Utshovঅধ্যায় 106
106.1
মুনিরুবাচ
অথ চেত্পৌরুষং কিংচিত্ক্ষত্রিয়াত্মনি পশ্যসি
ব্রবীমি হন্ত তে নীতিং রাজ্যস্য প্রতিপত্তয়ে
106.2
তাং চেচ্ছক্ষ্যস্যনুষ্ঠাতুং কর্ম চৈব করিষ্যসি
শৃণু সর্বমশেষেণ যত্ত্বাং বক্ষ্যামি তত্ত্বতঃ
106.3
আচরিষ্যসি চেত্কর্ম মহতোঽর্থানবাপ্স্যসি
রাজ্যং রাজ্যস্য মন্ত্রং বা মহতীং বা পুনঃ শ্রিয়ম্
যদ্যেতদ্রোচতে রাজন্পুনর্ব্রূহি ব্রবীমি তে
106.4
রাজপুত্র উবাচ
ব্রবীতু ভগবান্নীতিমুপপন্নোঽস্ম্যহং প্রভো
অমোঘমিদমদ্যাস্তু ত্বয়া সহ সমাগতম্
106.5
মুনিরুবাচ
হিত্বা স্তম্ভং চ মানং চ ক্রোধহর্ষৌ ভয়ং তথা
প্রত্যমিত্রং নিষেবস্ব প্রণিপত্য কৃতাঞ্জলিঃ
106.6
তমুত্তমেন শৌচেন কর্মণা চাভিরাধয়
দাতুমর্হতি তে বৃত্তিং বৈদেহঃ সত্যসংগরঃ
106.7
প্রমাণং সর্বভূতেষু প্রগ্রহং চ গমিষ্যসি
ততঃ সহায়ান্সোত্সাহাঁল্লপ্স্যসেঽব্যসনাঞ্শুচীন্
106.8
বর্তমানঃ স্বশাস্ত্রে বৈ সংয়তাত্মা জিতেন্দ্রিয়ঃ
অভ্যুদ্ধরতি চাত্মানং প্রসাদয়তি চ প্রজাঃ
106.9
তেনৈব ত্বং ধৃতিমতা শ্রীমতা চাভিসত্কৃতঃ
প্রমাণং সর্বভূতেষু গত্বা প্রগ্রহণং মহৎ
106.10
ততঃ সুহৃদ্বলং লব্ধ্বা মন্ত্রয়িত্বা সুমন্ত্রিতম্
অন্তরৈর্ভেদয়িত্বারীন্বিল্বং বিল্বেন শাতয়
পরৈর্বা সংবিদং কৃত্বা বলমপ্যস্য ঘাতয়
106.11
অলভ্যা যে শুভা ভাবাঃ স্ত্রিয়শ্চাচ্ছাদনানি চ
শয্যাসনানি যানানি মহার্হাণি গৃহাণি চ
106.12
পক্ষিণো মৃগজাতানি রসা গন্ধাঃ ফলানি চ
তেষ্বেব সজ্জয়েথাস্ত্বং যথা নশ্যেত্স্বয়ং পরঃ
106.13
যদ্যেব প্রতিষেদ্ধব্যো যদ্যুপেক্ষণমর্হতি
ন জাতু বিবৃতঃ কার্যঃ শত্রুর্বিনয়মিচ্ছতা
106.14
বসস্ব পরমামিত্রবিষয়ে প্রাজ্ঞসংমতে
ভজস্ব শ্বেতকাকীয়ৈর্মিত্রাধমমনর্থকৈঃ
106.15
আরম্ভাংশ্চাস্য মহতো দুষ্করাংস্ত্বং প্রয়োজয়
নদীবন্ধবিরোধাংশ্চ বলবদ্ভির্বিরুধ্যতাম্
106.16
উদ্যানানি মহার্হাণি শয়নান্যাসনানি চ
প্রতিভোগসুখেনৈব কোশমস্য বিরেচয়
106.17
যজ্ঞদানপ্রশংসাস্মৈ ব্রাহ্মণেষ্বনুবর্ণ্যতাম্
তে ত্বত্প্রিয়ং করিষ্যন্তি তং চেষ্যন্তি বৃকা ইব
106.18
অসংশয়ং পুণ্যশীলঃ প্রাপ্নোতি পরমাং গতিম্
ত্রিবিষ্টপে পুণ্যতমং স্থানং প্রাপ্নোতি পার্থিবঃ
কোশক্ষয়ে ত্বমিত্রাণাং বশং কৌসল্য গচ্ছতি
106.19
উভয়ত্র প্রসক্তস্য ধর্মে চাধর্ম এব চ
বলার্থমূলং ব্যুচ্ছিদ্যেত্তেন নন্দন্তি শত্রবঃ
106.20
নিন্দ্যাস্য মানুষং কর্ম দৈবমস্যোপবর্ণয়
অসংশয়ং দৈবপরঃ ক্ষিপ্রমেব বিনশ্যতি
106.21
যাজয়ৈনং বিশ্বজিতা সর্বস্বেন বিয়ুজ্যতাম্
ততো গচ্ছত্বসিদ্ধার্থঃ পীড্যমানো মহাজনম্
106.22
ত্যাগধর্মবিদং মুণ্ডং কংচিদস্যোপবর্ণয়
অপি ত্যাগং বুভূষেত কচ্চিদ্গচ্ছেদনাময়ম্
106.23
সিদ্ধেনৌষধয়োগেন সর্বশত্রুবিনাশিনা
নাগানশ্বান্মনুষ্যাংশ্চ কৃতকৈরুপঘাতয়
106.24
এতে চান্যে চ বহবো দম্ভয়োগাঃ সুনিশ্চিতাঃ
শক্যা বিষহতা কর্তুং নক্লীবেন নৃপাত্মজ