Utshovঅধ্যায় 107
107.1
রাজপুত্র উবাচ
ন নিকৃত্যা ন দম্ভেন ব্রহ্মন্নিচ্ছামি জীবিতুম্
নাধর্ময়ুক্তানিচ্ছেয়মর্থান্সুমহতোঽপ্যহম্
107.2
পুরস্তাদেব ভগবন্ময়ৈতদপবর্জিতম্
যেন মাং নাভিশঙ্কেত যদ্বা কৃত্স্নং হিতং ভবেৎ
107.3
আনৃশংস্যেন ধর্মেণ লোকে হ্যস্মিঞ্জিজীবিষুঃ
নাহমেতদলং কর্তুং নৈতন্ময্যুপপদ্যতে
107.4
মুনিরুবাচ
উপপন্নস্ত্বমেতেন যথা ক্ষত্রিয় ভাষসে
প্রকৃত্যা হ্যুপপন্নোঽসি বুদ্ধ্যা চাদ্ভুতদর্শন
107.5
উভয়োরেব বামর্থে যতিষ্যে তব তস্য চ
সংশ্লেষং বা করিষ্যামি শাশ্বতং হ্যনপায়িনম্
107.6
ত্বাদৃশং হি কুলে জাতমনৃশংসং বহুশ্রুতম্
অমাত্যং কো ন কুর্বীত রাজ্যপ্রণয়কোবিদম্
107.7
যস্ত্বং প্রব্রজিতো রাজ্যাদ্ব্যসনং চোত্তমং গতঃ
আনৃশংস্যেন বৃত্তেন ক্ষত্রিয়েচ্ছসি জীবিতুম্
107.8
আগন্তা মদ্গৃহং তাত বৈদেহঃ সত্যসংগরঃ
যথাহং তং নিয়োক্ষ্যামি তত্করিষ্যত্যসংশয়ম্
107.9
ভীষ্ম উবাচ
তত আহূয় বৈদেহং মুনির্বচনমব্রবীৎ
অয়ং রাজকুলে জাতো বিদিতাভ্যন্তরো মম
107.10
আদর্শ ইব শুদ্ধাত্মা শারদশ্চন্দ্রমা ইব
নাস্মিন্পশ্যামি বৃজিনং সর্বতো মে পরীক্ষিতঃ
107.11
তেন তে সংধিরেবাস্তু বিশ্বসাস্মিন্যথা ময়ি
ন রাজ্যমনমাত্যেন শক্যং শাস্তুমমিত্রহন্
107.12
অমাত্যঃ শূর এব স্যাদ্বুদ্ধিসংপন্ন এব চ
তাভ্যাং চৈব ভয়ং রাজ্ঞঃ পশ্য রাজ্যস্য যোজনম্
ধর্মাত্মনাং ক্বচিল্লোকে নান্যাস্তি গতিরীদৃশী
107.13
কৃতাত্মা রাজপুত্রোঽয়ং সতাং মার্গমনুষ্ঠিতঃ
সুসংগৃহীতস্ত্বেবৈষ ত্বয়া ধর্মপুরোগমঃ
সংসেব্যমানঃ শত্রূংস্তে গৃহ্ণীয়ান্মহতো গণান্
107.14
যদ্যয়ং প্রতিয়ুধ্যেত্ত্বাং স্বকর্ম ক্ষত্রিয়স্য তৎ
জিগীষমাণস্ত্বাং যুদ্ধে পিতৃপৈতামহে পদে
107.15
ত্বং চাপি প্রতিয়ুধ্যেথা বিজিগীষুব্রতে স্থিতঃ
অয়ুদ্ধ্বৈব নিয়োগান্মে বশে বৈদেহ তে স্থিতঃ
107.16
স ত্বং ধর্মমবেক্ষস্ব ত্যক্ত্বাধর্মমসাংপ্রতম্
ন হি কামান্ন চ দ্রোহাত্স্বধর্মং হাতুমর্হসি
107.17
নৈব নিত্যং জয়স্তাত নৈব নিত্যং পরাজয়ঃ
তস্মাদ্ভোজয়িতব্যশ্চ ভোক্তব্যশ্চ পরো জনঃ
107.18
আত্মন্যেব হি সংদৃশ্যাবুভৌ জয়পরাজয়ৌ
নিঃশেষকারিণাং তাত নিঃশেষকরণাদ্ভয়ম্
107.19
ইত্যুক্তঃ প্রত্যুবাচেদং বচনং ব্রাহ্মণর্ষভম্
অভিপূজ্যাভিসত্কৃত্য পূজার্হমনুমান্য চ
107.20
যথা ব্রূয়ান্মহাপ্রাজ্ঞো যথা ব্রূয়াদ্বহুশ্রুতঃ
শ্রেয়স্কামো যথা ব্রূয়াদুভয়োর্যত্ক্ষমং ভবেৎ
107.21
তথা বচনমুক্তোঽস্মি করিষ্যামি চ তত্তথা
এতদ্ধি পরমং শ্রেয়ো ন মেঽত্রাস্তি বিচারণা
107.22
ততঃ কৌসল্যমাহূয় বৈদেহো বাক্যমব্রবীৎ
ধর্মতো নীতিতশ্চৈব বলেন চ জিতো ময়া
107.23
সোঽহং ত্বয়া ত্বাত্মগুণৈর্জিতঃ পার্থিবসত্তম
আত্মানমনবজ্ঞায় জিতবদ্বর্ততাং ভবান্
107.24
নাবমন্যে চ তে বুদ্ধিং নাবমন্যে চ পৌরুষম্
নাবমন্যে জয়ামীতি জিতবদ্বর্ততাং ভবান্
107.25
যথাবত্পূজিতো রাজন্গৃহং গন্তাসি মে গৃহাৎ
ততঃ সংপূজ্য তৌ বিপ্রং বিশ্বস্তৌ জগ্মতুর্গৃহান্
107.26
বৈদেহস্ত্বথ কৌসল্যং প্রবেশ্য গৃহমঞ্জসা
পাদ্যার্ঘ্যমধুপর্কৈস্তং পূজার্হং প্রত্যপূজয়ৎ
107.27
দদৌ দুহিতরং চাস্মৈ রত্নানি বিবিধানি চ
এষ রাজ্ঞাং পরো ধর্মঃ সহ্যৌ জয়পরাজয়ৌ