Utshovঅধ্যায় 105
105.1
যুধিষ্ঠির উবাচ
ধার্মিকোঽর্থানসংপ্রাপ্য রাজামাত্যৈঃ প্রবাধিতঃ
চ্যুতঃ কোশাচ্চ দণ্ডাচ্চ সুখমিচ্ছন্কথং চরেৎ
105.2
ভীষ্ম উবাচ
অত্রায়ং ক্ষেমদর্শীয়মিতিহাসোঽনুগীয়তে
তত্তেঽহং সংপ্রবক্ষ্যামি তন্নিবোধ যুধিষ্ঠির
105.3
ক্ষেমদর্শং নৃপসুতং যত্র ক্ষীণবলং পুরা
মুনিঃ কালকবৃক্ষীয় আজগামেতি নঃ শ্রুতম্
তং পপ্রচ্ছোপসংগৃহ্য কৃচ্ছ্রামাপদমাস্থিতঃ
105.4
অর্থেষু ভাগী পুরুষ ঈহমানঃ পুনঃ পুনঃ
অলব্ধ্বা মদ্বিধো রাজ্যং ব্রহ্মন্কিং কর্তুমর্হতি
105.5
অন্যত্র মরণাত্স্তেয়াদন্যত্র পরসংশ্রয়াৎ
ক্ষুদ্রাদন্যত্র চাচারাত্তন্মমাচক্ষ্ব সত্তম
105.6
ব্যাধিনা চাভিপন্নস্য মানসেনেতরেণ বা
বহুশ্রুতঃ কৃতপ্রজ্ঞস্ত্বদ্বিধঃ শরণং ভবেৎ
105.7
নির্বিদ্য হি নরঃ কামান্নিয়ম্য সুখমেধতে
ত্যক্ত্বা প্রীতিং চ শোকং চ লব্ধ্বাপ্রীতিময়ং বসু
105.8
সুখমর্থাশ্রয়ং যেষামনুশোচামি তানহম্
মম হ্যর্থাঃ সুবহবো নষ্টাঃ স্বপ্ন ইবাগতাঃ
105.9
দুষ্করং বত কুর্বন্তি মহতোঽর্থাংস্ত্যজন্তি যে
বয়ং ত্বেনান্পরিত্যক্তুমসতোঽপি ন শক্নুমঃ
105.10
ইমামবস্থাং সংপ্রাপ্তং দীনমার্তং শ্রিয়শ্চ্যুতম্
যদন্যত্সুখমস্তীহ তদ্ব্রহ্মন্ননুশাধি মাম্
105.11
কৌসল্যেনৈবমুক্তস্তু রাজপুত্রেণ ধীমতা
মুনিঃ কালকবৃক্ষীয়ঃ প্রত্যুবাচ মহাদ্যুতিঃ
105.12
পুরস্তাদেব তে বুদ্ধিরিয়ং কার্যা বিজানতঃ
অনিত্যং সর্বমেবেদমহং চ মম চাস্তি যৎ
105.13
যত্কিংচিন্মন্যসেঽস্তীতি সর্বং নাস্তীতি বিদ্ধি তৎ
এবং ন ব্যথতে প্রাজ্ঞঃ কৃচ্ছ্রামপ্যাপদং গতঃ
105.14
যদ্ধি ভূতং ভবিষ্যচ্চ ধ্রুবং তন্ন ভবিষ্যতি
এবং বিদিতবেদ্যস্ত্বমধর্মেভ্যঃ প্রমোক্ষ্যসে
105.15
যচ্চ পূর্বে সমাহারে যচ্চ পূর্বতরে পরে
সর্বং তন্নাস্তি তচ্চৈব তজ্জ্ঞাত্বা কোঽনুসংজ্বরেৎ
105.16
ভূত্বা চ ন ভবত্যেতদভূত্বা চ ভবত্যপি
শোকে ন হ্যস্তি সামর্থ্যং শোকং কুর্যাত্কথং নরঃ
105.17
ক্ব নু তেঽদ্য পিতা রাজন্ক্ব নু তেঽদ্য পিতামহঃ
ন ত্বং পশ্যসি তানদ্য ন ত্বা পশ্যন্তি তেঽপি চ
105.18
আত্মনোঽধ্রুবতাং পশ্যংস্তাংস্ত্বং কিমনুশোচসি
