UtshovChapter 103
103.1
युधिष्ठिर उवाच
जैत्र्या वा कानि रूपाणि भवन्ति पुरुषर्षभ
पृतनायाः प्रशस्तानि तानीहेच्छामि वेदितुम्
Yudhishthira uvacha
Jaitrya va kani rupani bhavanti purusharshabha
Pritanayah prashastani tanihechchhami veditum
103.2
भीष्म उवाच
जैत्र्या वा यानि रूपाणि भवन्ति पुरुषर्षभ
पृतनायाः प्रशस्तानि तानि वक्ष्यामि सर्वशः
Bhishma uvacha
Jaitrya va yani rupani bhavanti purusharshabha
Pritanayah prashastani tani vakshyami sarvashah
103.3
दैवं पूर्वं विकुरुते मानुषे कालचोदिते
तद्विद्वांसोऽनुपश्यन्ति ज्ञानदीर्घेण चक्षुषा
Daivam purvam vikurute manushe kalachodite
Tadvidvansonupashyanti gyanadirghena chakshusha
103.4
प्रायश्चित्तविधिं चात्र जपहोमांश्च तद्विदः
मङ्गलानि च कुर्वन्तः शमयन्त्यहितान्यपि
Prayashchittavidhim chatra japahomanshcha tadvidah
Mangalani cha kurvantah shamayantyahitanyapi
103.5
उदीर्णमनसो योधा वाहनानि च भारत
यस्यां भवन्ति सेनायां ध्रुवं तस्यां जयं वदेत्
Udirnamanaso yodha vahanani cha bharata
Yasyam bhavanti senayam dhruvam tasyam jayam vadet
103.6
अन्वेनां वायवो वान्ति तथैवेन्द्रधनूंषि च
अनुप्लवन्ते मेघाश्च तथादित्यस्य रश्मयः
Anvenam vayavo vanti tathaivendradhanunshi cha
Anuplavante meghashcha tathadityasya rashmayah
103.7
गोमायवश्चानुलोमा वडा गृध्राश्च सर्वशः
आचरेयुर्यदा सेनां तदा सिद्धिरनुत्तमा
Gomayavashchanuloma vada gridhrashcha sarvashah
Achareyuryada senam tada siddhiranuttama
103.8
प्रसन्नभाः पावक ऊर्ध्वरश्मिः; प्रदक्षिणावर्तशिखो विधूमः
पुण्या गन्धाश्चाहुतीनां प्रवान्ति; जयस्यैतद्भाविनो रूपमाहुः
Prasannabhah pavaka urdhvarashmih; pradakshinavartashikho vidhumah
Punya gandhashchahutinam pravanti; jayasyaitadbhavino rupamahuh
103.9
गम्भीरशब्दाश्च महास्वनाश्च; शङ्खाश्च भेर्यश्च नदन्ति यत्र
युयुत्सवश्चाप्रतीपा भवन्ति; जयस्यैतद्भाविनो रूपमाहुः
Gambhirashabdashcha mahasvanashcha; shankhashcha bheryashcha nadanti yatra
Yuyutsavashchapratipa bhavanti; jayasyaitadbhavino rupamahuh
103.10
इष्टा मृगाः पृष्ठतो वामतश्च; संप्रस्थितानां च गमिष्यतां च
जिघांसतां दक्षिणाः सिद्धिमाहु;र्ये त्वग्रतस्ते प्रतिषेधयन्ति
Ishta mrigah prishthato vamatashcha; samprasthitanam cha gamishyatam cha
Jighansatam dakshinah siddhimahu;rye tvagrataste pratishedhayanti
103.11
मङ्गल्यशब्दाः शकुना वदन्ति; हंसाः क्रौञ्चाः शतपत्राश्च चाषाः
हृष्टा योधाः सत्त्ववन्तो भवन्ति; जयस्यैतद्भाविनो रूपमाहुः
Mangalyashabdah shakuna vadanti; hansah kraunchah shatapatrashcha chashah
Hrishta yodhah sattvavanto bhavanti; jayasyaitadbhavino rupamahuh
103.12
शस्त्रैः पत्रैः कवचैः केतुभिश्च; सुभानुभिर्मुखवर्णैश्च यूनाम्
भ्राजिष्मती दुष्प्रतिप्रेक्षणीया; येषां चमूस्तेऽभिभवन्ति शत्रून्
Shastraih patraih kavachaih ketubhishcha; subhanubhirmukhavarnaishcha yunam
Bhrajishmati dushpratiprekshaniya; yesham chamustebhibhavanti shatrun
103.13
शुश्रूषवश्चानभिमानिनश्च; परस्परं सौहृदमास्थिताश्च
येषां योधाः शौचमनुष्ठिताश्च; जयस्यैतद्भाविनो रूपमाहुः
Shushrushavashchanabhimaninashcha; parasparam sauhridamasthitashcha
Yesham yodhah shauchamanushthitashcha; jayasyaitadbhavino rupamahuh
103.14
शब्दाः स्पर्शास्तथा गन्धा विचरन्ति मनःप्रियाः
धैर्यं चाविशते योधान्विजयस्य मुखं तु तत्
Shabdah sparshastatha gandha vicharanti manahpriyah
Dhairyam chavishate yodhanvijayasya mukham tu tat
103.15
इष्टो वामः प्रविष्टस्य दक्षिणः प्रविविक्षतः
पश्चात्संसाधयत्यर्थं पुरस्तात्प्रतिषेधति
Ishto vamah pravishtasya dakshinah pravivikshatah
Pashchatsansadhayatyartham purastatpratishedhati
103.16
संभृत्य महतीं सेनां चतुरङ्गां युधिष्ठिर
साम्नैवावर्तने पूर्वं प्रयतेथास्ततो युधि
Sambhritya mahatim senam chaturangam yudhishthira
