Utshovঅধ্যায় 111
111.1
যুধিষ্ঠির উবাচ
ক্লিশ্যমানেষু ভূতেষু তৈস্তৈর্ভাবৈস্ততস্ততঃ
দুর্গাণ্যতিতরেদ্যেন তন্মে ব্রূহি পিতামহ
111.2
ভীষ্ম উবাচ
আশ্রমেষু যথোক্তেষু যথোক্তং যে দ্বিজাতয়ঃ
বর্তন্তে সংয়তাত্মানো দুর্গাণ্যতিতরন্তি তে
111.3
যে দম্ভান্ন জপন্তি স্ম যেষাং বৃত্তিশ্চ সংবৃতা
বিষয়াংশ্চ নিগৃহ্ণন্তি দুর্গাণ্যতিতরন্তি তে
111.4
বাসয়ন্ত্যতিথীন্নিত্যং নিত্যং যে চানসূয়কাঃ
নিত্যং স্বাধ্যায়শীলাশ্চ দুর্গাণ্যতিতরন্তি তে
111.5
মাতাপিত্রোশ্চ যে বৃত্তিং বর্তন্তে ধর্মকোবিদাঃ
বর্জয়ন্তি দিবাস্বপ্নং দুর্গাণ্যতিতরন্তি তে
111.6
স্বেষু দারেষু বর্তন্তে ন্যায়বৃত্তেষ্বৃতাবৃতৌ
অগ্নিহোত্রপরাঃ সন্তো দুর্গাণ্যতিতরন্তি তে
111.7
যে ন লোভান্নয়ন্ত্যর্থান্রাজানো রজসাবৃতাঃ
বিষয়ান্পরিরক্ষন্তো দুর্গাণ্যতিতরন্তি তে
111.8
আহবেষু চ যে শূরাস্ত্যক্ত্বা মরণজং ভয়ম্
ধর্মেণ জয়মিচ্ছন্তো দুর্গাণ্যতিতরন্তি তে
111.9
যে পাপানি ন কুর্বন্তি কর্মণা মনসা গিরা
নিক্ষিপ্তদণ্ডা ভূতেষু দুর্গাণ্যতিতরন্তি তে
111.10
যে বদন্তীহ সত্যানি প্রাণত্যাগেঽপ্যুপস্থিতে
প্রমাণভূতা ভূতানাং দুর্গাণ্যতিতরন্তি তে
111.11
অনধ্যায়েষু যে বিপ্রাঃ স্বাধ্যায়ং নৈব কুর্বতে
তপোনিত্যাঃ সুতপসো দুর্গাণ্যতিতরন্তি তে
111.12
কর্মাণ্যকুহকার্থানি যেষাং বাচশ্চ সূনৃতাঃ
যেষামর্থাশ্চ সাধ্বর্থা দুর্গাণ্যতিতরন্তি তে
111.13
যে তপশ্চ তপস্যন্তি কৌমারব্রহ্মচারিণঃ
বিদ্যাবেদব্রতস্নাতা দুর্গাণ্যতিতরন্তি তে
111.14
যে চ সংশান্তরজসঃ সংশান্ততমসশ্চ যে
সত্যে স্থিতা মহাত্মানো দুর্গাণ্যতিতরন্তি তে
111.15
যেষাং ন কশ্চিত্ত্রসতি ত্রসন্তি ন চ কস্যচিৎ
যেষামাত্মসমো লোকো দুর্গাণ্যতিতরন্তি তে
111.16
পরশ্রিয়া ন তপ্যন্তে যে সন্তঃ পুরুষর্ষভাঃ
গ্রাম্যাদন্নান্নিবৃত্তাশ্চ দুর্গাণ্যতিতরন্তি তে
111.17
সর্বান্দেবান্নমস্যন্তি সর্বান্ধর্মাংশ্চ শৃণ্বতে
যে শ্রদ্দধানা দান্তাশ্চ দুর্গাণ্যতিতরন্তি তে
111.18
যে ন মানিতমিচ্ছন্তি মানয়ন্তি চ যে পরম্
মান্যমানা ন মন্যন্তে দুর্গাণ্যতিতরন্তি তে
111.19
যে শ্রাদ্ধানি চ কুর্বন্তি তিথ্যাং তিথ্যাং প্রজার্থিনঃ
সুবিশুদ্ধেন মনসা দুর্গাণ্যতিতরন্তি তে
111.20
যে ক্রোধং নৈব কুর্বন্তি ক্রুদ্ধান্সংশময়ন্তি চ
ন চ কুপ্যন্তি ভৃত্যেভ্যো দুর্গাণ্যতিতরন্তি তে
111.21
মধু মাংসং চ যে নিত্যং বর্জয়ন্তীহ মানবাঃ
জন্মপ্রভৃতি মদ্যং চ দুর্গাণ্যতিতরন্তি তে
111.22
যাত্রার্থং ভোজনং যেষাং সংতানার্থং চ মৈথুনম্
বাক্সত্যবচনার্থায় দুর্গাণ্যতিতরন্তি তে
111.23
ঈশ্বরং সর্বভূতানাং জগতঃ প্রভবাপ্যয়ম্
ভক্তা নারায়ণং যে চ দুর্গাণ্যতিতরন্তি তে
111.24
য এষ রক্তপদ্মাক্ষঃ পীতবাসা মহাভুজঃ
সুহৃদ্ভ্রাতা চ মিত্রং চ সংবন্ধী চ তবাচ্যুতঃ
111.25
য ইমান্সকলাঁল্লোকাংশ্চর্মবত্পরিবেষ্টয়েৎ
ইচ্ছন্প্রভুরচিন্ত্যাত্মা গোবিন্দঃ পুরুষোত্তমঃ
111.26
স্থিতঃ প্রিয়হিতে জিষ্ণোঃ স এষ পুরুষর্ষভ
রাজংস্তব চ দুর্ধর্ষো বৈকুণ্ঠঃ পুরুষোত্তমঃ
111.27
য এনং সংশ্রয়ন্তীহ ভক্ত্যা নারায়ণং হরিম্
তে তরন্তীহ দুর্গাণি ন মেঽত্রাস্তি বিচারণা
111.28
দুর্গাতিতরণং যে চ পঠন্তি শ্রাবয়ন্তি চ
পাঠয়ন্তি চ বিপ্রেভ্যো দুর্গাণ্যতিতরন্তি তে
111.29
ইতি কৃত্যসমুদ্দেশঃ কীর্তিতস্তে ময়ানঘ
সংতরেদ্যেন দুর্গাণি পরত্রেহ চ মানবঃ