বুদ্ধ্যা চৈবানুবুধ্যস্ব ধ্রুবং হি ন ভবিষ্যসি
105.19
অহং চ ত্বং চ নৃপতে শত্রবঃ সুহৃদশ্চ তে
অবশ্যং ন ভবিষ্যামঃ সর্বং চ ন ভবিষ্যতি
105.20
যে তু বিংশতিবর্ষা বৈ ত্রিংশদ্বর্ষাশ্চ মানবাঃ
অর্বাগেব হি তে সর্বে মরিষ্যন্তি শরচ্ছতাৎ
105.21
অপি চেন্মহতো বিত্তাদ্বিপ্রমুচ্যেত পূরুষঃ
নৈতন্মমেতি তন্মত্বা কুর্বীত প্রিয়মাত্মনঃ
105.22
অনাগতং যন্ন মমেতি বিদ্যা;দতিক্রান্তং যন্ন মমেতি বিদ্যাৎ
দিষ্টং বলীয় ইতি মন্যমানা;স্তে পণ্ডিতাস্তত্সতাং স্থানমাহুঃ
105.23
অনাঢ্যাশ্চাপি জীবন্তি রাজ্যং চাপ্যনুশাসতে
বুদ্ধিপৌরুষসংপন্নাস্ত্বয়া তুল্যাধিকা জনাঃ
105.24
ন চ ত্বমিব শোচন্তি তস্মাত্ত্বমপি মা শুচঃ
কিং নু ত্বং তৈর্ন বৈ শ্রেয়াংস্তুল্যো বা বুদ্ধিপৌরুষৈঃ
105.25
রাজপুত্র উবাচ
যাদৃচ্ছিকং মমাসীত্তদ্রাজ্যমিত্যেব চিন্তয়ে
হ্রিয়তে সর্বমেবেদং কালেন মহতা দ্বিজ
105.26
তস্যৈবং হ্রিয়মাণস্য স্রোতসেব তপোধন
ফলমেতত্প্রপশ্যামি যথালব্ধেন বর্তয়ে
105.27
মুনিরুবাচ
অনাগতমতীতং চ যথা তথ্যবিনিশ্চয়াৎ
নানুশোচসি কৌসল্য সর্বার্থেষু তথা ভব
105.28
অবাপ্যান্কাময়স্বার্থান্নানবাপ্যান্কদাচন
প্রত্যুত্পন্নাননুভবন্মা শুচস্ত্বমনাগতান্
105.29
যথা লব্ধোপপন্নার্থস্তথা কৌসল্য রংস্যসে
কচ্চিচ্ছুদ্ধস্বভাবেন শ্রিয়া হীনো ন শোচসি
105.30
পুরস্তাদ্ভূতপূর্বত্বাদ্ধীনভাগ্যো হি দুর্মতিঃ
ধাতারং গর্হতে নিত্যং লব্ধার্থাংশ্চ ন মৃষ্যতে
105.31
অনর্হানপি চৈবান্যান্মন্যতে শ্রীমতো জনান্
এতস্মাত্কারণাদেতদ্দুঃখং ভূয়োঽনুবর্ততে
105.32
ঈর্ষ্যাতিচ্ছেদসংপন্না রাজন্পুরুষমানিনঃ
কচ্চিত্ত্বং ন তথা প্রাজ্ঞ মত্সরী কোসলাধিপ
105.33
সহস্ব শ্রিয়মন্যেষাং যদ্যপি ত্বয়ি নাস্তি সা
অন্যত্রাপি সতীং লক্ষ্মীং কুশলা ভুঞ্জতে জনাঃ
অভিবিষ্যন্দতে শ্রীর্হি সত্যপি দ্বিষতো জনাৎ
105.34
শ্রিয়ং চ পুত্রপৌত্রং চ মনুষ্যা ধর্মচারিণঃ
ত্যাগধর্মবিদো বীরাঃ স্বয়মেব ত্যজন্ত্যুত
105.35
বহু সংকসুকং দৃষ্ট্বা বিবিত্সাসাধনেন চ
তথান্যে সংত্যজন্ত্যেনং মত্বা পরমদুর্লভম্
