Utshovঅধ্যায় 109
109.1
যুধিষ্ঠির উবাচ
মহানয়ং ধর্মপথো বহুশাখশ্চ ভারত
কিং স্বিদেবেহ ধর্মাণামনুষ্ঠেয়তমং মতম্
109.2
কিং কার্যং সর্বধর্মাণাং গরীয়ো ভবতো মতম্
যথায়ং পুরুষো ধর্মমিহ চ প্রেত্য চাপ্নুয়াৎ
109.3
ভীষ্ম উবাচ
মাতাপিত্রোর্গুরূণাং চ পূজা বহুমতা মম
অত্র যুক্তো নরো লোকান্যশশ্চ মহদশ্নুতে
109.4
যদেতে হ্যভিজানীয়ুঃ কর্ম তাত সুপূজিতাঃ
ধর্ম্যং ধর্মবিরুদ্ধং বা তত্কর্তব্যং যুধিষ্ঠির
109.5
ন তৈরনভ্যনুজ্ঞাতো ধর্মমন্যং প্রকল্পয়েৎ
যমেতেঽভ্যনুজানীয়ুঃ স ধর্ম ইতি নিশ্চয়ঃ
109.6
এত এব ত্রয়ো লোকা এত এবাশ্রমাস্ত্রয়ঃ
এত এব ত্রয়ো বেদা এত এব ত্রয়োঽগ্নয়ঃ
109.7
পিতা হ্যগ্নির্গার্হপত্যো মাতাগ্নির্দক্ষিণঃ স্মৃতঃ
গুরুরাহবনীয়স্তু সাগ্নিত্রেতা গরীয়সী
109.8
ত্রিষ্বপ্রমাদ্যন্নেতেষু ত্রীঁল্লোকানবজেষ্যসি
পিতৃবৃত্ত্যা ত্বিমং লোকং মাতৃবৃত্ত্যা তথাপরম্
ব্রহ্মলোকং গুরোর্বৃত্ত্যা নিত্যমেব চরিষ্যসি
109.9
সম্যগেতেষু বর্তস্ব ত্রিষু লোকেষু ভারত
যশঃ প্রাপ্স্যসি ভদ্রং তে ধর্মং চ সুমহাফলম্
109.10
নৈতানতিশয়েজ্জাতু নাত্যশ্নীয়ান্ন দূষয়েৎ
নিত্যং পরিচরেচ্চৈব তদ্বৈ সুকৃতমুত্তমম্
কীর্তিং পুণ্যং যশো লোকান্প্রাপ্স্যসে চ জনাধিপ
109.11
সর্বে তস্যাদৃতা লোকা যস্যৈতে ত্রয় আদৃতাঃ
অনাদৃতাস্তু যস্যৈতে সর্বাস্তস্যাফলাঃ ক্রিয়াঃ
109.12
নৈবায়ং ন পরো লোকস্তস্য চৈব পরংতপ
অমানিতা নিত্যমেব যস্যৈতে গুরবস্ত্রয়ঃ
109.13
ন চাস্মিন্ন পরে লোকে যশস্তস্য প্রকাশতে
ন চান্যদপি কল্যাণং পারত্রং সমুদাহৃতম্
109.14
তেভ্য এব তু তত্সর্বং কৃত্যয়া বিসৃজাম্যহম্
তদাসীন্মে শতগুণং সহস্রগুণমেব চ
তস্মান্মে সংপ্রকাশন্তে ত্রয়ো লোকা যুধিষ্ঠির
109.15
দশৈব তু সদাচার্যঃ শ্রোত্রিয়ানতিরিচ্যতে
দশাচার্যানুপাধ্যায় উপাধ্যায়ান্পিতা দশ
109.16
পিতৄন্দশ তু মাতৈকা সর্বাং বা পৃথিবীমপি
গুরুত্বেনাভিভবতি নাস্তি মাতৃসমো গুরুঃ
গুরুর্গরীয়ান্পিতৃতো মাতৃতশ্চেতি মে মতিঃ
109.17
উভৌ হি মাতাপিতরৌ জন্মনি ব্যুপয়ুজ্যতঃ
শরীরমেতৌ সৃজতঃ পিতা মাতা চ ভারত
আচার্যশিষ্টা যা জাতিঃ সা দিব্যা সাজরামরা
109.18
অবধ্যা হি সদা মাতা পিতা চাপ্যপকারিণৌ
ন সংদুষ্যতি তত্কৃত্বা ন চ তে দূষয়ন্তি তম্
ধর্মায় যতমানানাং বিদুর্দেবাঃ সহর্ষিভিঃ
109.19
য আবৃণোত্যবিতথেন কর্ণা;বৃতং ব্রুবন্নমৃতং সংপ্রয়চ্ছন্
তং বৈ মন্যে পিতরং মাতরং চ; তস্মৈ ন দ্রুহ্যেত্কৃতমস্য জানন্
109.20
বিদ্যাং শ্রুত্বা যে গুরুং নাদ্রিয়ন্তে; প্রত্যাসন্নং মনসা কর্মণা বা
যথৈব তে গুরুভির্ভাবনীয়া;স্তথা তেষাং গুরবোঽপ্যর্চনীয়াঃ
109.21
তস্মাত্পূজয়িতব্যাশ্চ সংবিভজ্যাশ্চ যত্নতঃ
গুরবোঽর্চয়িতব্যাশ্চ পুরাণং ধর্মমিচ্ছতা
109.22
যেন প্রীতাশ্চ পিতরস্তেন প্রীতঃ পিতামহঃ
প্রীণাতি মাতরং যেন পৃথিবী তেন পূজিতা
109.23
যেন প্রীণাত্যুপাধ্যায়ং তেন স্যাদ্ব্রহ্ম পূজিতম্
মাতৃতঃ পিতৃতশ্চৈব তস্মাত্পূজ্যতমো গুরুঃ
ঋষয়শ্চ হি দেবাশ্চ প্রীয়ন্তে পিতৃভিঃ সহ
109.24
ন কেনচন বৃত্তেন হ্যবজ্ঞেয়ো গুরুর্ভবেৎ
ন চ মাতা ন চ পিতা তাদৃশো যাদৃশো গুরুঃ
109.25
ন তেঽবমানমর্হন্তি ন চ তে দূষয়ন্তি তম্
গুরূণামেব সত্কারং বিদুর্দেবাঃ সহর্ষিভিঃ
109.26
উপাধ্যায়ং পিতরং মাতরং চ; যেঽভিদ্রুহ্যন্তি মনসা কর্মণা বা
তেষাং পাপং ভ্রূণহত্যাবিশিষ্টং; তস্মান্নান্যঃ পাপকৃদস্তি লোকে
109.27
মিত্রদ্রুহঃ কৃতঘ্নস্য স্ত্রীঘ্নস্য পিশুনস্য চ
চতুর্ণাং বয়মেতেষাং নিষ্কৃতিং নানুশুশ্রুমঃ
109.28
এতত্সর্বমতিদেশেন সৃষ্টং; যত্কর্তব্যং পুরুষেণেহ লোকে
এতচ্ছ্রেয়ো নান্যদস্মাদ্বিশিষ্টং; সর্বান্ধর্মাননুসৃত্যৈতদুক্তম্