां सुरूपकाः
Lubdhanam shuchayo dveshyah kataranam tarasvinah
Murkhanam pandita dveshya daridranam mahadhanah
Adharmikanam dharmishtha virupanam surupakah
112.59
बहवः पण्डिता लुब्धाः सर्वे मायोपजीविनः
कुर्युर्दोषमदोषस्य बृहस्पतिमतेरपि
Bahavah pandita lubdhah sarve mayopajivinah
Kuryurdoshamadoshasya brihaspatimaterapi
112.60
शून्यात्तच्च गृहान्मांसं यदद्यापहृतं तव
नेच्छते दीयमानं च साधु तावद्विमृश्यताम्
Shunyattachcha grihanmansam yadadyapahritam tava
Nechchhate diyamanam cha sadhu tavadvimrishyatam
112.61
असत्याः सत्यसंकाशाः सत्याश्चासत्यदर्शिनः
दृश्यन्ते विविधा भावास्तेषु युक्तं परीक्षणम्
Asatyah satyasankashah satyashchasatyadarshinah
Drishyante vividha bhavasteshu yuktam parikshanam
112.62
तलवद्दृश्यते व्योम खद्योतो हव्यवाडिव
न चैवास्ति तलं व्योम्नि न खद्योते हुताशनः
Talavaddrishyate vyoma khadyoto havyavadiva
Na chaivasti talam vyomni na khadyote hutashanah
112.63
तस्मात्प्रत्यक्षदृष्टोऽपि युक्तमर्थः परीक्षितुम्
परीक्ष्य ज्ञापयन्ह्यर्थान्न पश्चात्परितप्यते
Tasmatpratyakshadrishtopi yuktamarthah parikshitum
Parikshya gyapayanhyarthanna pashchatparitapyate
112.64
न दुष्करमिदं पुत्र यत्प्रभुर्घातयेत्परम्
श्लाघनीया च वर्या च लोके प्रभवतां क्षमा
Na dushkaramidam putra yatprabhurghatayetparam
Shlaghaniya cha varya cha loke prabhavatam kshama
112.65
स्थापितोऽयं पुत्र त्वया सामन्तेष्वधि विश्रुतः
दुःखेनासाद्यते पात्रं धार्यतामेष ते सुहृत्
Sthapitoyam putra tvaya samanteshvadhi vishrutah
Duhkhenasadyate patram dharyatamesha te suhrit
112.66
दूषितं परदोषैर्हि गृह्णीते योऽन्यथा शुचिम्
स्वयं संदूषितामात्यः क्षिप्रमेव विनश्यति
Dushitam paradoshairhi grihnite yonyatha shuchim
Svayam sandushitamatyah kshiprameva vinashyati
112.67
तस्मादथारिसंघाताद्गोमायोः कश्चिदागतः
धर्मात्मा तेन चाख्यातं यथैतत्कपटं कृतम्
Tasmadatharisanghatadgomayoh kashchidagatah
Dharmatma tena chakhyatam yathaitatkapatam kritam
112.68
ततो विज्ञातचारित्रः सत्कृत्य स विमोक्षितः
परिष्वक्तश्च सस्नेहं मृगेन्द्रेण पुनः पुनः
Tato vigyatacharitrah satkritya sa vimokshitah
Parishvaktashcha sasneham mrigendrena punah punah
112.69
अनुज्ञाप्य मृगेन्द्रं तु गोमायुर्नीतिशास्त्रवित्
तेनामर्षेण संतप्तः प्रायमासितुमैच्छत
Anugyapya mrigendram tu gomayurnitishastravit
Tenamarshena santaptah prayamasitumaichchhata
112.70
शार्दूलस्तत्र गोमायुं स्नेहात्प्रस्रुतलोचनः
अवारयत्स धर्मिष्ठं पूजया प्रतिपूजयन्
Shardulastatra gomayum snehatprasrutalochanah
Avarayatsa dharmishtham pujaya pratipujayan
112.71
तं स गोमायुरालोक्य स्नेहादागतसंभ्रमम्
बभाषे प्रणतो वाक्यं बाष्पगद्गदया गिरा
Tam sa gomayuralokya snehadagatasambhramam
Babhashe pranato vakyam bashpagadgadaya gira
112.72
पूजितोऽहं त्वया पूर्वं पश्चाच्चैव विमानितः
परेषामास्पदं नीतो वस्तुं नार्हाम्यहं त्वयि
Pujitoham tvaya purvam pashchachchaiva vimanitah
