Utshovঅধ্যায় 104
104.1
যুধিষ্ঠির উবাচ
কথং মৃদৌ কথং তীক্ষ্ণে মহাপক্ষে চ পার্থিব
অরৌ বর্তেত নৃপতিস্তন্মে ব্রূহি পিতামহ
104.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
বৃহস্পতেশ্চ সংবাদমিন্দ্রস্য চ যুধিষ্ঠির
104.3
বৃহস্পতিং দেবপতিরভিবাদ্য কৃতাঞ্জলিঃ
উপসংগম্য পপ্রচ্ছ বাসবঃ পরবীরহা
104.4
অহিতেষু কথং ব্রহ্মন্বর্তয়েয়মতন্দ্রিতঃ
অসমুচ্ছিদ্য চৈবেনান্নিয়চ্ছেয়মুপায়তঃ
104.5
সেনয়োর্ব্যতিষঙ্গেণ জয়ঃ সাধারণো ভবেৎ
কিং কুর্বাণং ন মাং জহ্যাজ্জ্বলিতা শ্রীঃ প্রতাপিনী
104.6
ততো ধর্মার্থকামানাং কুশলঃ প্রতিভানবান্
রাজধর্মবিধানজ্ঞঃ প্রত্যুবাচ পুরংদরম্
104.7
ন জাতু কলহেনেচ্ছেন্নিয়ন্তুমপকারিণঃ
বালসংসেবিতং হ্যেতদ্যদমর্ষো যদক্ষমা
ন শত্রুর্বিবৃতঃ কার্যো বধমস্যাভিকাঙ্ক্ষতা
104.8
ক্রোধং বলমমর্ষং চ নিয়ম্যাত্মজমাত্মনি
অমিত্রমুপসেবেত বিশ্বস্তবদবিশ্বসন্
104.9
প্রিয়মেব বদেন্নিত্যং নাপ্রিয়ং কিংচিদাচরেৎ
বিরমেচ্ছুষ্কবৈরেভ্যঃ কণ্ঠায়াসং চ বর্জয়েৎ
104.10
যথা বৈতংসিকো যুক্তো দ্বিজানাং সদৃশস্বনঃ
তান্দ্বিজান্কুরুতে বশ্যাংস্তথা যুক্তো মহীপতিঃ
বশং চোপনয়েচ্ছত্রূন্নিহন্যাচ্চ পুরংদর
104.11
ন নিত্যং পরিভূয়ারীন্সুখং স্বপিতি বাসব
জাগর্ত্যেব চ দুষ্টাত্মা সংকরেঽগ্নিরিবোত্থিতঃ
104.12
ন সংনিপাতঃ কর্তব্যঃ সামান্যে বিজয়ে সতি
বিশ্বাস্যৈবোপসংন্যাস্যো বশে কৃত্বা রিপুঃ প্রভো
104.13
সংপ্রধার্য সহামাত্যৈর্মন্ত্রবিদ্ভির্মহাত্মভিঃ
উপেক্ষমাণোঽবজ্ঞাতে হৃদয়েনাপরাজিতঃ
104.14
অথাস্য প্রহরেত্কালে কিংচিদ্বিচলিতে পদে
দণ্ডং চ দূষয়েদস্য পুরুষৈরাপ্তকারিভিঃ
104.15
আদিমধ্যাবসানজ্ঞঃ প্রচ্ছন্নং চ বিচারয়েৎ
বলানি দূষয়েদস্য জানংশ্চৈব প্রমাণতঃ
104.16
ভেদেনোপপ্রদানেন সংসৃজন্নৌষধৈস্তথা
ন ত্বেব চেলসংসর্গং রচয়েদরিভিঃ সহ
104.17
দীর্ঘকালমপি ক্ষান্ত্বা বিহন্যাদেব শাত্রবান্
কালাকাঙ্ক্ষী যাময়েচ্চ যথা বিস্রম্ভমাপ্নুয়ুঃ
104.18
ন সদ্যোঽরীন্বিনির্হন্যাদ্দৃষ্টস্য বিজয়োঽজ্বরঃ
