Utshovঅধ্যায় 108
108.1
যুধিষ্ঠির উবাচ
ব্রাহ্মণক্ষত্রিয়বিশাং শূদ্রাণাং চ পরংতপ
ধর্মো বৃত্তং চ বৃত্তিশ্চ বৃত্ত্যুপায়ফলানি চ
108.2
রাজ্ঞাং বৃত্তং চ কোশশ্চ কোশসংজননং মহৎ
অমাত্যগুণবৃদ্ধিশ্চ প্রকৃতীনাং চ বর্ধনম্
108.3
ষাড্গুণ্যগুণকল্পশ্চ সেনানীতিস্তথৈব চ
দুষ্টস্য চ পরিজ্ঞানমদুষ্টস্য চ লক্ষণম্
108.4
সমহীনাধিকানাং চ যথাবল্লক্ষণোচ্চয়ঃ
মধ্যমস্য চ তুষ্ট্যর্থং যথা স্থেয়ং বিবর্ধতা
108.5
ক্ষীণসংগ্রহবৃত্তিশ্চ যথাবত্সংপ্রকীর্তিতা
লঘুনাদেশরূপেণ গ্রন্থয়োগেন ভারত
108.6
বিজিগীষোস্তথাবৃত্তমুক্তং চৈব তথৈব তে
গণানাং বৃত্তিমিচ্ছামি শ্রোতুং মতিমতাং বর
108.7
যথা গণাঃ প্রবর্ধন্তে ন ভিদ্যন্তে চ ভারত
অরীন্হি বিজিগীষন্তে সুহৃদঃ প্রাপ্নুবন্তি চ
108.8
ভেদমূলো বিনাশো হি গণানামুপলভ্যতে
মন্ত্রসংবরণং দুঃখং বহূনামিতি মে মতিঃ
108.9
এতদিচ্ছাম্যহং শ্রোতুং নিখিলেন পরংতপ
যথা চ তে ন ভিদ্যেরংস্তচ্চ মে ব্রূহি পার্থিব
108.10
ভীষ্ম উবাচ
গণানাং চ কুলানাং চ রাজ্ঞাং চ ভরতর্ষভ
বৈরসংদীপনাবেতৌ লোভামর্ষৌ জনাধিপ
108.11
লোভমেকো হি বৃণুতে ততোঽমর্ষমনন্তরম্
তৌ ক্ষয়ব্যয়সংয়ুক্তাবন্যোন্যজনিতাশ্রয়ৌ
108.12
চারমন্ত্রবলাদানৈঃ সামদানবিভেদনৈঃ
ক্ষয়ব্যয়ভয়োপায়ৈঃ কর্শয়ন্তীতরেতরম্
108.13
তত্র দানেন ভিদ্যন্তে গণাঃ সংঘাতবৃত্তয়ঃ
ভিন্না বিমনসঃ সর্বে গচ্ছন্ত্যরিবশং ভয়াৎ
108.14
ভেদাদ্গণা বিনশ্যন্তি ভিন্নাঃ সূপজপাঃ পরৈঃ
তস্মাত্সংঘাতয়োগেষু প্রয়তেরন্গণাঃ সদা
108.15
অর্থা হ্যেবাধিগম্যন্তে সংঘাতবলপৌরুষাৎ
বাহ্যাশ্চ মৈত্রীং কুর্বন্তি তেষু সংঘাতবৃত্তিষু
108.16
জ্ঞানবৃদ্ধান্প্রশংসন্তঃ শুশ্রূষন্তঃ পরস্পরম্
বিনিবৃত্তাভিসংধানাঃ সুখমেধন্তি সর্বশঃ
108.17
ধর্মিষ্ঠান্ব্যবহারাংশ্চ স্থাপয়ন্তশ্চ শাস্ত্রতঃ
যথাবত্সংপ্রবর্তন্তো বিবর্ধন্তে গণোত্তমাঃ
108.18
পুত্রান্ভ্রাতৄন্নিগৃহ্ণন্তো বিনয়ে চ সদা রতাঃ
বিনীতাংশ্চ প্রগৃহ্ণন্তো বিবর্ধন্তে গণোত্তমাঃ
108.19
চারমন্ত্রবিধানেষু কোশসংনিচয়েষু চ
নিত্যয়ুক্তা মহাবাহো বর্ধন্তে সর্বতো গণাঃ
108.20
প্রাজ্ঞাঞ্শূরান্মহেষ্বাসান্কর্মসু স্থিরপৌরুষান্
মানয়ন্তঃ সদা যুক্তা বিবর্ধন্তে গণা নৃপ
108.21
দ্রব্যবন্তশ্চ শূরাশ্চ শস্ত্রজ্ঞাঃ শাস্ত্রপারগাঃ
কৃচ্ছ্রাস্বাপত্সু সংমূঢান্গণানুত্তারয়ন্তি তে
108.22
ক্রোধো ভেদো ভয়ো দণ্ডঃ কর্শনং নিগ্রহো বধঃ
নয়ন্ত্যরিবশং সদ্যো গণান্ভরতসত্তম
108.23
তস্মান্মানয়িতব্যাস্তে গণমুখ্যাঃ প্রধানতঃ
লোকয়াত্রা সমায়ত্তা ভূয়সী তেষু পার্থিব
108.24
মন্ত্রগুপ্তিঃ প্রধানেষু চারশ্চামিত্রকর্শন
ন গণাঃ কৃত্স্নশো মন্ত্রং শ্রোতুমর্হন্তি ভারত
108.25
গণমুখ্যৈস্তু সংভূয় কার্যং গণহিতং মিথঃ
পৃথগ্গণস্য ভিন্নস্য বিমতস্য ততোঽন্যথা
অর্থাঃ প্রত্যবসীদন্তি তথানর্থা ভবন্তি চ
108.26
তেষামন্যোন্যভিন্নানাং স্বশক্তিমনুতিষ্ঠতাম্
নিগ্রহঃ পণ্ডিতৈঃ কার্যঃ ক্ষিপ্রমেব প্রধানতঃ
108.27
কুলেষু কলহা জাতাঃ কুলবৃদ্ধৈরুপেক্ষিতাঃ
গোত্রস্য রাজন্কুর্বন্তি গণসংভেদকারিকাম্
108.28
আভ্যন্তরং ভয়ং রক্ষ্যং সুরক্ষ্যং বাহ্যতো ভয়ম্
অভ্যন্তরাদ্ভয়ং জাতং সদ্যো মূলং নিকৃন্ততি
108.29
অকস্মাত্ক্রোধলোভাদ্বা মোহাদ্বাপি স্বভাবজাৎ
অন্যোন্যং নাভিভাষন্তে তত্পরাভবলক্ষণম্
108.30
জাত্যা চ সদৃশাঃ সর্বে কুলেন সদৃশাস্তথা
ন তু শৌর্যেণ বুদ্ধ্যা বা রূপদ্রব্যেণ বা পুনঃ
108.31
ভেদাচ্চৈব প্রমাদাচ্চ নাম্যন্তে রিপুভির্গণাঃ
তস্মাত্সংঘাতমেবাহুর্গণানাং শরণং মহৎ