Utshovঅধ্যায় 103
103.1
যুধিষ্ঠির উবাচ
জৈত্র্যা বা কানি রূপাণি ভবন্তি পুরুষর্ষভ
পৃতনায়াঃ প্রশস্তানি তানীহেচ্ছামি বেদিতুম্
103.2
ভীষ্ম উবাচ
জৈত্র্যা বা যানি রূপাণি ভবন্তি পুরুষর্ষভ
পৃতনায়াঃ প্রশস্তানি তানি বক্ষ্যামি সর্বশঃ
103.3
দৈবং পূর্বং বিকুরুতে মানুষে কালচোদিতে
তদ্বিদ্বাংসোঽনুপশ্যন্তি জ্ঞানদীর্ঘেণ চক্ষুষা
103.4
প্রায়শ্চিত্তবিধিং চাত্র জপহোমাংশ্চ তদ্বিদঃ
মঙ্গলানি চ কুর্বন্তঃ শময়ন্ত্যহিতান্যপি
103.5
উদীর্ণমনসো যোধা বাহনানি চ ভারত
যস্যাং ভবন্তি সেনায়াং ধ্রুবং তস্যাং জয়ং বদেৎ
103.6
অন্বেনাং বায়বো বান্তি তথৈবেন্দ্রধনূংষি চ
অনুপ্লবন্তে মেঘাশ্চ তথাদিত্যস্য রশ্ময়ঃ
103.7
গোমায়বশ্চানুলোমা বডা গৃধ্রাশ্চ সর্বশঃ
আচরেয়ুর্যদা সেনাং তদা সিদ্ধিরনুত্তমা
103.8
প্রসন্নভাঃ পাবক ঊর্ধ্বরশ্মিঃ; প্রদক্ষিণাবর্তশিখো বিধূমঃ
পুণ্যা গন্ধাশ্চাহুতীনাং প্রবান্তি; জয়স্যৈতদ্ভাবিনো রূপমাহুঃ
103.9
গম্ভীরশব্দাশ্চ মহাস্বনাশ্চ; শঙ্খাশ্চ ভের্যশ্চ নদন্তি যত্র
যুয়ুত্সবশ্চাপ্রতীপা ভবন্তি; জয়স্যৈতদ্ভাবিনো রূপমাহুঃ
103.10
ইষ্টা মৃগাঃ পৃষ্ঠতো বামতশ্চ; সংপ্রস্থিতানাং চ গমিষ্যতাং চ
জিঘাংসতাং দক্ষিণাঃ সিদ্ধিমাহু;র্যে ত্বগ্রতস্তে প্রতিষেধয়ন্তি
103.11
মঙ্গল্যশব্দাঃ শকুনা বদন্তি; হংসাঃ ক্রৌঞ্চাঃ শতপত্রাশ্চ চাষাঃ
হৃষ্টা যোধাঃ সত্ত্ববন্তো ভবন্তি; জয়স্যৈতদ্ভাবিনো রূপমাহুঃ
103.12
শস্ত্রৈঃ পত্রৈঃ কবচৈঃ কেতুভিশ্চ; সুভানুভির্মুখবর্ণৈশ্চ যূনাম্
ভ্রাজিষ্মতী দুষ্প্রতিপ্রেক্ষণীয়া; যেষাং চমূস্তেঽভিভবন্তি শত্রূন্
103.13
শুশ্রূষবশ্চানভিমানিনশ্চ; পরস্পরং সৌহৃদমাস্থিতাশ্চ
যেষাং যোধাঃ শৌচমনুষ্ঠিতাশ্চ; জয়স্যৈতদ্ভাবিনো রূপমাহুঃ
103.14
শব্দাঃ স্পর্শাস্তথা গন্ধা বিচরন্তি মনঃপ্রিয়াঃ
ধৈর্যং চাবিশতে যোধান্বিজয়স্য মুখং তু তৎ
103.15
ইষ্টো বামঃ প্রবিষ্টস্য দক্ষিণঃ প্রবিবিক্ষতঃ
পশ্চাত্সংসাধয়ত্যর্থং পুরস্তাত্প্রতিষেধতি
103.16
সংভৃত্য মহতীং সেনাং চতুরঙ্গাং যুধিষ্ঠির
সাম্নৈবাবর্তনে পূর্বং প্রয়তেথাস্ততো যুধি
103.17
জঘন্য এষ বিজয়ো যদ্যুদ্ধং নাম ভারত
যাদৃচ্ছিকো যুধি জয়ো দৈবো বেতি বিচারণম্
103.18
অপামিব মহাবেগস্ত্রস্তা মৃগগণা ইব
দুর্নিবার্যতমা চৈব প্রভগ্না মহতী চমূঃ
103.19
ভগ্না ইত্যেব ভজ্যন্তে বিদ্বাংসোঽপি নকারণম্
উদারসারা মহতী রুরুসংঘোপমা চমূঃ
103.20