ন যঃ শল্যং ঘট্টয়তি নবং চ কুরুতে ব্রণম্
104.19
প্রাপ্তে চ প্রহরেত্কালে ন স সংবর্ততে পুনঃ
হন্তুকামস্য দেবেন্দ্র পুরুষস্য রিপুং প্রতি
104.20
যঃ কালো হি ব্যতিক্রামেত্পুরুষং কালকাঙ্ক্ষিণম্
দুর্লভঃ স পুনঃ কালঃ কালধর্মচিকীর্ষুণা
104.21
ঔর্জস্থ্যং বিজয়েদেবং সংগৃহ্ণন্সাধুসংমতান্
কালেন সাধয়েন্নিত্যং নাপ্রাপ্তেঽভিনিপীডয়েৎ
104.22
বিহায় কামং ক্রোধং চ তথাহংকারমেব চ
যুক্তো বিবরমন্বিচ্ছেদহিতানাং পুরংদর
104.23
মার্দবং দণ্ড আলস্যং প্রমাদশ্চ সুরোত্তম
মায়াশ্চ বিবিধাঃ শক্র সাধয়ন্ত্যবিচক্ষণম্
104.24
নিহত্যৈতানি চত্বারি মায়াং প্রতিবিধায় চ
ততঃ শক্নোতি শত্রূণাং প্রহর্তুমবিচারয়ন্
104.25
যদৈবৈকেন শক্যেত গুহ্যং কর্তুং তদাচরেৎ
যচ্ছন্তি সচিবা গুহ্যং মিথো বিদ্রাবয়ন্ত্যপি
104.26
অশক্যমিতি কৃত্বা বা ততোঽন্যৈঃ সংবিদং চরেৎ
ব্রহ্মদণ্ডমদৃষ্টেষু দৃষ্টেষু চতুরঙ্গিণীম্
104.27
ভেদং চ প্রথমং যুঞ্জ্যাত্তূষ্ণীংদণ্ডং তথৈব চ
কালে প্রয়োজয়েদ্রাজা তস্মিংস্তস্মিংস্তদা তদা
104.28
প্রণিপাতং চ গচ্ছেত কালে শত্রোর্বলীয়সঃ
যুক্তোঽস্য বধমন্বিচ্ছেদপ্রমত্তঃ প্রমাদ্যতঃ
104.29
প্রণিপাতেন দানেন বাচা মধুরয়া ব্রুবন্
অমিত্রমুপসেবেত ন তু জাতু বিশঙ্কয়েৎ
104.30
স্থানানি শঙ্কিতানাং চ নিত্যমেব বিবর্জয়েৎ
ন চ তেষ্বাশ্বসেদ্দ্রুগ্ধ্বা জাগ্রতীহ নিরাকৃতাঃ
104.31
ন হ্যতো দুষ্করং কর্ম কিংচিদস্তি সুরোত্তম
যথা বিবিধবৃত্তানামৈশ্বর্যমমরাধিপ
104.32
তথা বিবিধশীলানামপি সংভব উচ্যতে
যতেত যোগমাস্থায় মিত্রামিত্রানবারয়ন্
104.33
মৃদুমপ্যবমন্যন্তে তীক্ষ্ণাদুদ্বিজতে জনঃ
মাতীক্ষ্ণো মামৃদুর্ভূস্ত্বং তীক্ষ্ণো ভব মৃদুর্ভব
104.34
যথা বপ্রে বেগবতি সর্বতঃসংপ্লুতোদকে
নিত্যং বিবরণাদ্বাধস্তথা রাজ্যং প্রমাদ্যতঃ
104.35
ন বহূনভিয়ুঞ্জীত যৌগপদ্যেন শাত্রবান্
সাম্না দানেন ভেদেন দণ্ডেন চ পুরংদর
104.36
একৈকমেষাং নিষ্পিংষঞ্শিষ্টেষু নিপুণং চরেৎ
ন চ শক্তোঽপি মেধাবী সর্বানেবারভেন্নৃপঃ