Pareshamaspadam nito vastum narhamyaham tvayi
112.73
स्वसंतुष्टाश्च्युताः स्थानान्मानात्प्रत्यवरोपिताः
स्वयं चोपहृता भृत्या ये चाप्युपहृताः परैः
Svasantushtashchyutah sthananmanatpratyavaropitah
Svayam chopahrita bhritya ye chapyupahritah paraih
112.74
परिक्षीणाश्च लुब्धाश्च क्रूराः काराभितापिताः
हृतस्वा मानिनो ये च त्यक्तोपात्ता महेप्सवः
Parikshinashcha lubdhashcha krurah karabhitapitah
Hritasva manino ye cha tyaktopatta mahepsavah
112.75
संतापिताश्च ये केचिद्व्यसनौघप्रतीक्षिणः
अन्तर्हिताः सोपहिताः सर्वे ते परसाधनाः
Santapitashcha ye kechidvyasanaughapratikshinah
Antarhitah sopahitah sarve te parasadhanah
112.76
अवमानेन युक्तस्य स्थापितस्य च मे पुनः
कथं यास्यसि विश्वासमहमेष्यामि वा पुनः
Avamanena yuktasya sthapitasya cha me punah
Katham yasyasi vishvasamahameshyami va punah
112.77
समर्थ इति संगृह्य स्थापयित्वा परीक्ष्य च
कृतं च समयं भित्त्वा त्वयाहमवमानितः
Samartha iti sangrihya sthapayitva parikshya cha
Kritam cha samayam bhittva tvayahamavamanitah
112.78
प्रथमं यः समाख्यातः शीलवानिति संसदि
न वाच्यं तस्य वैगुण्यं प्रतिज्ञां परिरक्षता
Prathamam yah samakhyatah shilavaniti sansadi
Na vachyam tasya vaigunyam pratigyam parirakshata
112.79
एवं चावमतस्येह विश्वासं किं प्रयास्यसि
त्वयि चैव ह्यविश्वासे ममोद्वेगो भविष्यति
Evam chavamatasyeha vishvasam kim prayasyasi
Tvayi chaiva hyavishvase mamodvego bhavishyati
112.80
शङ्कितस्त्वमहं भीतः परे छिद्रानुदर्शिनः
अस्निग्धाश्चैव दुस्तोषाः कर्म चैतद्बहुच्छलम्
Shankitastvamaham bhitah pare chhidranudarshinah
Asnigdhashchaiva dustoshah karma chaitadbahuchchhalam
112.81
दुःखेन श्लेष्यते भिन्नं श्लिष्टं दुःखेन भिद्यते
भिन्नश्लिष्टा तु या प्रीतिर्न सा स्नेहेन वर्तते
Duhkhena shleshyate bhinnam shlishtam duhkhena bhidyate
Bhinnashlishta tu ya pritirna sa snehena vartate
112.82
कश्चिदेव हि भीतस्तु दृश्यते न परात्मनोः
कार्यापेक्षा हि वर्तन्ते भावाः स्निग्धास्तु दुर्लभाः
Kashchideva hi bhitastu drishyate na paratmanoh
Karyapeksha hi vartante bhavah snigdhastu durlabhah
112.83
सुदुःखं पुरुषज्ञानं चित्तं ह्येषां चलाचलम्
समर्थो वाप्यशक्तो वा शतेष्वेकोऽधिगम्यते
Suduhkham purushagyanam chittam hyesham chalachalam
Samartho vapyashakto va shateshvekodhigamyate
112.84
अकस्मात्प्रक्रिया नॄणामकस्माच्चापकर्षणम्
शुभाशुभे महत्त्वं च प्रकर्तुं बुद्धिलाघवात्
Akasmatprakriya nrinamakasmachchapakarshanam
Shubhashubhe mahattvam cha prakartum buddhilaghavat
112.85
एवं बहुविधं सान्त्वमुक्त्वा धर्मार्थहेतुमत्
प्रसादयित्वा राजानं गोमायुर्वनमभ्यगात्
Evam bahuvidham santvamuktva dharmarthahetumat
Prasadayitva rajanam gomayurvanamabhyagat
112.86
अगृह्यानुनयं तस्य मृगेन्द्रस्य स बुद्धिमान्
गोमायुः प्रायमासीनस्त्यक्त्वा देहं दिवं ययौ
Agrihyanunayam tasya mrigendrasya sa buddhiman
Gomayuh prayamasinastyaktva deham divam yayau