105.36
ত্বং পুনঃ প্রাজ্ঞরূপঃ সন্কৃপণং পরিতপ্যসে
অকাম্যান্কাময়ানোঽর্থান্পরাচীনানুপদ্রুতান্
105.37
তাং বুদ্ধিমুপজিজ্ঞাসুস্ত্বমেবৈনান্পরিত্যজ
অনর্থাংশ্চার্থরূপেণ অর্থাংশ্চানর্থরূপতঃ
105.38
অর্থায়ৈব হি কেষাংচিদ্ধননাশো ভবত্যুত
অনন্ত্যং তং সুখং মত্বা শ্রিয়মন্যঃ পরীক্ষতে
105.39
রমমাণঃ শ্রিয়া কশ্চিন্নান্যচ্ছ্রেয়োঽভিমন্যতে
তথা তস্যেহমানস্য সমারম্ভো বিনশ্যতি
105.40
কৃচ্ছ্রাল্লব্ধমভিপ্রেতং যদা কৌসল্য নশ্যতি
তদা নির্বিদ্যতে সোঽর্থাত্পরিভগ্নক্রমো নরঃ
105.41
ধর্মমেকেঽভিপদ্যন্তে কল্যাণাভিজনা নরাঃ
পরত্র সুখমিচ্ছন্তো নির্বিদ্যেয়ুশ্চ লৌকিকাৎ
105.42
জীবিতং সংত্যজন্ত্যেকে ধনলোভপরা নরাঃ
ন জীবিতার্থং মন্যন্তে পুরুষা হি ধনাদৃতে
105.43
পশ্য তেষাং কৃপণতাং পশ্য তেষামবুদ্ধিতাম্
অধ্রুবে জীবিতে মোহাদর্থতৃষ্ণামুপাশ্রিতাঃ
105.44
সংচয়ে চ বিনাশান্তে মরণান্তে চ জীবিতে
সংয়োগে বিপ্রয়োগান্তে কো নু বিপ্রণয়েন্মনঃ
105.45
ধনং বা পুরুষং রাজন্পুরুষো বা পুনর্ধনম্
অবশ্যং প্রজহাত্যেতত্তদ্বিদ্বান্কোঽনুসংজ্বরেৎ
105.46
অন্যেষামপি নশ্যন্তি সুহৃদশ্চ ধনানি চ
পশ্য বুদ্ধ্যা মনুষ্যাণাং রাজন্নাপদমাত্মনঃ
নিয়চ্ছ যচ্ছ সংয়চ্ছ ইন্দ্রিয়াণি মনো গিরম্
105.47
প্রতিষিদ্ধানবাপ্যেষু দুর্লভেষ্বহিতেষু চ
প্রতিকৃষ্টেষু ভাবেষু ব্যতিকৃষ্টেষ্বসংভবে
প্রজ্ঞানতৃপ্তো বিক্রান্তস্ত্বদ্বিধো নানুশোচতি
105.48
অল্পমিচ্ছন্নচপলো মৃদুর্দান্তঃ সুসংশিতঃ
ব্রহ্মচর্যোপপন্নশ্চ ত্বদ্বিধো নৈব মুহ্যতি
105.49
ন ত্বেব জাল্মীং কাপালীং বৃত্তিমেষিতুমর্হসি
নৃশংসবৃত্তিং পাপিষ্ঠাং দুঃখাং কাপুরুষোচিতাম্
105.50
অপি মূলফলাজীবো রমস্বৈকো মহাবনে
বাগ্যতঃ সংগৃহীতাত্মা সর্বভূতদয়ান্বিতঃ
105.51
সদৃশং পণ্ডিতস্যৈতদীষাদন্তেন দন্তিনা
যদেকো রমতেঽরণ্যে যচ্চাপ্যল্পেন তুষ্যতি
105.52
মহাহ্রদঃ সংক্ষুভিত আত্মনৈব প্রসীদতি
এতদেবংগতস্যাহং সুখং পশ্যামি কেবলম্
105.53
অসংভবে শ্রিয়ো রাজন্হীনস্য সচিবাদিভিঃ
দৈবে প্রতিনিবিষ্টে চ কিং শ্রেয়ো মন্যতে ভবান্