104.37
যদা স্যান্মহতী সেনা হয়নাগরথাকুলা
পদাতিয়ন্ত্রবহুলা স্বনুরক্তা ষডঙ্গিনী
104.38
যদা বহুবিধাং বৃদ্ধিং মন্যতে প্রতিলোমতঃ
তদা বিবৃত্য প্রহরেদ্দস্যূনামবিচারয়ন্
104.39
ন সাম দণ্ডোপনিষত্প্রশস্যতে; ন মার্দবং শত্রুষু যাত্রিকং সদা
ন সস্যঘাতো ন চ সংকরক্রিয়া; ন চাপি ভূয়ঃ প্রকৃতের্বিচারণা
104.40
মায়াবিভেদানুপসর্জনানি; পাপং তথৈব স্পশসংপ্রয়োগাৎ
আপ্তৈর্মনুষ্যৈরুপচারয়েত; পুরেষু রাষ্ট্রেষু চ সংপ্রয়ুক্তঃ
104.41
পুরাণি চৈষামনুসৃত্য ভূমিপাঃ; পুরেষু ভোগান্নিখিলানিহাজয়ন্
পুরেষু নীতিং বিহিতাং যথাবিধি; প্রয়োজয়ন্তো বলবৃত্রসূদন
104.42
প্রদায় গূঢানি বসূনি নাম; প্রচ্ছিদ্য ভোগানবধায় চ স্বান্
দুষ্টাঃ স্বদোষৈরিতি কীর্তয়িত্বা; পুরেষু রাষ্ট্রেষু চ যোজয়ন্তি
104.43
তথৈব চান্যৈ রতিশাস্ত্রবেদিভিঃ; স্বলংকৃতৈঃ শাস্ত্রবিধানদৃষ্টিভিঃ
সুশিক্ষিতৈর্ভাষ্যকথাবিশারদৈঃ; পরেষু কৃত্যানুপধারয়স্ব
104.44
ইন্দ্র উবাচ
কানি লিঙ্গানি দুষ্টস্য ভবন্তি দ্বিজসত্তম
কথং দুষ্টং বিজানীয়াদেতত্পৃষ্টো ব্রবীহি মে
104.45
বৃহস্পতিরুবাচ
পরোক্ষমগুণানাহ সদ্গুণানভ্যসূয়তি
পরৈর্বা কীর্ত্যমানেষু তূষ্ণীমাস্তে পরাঙ্মুখঃ
104.46
তূষ্ণীংভাবেঽপি হি জ্ঞানং ন চেদ্ভবতি কারণম্
বিশ্বাসমোষ্ঠসংদংশং শিরসশ্চ প্রকম্পনম্
104.47
করোত্যভীক্ষ্ণং সংসৃষ্টমসংসৃষ্টশ্চ ভাষতে
অদৃষ্টিতো বিকুরুতে দৃষ্ট্বা বা নাভিভাষতে
104.48
পৃথগেত্য সমশ্নাতি নেদমদ্য যথাবিধি
আসনে শয়নে যানে ভাবা লক্ষ্যা বিশেষতঃ
104.49
আর্তিরার্তে প্রিয়ে প্রীতিরেতাবন্মিত্রলক্ষণম্
বিপরীতং তু বোদ্ধব্যমরিলক্ষণমেব তৎ
104.50
এতান্যেবং যথোক্তানি বুধ্যেথাস্ত্রিদশাধিপ
পুরুষাণাং প্রদুষ্টানাং স্বভাবো বলবত্তরঃ
104.51
ইতি দুষ্টস্য বিজ্ঞানমুক্তং তে সুরসত্তম
নিশাম্য শাস্ত্রতত্ত্বার্থং যথাবদমরেশ্বর
104.52
ভীষ্ম উবাচ
স তদ্বচঃ শত্রুনিবর্হণে রত;স্তথা চকারাবিতথং বৃহস্পতেঃ
চচার কালে বিজয়ায় চারিহা; বশং চ শত্রূননয়ত্পুরংদরঃ