Utshovঅধ্যায় 110
110.1
যুধিষ্ঠির উবাচ
কথং ধর্মে স্থাতুমিচ্ছন্নরো বর্তেত ভারত
বিদ্বঞ্জিজ্ঞাসমানায় প্রব্রূহি ভরতর্ষভ
110.2
সত্যং চৈবানৃতং চোভে লোকানাবৃত্য তিষ্ঠতঃ
তয়োঃ কিমাচরেদ্রাজন্পুরুষো ধর্মনিশ্চিতঃ
110.3
কিং স্বিত্সত্যং কিমনৃতং কিং স্বিদ্ধর্ম্যং সনাতনম্
কস্মিন্কালে বদেত্সত্যং কস্মিন্কালেঽনৃতং বদেৎ
110.4
ভীষ্ম উবাচ
সত্যস্য বচনং সাধু ন সত্যাদ্বিদ্যতে পরম্
যদ্ভূলোকে সুদুর্জ্ঞাতং তত্তে বক্ষ্যামি ভারত
110.5
ভবেত্সত্যং ন বক্তব্যং বক্তব্যমনৃতং ভবেৎ
যত্রানৃতং ভবেত্সত্যং সত্যং বাপ্যনৃতং ভবেৎ
110.6
তাদৃশে মুহ্যতে বালো যত্র সত্যমনিষ্ঠিতম্
সত্যানৃতে বিনিশ্চিত্য ততো ভবতি ধর্মবিৎ
110.7
অপ্যনার্যোঽকৃতপ্রজ্ঞঃ পুরুষোঽপি সুদারুণঃ
সুমহত্প্রাপ্নুয়াত্পুণ্যং বলাকোঽন্ধবধাদিব
110.8
কিমাশ্চর্যং চ যন্মূঢো ধর্মকামোঽপ্যধর্মবিৎ
সুমহত্প্রাপ্নুয়াত্পাপং গঙ্গায়ামিব কৌশিকঃ
110.9
তাদৃশোঽয়মনুপ্রশ্নো যত্র ধর্মঃ সুদুর্বচঃ
দুষ্করঃ প্রতিসংখ্যাতুং তর্কেণাত্র ব্যবস্যতি
110.10
প্রভাবার্থায় ভূতানাং ধর্মপ্রবচনং কৃতম্
যত্স্যাদহিংসাসংয়ুক্তং স ধর্ম ইতি নিশ্চয়ঃ
110.11
ধারণাদ্ধর্ম ইত্যাহুর্ধর্মেণ বিধৃতাঃ প্রজাঃ
যত্স্যাদ্ধারণসংয়ুক্তং স ধর্ম ইতি নিশ্চয়ঃ
110.12
শ্রুতিধর্ম ইতি হ্যেকে নেত্যাহুরপরে জনাঃ
ন তু তত্প্রত্যসূয়ামো ন হি সর্বং বিধীয়তে
110.13
যেঽন্যায়েন জিহীর্ষন্তো ধনমিচ্ছন্তি কর্হিচিৎ
তেভ্যস্তন্ন তদাখ্যেয়ং স ধর্ম ইতি নিশ্চয়ঃ
110.14
অকূজনেন চেন্মোক্ষো নাত্র কূজেত্কথংচন
অবশ্যং কূজিতব্যং বা শঙ্কেরন্বাপ্যকূজনাৎ
110.15
শ্রেয়স্তত্রানৃতং বক্তুং সত্যাদিতি বিচারিতম্
যঃ পাপৈঃ সহ সংবন্ধান্মুচ্যতে শপথাদিতি
110.16
ন চ তেভ্যো ধনং দেয়ং শক্যে সতি কথংচন
পাপেভ্যো হি ধনং দত্তং দাতারমপি পীডয়েৎ
110.17
স্বশরীরোপরোধেন বরমাদাতুমিচ্ছতঃ
সত্যসংপ্রতিপত্ত্যর্থং যে ব্রূয়ুঃ সাক্ষিণঃ ক্বচিৎ
অনুক্ত্বা তত্র তদ্বাচ্যং সর্বে তেঽনৃতবাদিনঃ
110.18
প্রাণাত্যয়ে বিবাহে চ বক্তব্যমনৃতং ভবেৎ
অর্থস্য রক্ষণার্থায় পরেষাং ধর্মকারণাৎ
পরেষাং ধর্মমাকাঙ্ক্ষন্নীচঃ স্যাদ্ধর্মভিক্ষুকঃ
110.19
প্রতিশ্রুত্য তু দাতব্যং শ্বঃকার্যস্তু বলাত্কৃতঃ
যঃ কশ্চিদ্ধর্মসময়াত্প্রচ্যুতোঽধর্মমাস্থিতঃ
110.20
শঠঃ স্বধর্মমুত্সৃজ্য তমিচ্ছেদুপজীবিতুম্
সর্বোপায়ৈর্নিহন্তব্যঃ পাপো নিকৃতিজীবনঃ
110.21
ধনমিত্যেব পাপানাং সর্বেষামিহ নিশ্চয়ঃ
যেঽবিষহ্যা হ্যসংভোজ্যা নিকৃত্যা পতনং গতাঃ
110.22
চ্যুতা দেবমনুষ্যেভ্যো যথা প্রেতাস্তথৈব তে
ধনাদানাদ্দুঃখতরং জীবিতাদ্বিপ্রয়োজনম্
110.23
অয়ং বো রোচতাং ধর্ম ইতি বাচ্যঃ প্রয়ত্নতঃ
ন কশ্চিদস্তি পাপানাং ধর্ম ইত্যেষ নিশ্চয়ঃ
110.24
তথাগতং চ যো হন্যান্নাসৌ পাপেন লিপ্যতে
স্বকর্মণা হতং হন্তি হত এব স হন্যতে
তেষু যঃ সময়ং কশ্চিত্কুর্বীত হতবুদ্ধিষু
110.25
যথা কাকশ্চ গৃধ্রশ্চ তথৈবোপধিজীবিনঃ
ঊর্ধ্বং দেহবিমোক্ষান্তে ভবন্ত্যেতাসু যোনিষু
110.26
যস্মিন্যথা বর্ততে যো মনুষ্য;স্তস্মিংস্তথা বর্তিতব্যং স ধর্মঃ
মায়াচারো মায়য়া বর্তিতব্যঃ; সাধ্বাচারঃ সাধুনা প্রত্যুদেয়ঃ