পরস্পরজ্ঞাঃ সংহৃষ্টাস্ত্যক্তপ্রাণাঃ সুনিশ্চিতাঃ
অপি পঞ্চাশতিঃ শূরা মৃদ্নন্তি পরবাহিনীম্
103.21
অথ বা পঞ্চ ষট্সপ্ত সহিতাঃ কৃতনিশ্চয়াঃ
কুলীনাঃ পূজিতাঃ সম্যগ্বিজয়ন্তীহ শাত্রবান্
103.22
সংনিপাতো ন গন্তব্যঃ শক্যে সতি কথংচন
সান্ত্বভেদপ্রদানানাং যুদ্ধমুত্তরমুচ্যতে
103.23
সংসর্পণাদ্ধি সেনায়া ভয়ং ভীরূন্প্রবাধতে
বজ্রাদিব প্রজ্বলিতাদিয়ং ক্ব নু পতিষ্যতি
103.24
অভিপ্রয়াতাং সমিতিং জ্ঞাত্বা যে প্রতিয়ান্ত্যথ
তেষাং স্পন্দন্তি গাত্রাণি যোধানাং বিষয়স্য চ
103.25
বিষয়ো ব্যথতে রাজন্সর্বঃ সস্থাণুজঙ্গমঃ
শস্ত্রপ্রতাপতপ্তানাং মজ্জা সীদতি দেহিনাম্
103.26
তেষাং সান্ত্বং ক্রূরমিশ্রং প্রণেতব্যং পুনঃ পুনঃ
সংপীড্যমানা হি পরে যোগমায়ান্তি সর্বশঃ
103.27
অন্তরাণাং চ ভেদার্থং চারানভ্যবচারয়েৎ
যশ্চ তস্মাত্পরো রাজা তেন সংধিঃ প্রশস্যতে
103.28
ন হি তস্যান্যথা পীডা শক্যা কর্তুং তথাবিধা
যথা সার্ধমমিত্রেণ সর্বতঃ প্রতিবাধনম্
103.29
ক্ষমা বৈ সাধুমায়া হি ন হি সাধ্বক্ষমা সদা
ক্ষমায়াশ্চাক্ষমায়াশ্চ বিদ্ধি পার্থ প্রয়োজনম্
103.30
বিজিত্য ক্ষমমাণস্য যশো রাজ্ঞোঽভিবর্ধতে
মহাপরাধা হ্যপ্যস্মিন্বিশ্বসন্তি হি শত্রবঃ
103.31
মন্যতে কর্শয়িত্বা তু ক্ষমা সাধ্বিতি শম্বরঃ
অসংতপ্তং তু যদ্দারু প্রত্যেতি প্রকৃতিং পুনঃ
103.32
নৈতত্প্রশংসন্ত্যাচার্যা ন চ সাধু নিদর্শনম্
অক্লেশেনাবিনাশেন নিয়ন্তব্যাঃ স্বপুত্রবৎ
103.33
দ্বেষ্যো ভবতি ভূতানামুগ্রো রাজা যুধিষ্ঠির
মৃদুমপ্যবমন্যন্তে তস্মাদুভয়ভাগ্ভবেৎ
103.34
প্রহরিষ্যন্প্রিয়ং ব্রূয়াত্প্রহরন্নপি ভারত
প্রহৃত্য চ কৃপায়েত শোচন্নিব রুদন্নিব
103.35
ন মে প্রিয়ং যত্স হতঃ সংপ্রাহৈবং পুরো বচঃ
ন চকর্থ চ মে বাক্যমুচ্যমানঃ পুনঃ পুনঃ
103.36
অহো জীবিতমাকাঙ্ক্ষে নেদৃশো বধমর্হতি
সুদুর্লভাঃ সুপুরুষাঃ সংগ্রামেষ্বপলায়িনঃ
103.37
কৃতং মমাপ্রিয়ং তেন যেনায়ং নিহতো মৃধে
ইতি বাচা বদন্হন্তৄন্পূজয়েত রহোগতঃ
103.38
হন্তৄণাং চাহতানাং চ যত্কুর্যুরপরাধিনঃ
ক্রোশেদ্বাহুং প্রগৃহ্যাপি চিকীর্ষঞ্জনসংগ্রহম্
103.39
এবং সর্বাস্ববস্থাসু সান্ত্বপূর্বং সমাচরন্
প্রিয়ো ভবতি ভূতানাং ধর্মজ্ঞো বীতভীর্নৃপঃ
103.40
বিশ্বাসং চাত্র গচ্ছন্তি সর্বভূতানি ভারত
বিশ্বস্তঃ শক্যতে ভোক্তুং যথাকামমুপস্থিতঃ
103.41
তস্মাদ্বিশ্বাসয়েদ্রাজা সর্বভূতান্যমায়য়া
সর্বতঃ পরিরক্ষেচ্চ যো মহীং ভোক্তুমিচ্ছতি