Samnaivavartane purvam prayatethastato yudhi
103.17
जघन्य एष विजयो यद्युद्धं नाम भारत
यादृच्छिको युधि जयो दैवो वेति विचारणम्
Jaghanya esha vijayo yadyuddham nama bharata
Yadrichchhiko yudhi jayo daivo veti vicharanam
103.18
अपामिव महावेगस्त्रस्ता मृगगणा इव
दुर्निवार्यतमा चैव प्रभग्ना महती चमूः
Apamiva mahavegastrasta mrigagana iva
Durnivaryatama chaiva prabhagna mahati chamuh
103.19
भग्ना इत्येव भज्यन्ते विद्वांसोऽपि नकारणम्
उदारसारा महती रुरुसंघोपमा चमूः
Bhagna ityeva bhajyante vidvansopi nakaranam
Udarasara mahati rurusanghopama chamuh
103.20
परस्परज्ञाः संहृष्टास्त्यक्तप्राणाः सुनिश्चिताः
अपि पञ्चाशतिः शूरा मृद्नन्ति परवाहिनीम्
Parasparagyah sanhrishtastyaktapranah sunishchitah
Api panchashatih shura mridnanti paravahinim
103.21
अथ वा पञ्च षट्सप्त सहिताः कृतनिश्चयाः
कुलीनाः पूजिताः सम्यग्विजयन्तीह शात्रवान्
Atha va pancha shatsapta sahitah kritanishchayah
Kulinah pujitah samyagvijayantiha shatravan
103.22
संनिपातो न गन्तव्यः शक्ये सति कथंचन
सान्त्वभेदप्रदानानां युद्धमुत्तरमुच्यते
Sannipato na gantavyah shakye sati kathanchana
Santvabhedapradananam yuddhamuttaramuchyate
103.23
संसर्पणाद्धि सेनाया भयं भीरून्प्रबाधते
वज्रादिव प्रज्वलितादियं क्व नु पतिष्यति
Sansarpanaddhi senaya bhayam bhirunprabadhate
Vajradiva prajvalitadiyam kva nu patishyati
103.24
अभिप्रयातां समितिं ज्ञात्वा ये प्रतियान्त्यथ
तेषां स्पन्दन्ति गात्राणि योधानां विषयस्य च
Abhiprayatam samitim gyatva ye pratiyantyatha
Tesham spandanti gatrani yodhanam vishayasya cha
103.25
विषयो व्यथते राजन्सर्वः सस्थाणुजङ्गमः
शस्त्रप्रतापतप्तानां मज्जा सीदति देहिनाम्
Vishayo vyathate rajansarvah sasthanujangamah
Shastrapratapataptanam majja sidati dehinam
103.26
तेषां सान्त्वं क्रूरमिश्रं प्रणेतव्यं पुनः पुनः
संपीड्यमाना हि परे योगमायान्ति सर्वशः
Tesham santvam kruramishram pranetavyam punah punah
Sampidyamana hi pare yogamayanti sarvashah
103.27
अन्तराणां च भेदार्थं चारानभ्यवचारयेत्
यश्च तस्मात्परो राजा तेन संधिः प्रशस्यते
Antaranam cha bhedartham charanabhyavacharayet
Yashcha tasmatparo raja tena sandhih prashasyate
103.28
न हि तस्यान्यथा पीडा शक्या कर्तुं तथाविधा
यथा सार्धममित्रेण सर्वतः प्रतिबाधनम्
Na hi tasyanyatha pida shakya kartum tathavidha
Yatha sardhamamitrena sarvatah pratibadhanam
103.29
क्षमा वै साधुमाया हि न हि साध्वक्षमा सदा
क्षमायाश्चाक्षमायाश्च विद्धि पार्थ प्रयोजनम्
Kshama vai sadhumaya hi na hi sadhvakshama sada
Kshamayashchakshamayashcha viddhi partha prayojanam
103.30
विजित्य क्षममाणस्य यशो राज्ञोऽभिवर्धते
महापराधा ह्यप्यस्मिन्विश्वसन्ति हि शत्रवः
Vijitya kshamamanasya yasho ragyobhivardhate
Mahaparadha hyapyasminvishvasanti hi shatravah
103.31
मन्यते कर्शयित्वा तु क्षमा साध्विति शम्बरः
असंतप्तं तु यद्दारु प्रत्येति प्रकृतिं पुनः
Manyate karshayitva tu kshama sadhviti shambarah
Asantaptam tu yaddaru pratyeti prakritim punah
103.32
नैतत्प्रशंसन्त्याचार्या न च साधु निदर्शनम्
अक्लेशेनाविनाशेन नियन्तव्याः स्वपुत्रवत्
Naitatprashansantyacharya na cha sadhu nidarshanam
Akleshenavinashena niyantavyah svaputravat
103.33
द्वेष्यो भवति भूतानामुग्रो राजा युधिष्ठिर
मृदुमप्यवमन्यन्ते तस्मादुभयभाग्भवेत्
Dveshyo bhavati bhutanamugro raja yudhishthira
Mridumapyavamanyante tasmadubhayabhagbhavet
103.34
प्रहरिष्यन्प्रियं ब्रूयात्प्रहरन्नपि भारत
प्रहृत्य च कृपायेत शोचन्निव रुदन्निव
Praharishyanpriyam bruyatpraharannapi bharata
Prahritya cha kripayeta shochanniva rudanniva
103.35
न मे प्रियं यत्स हतः संप्राहैवं पुरो वचः
न चकर्थ च मे वाक्यमुच्यमानः पुनः पुनः
Na me priyam yatsa hatah samprahaivam puro vachah
Na chakartha cha me vakyamuchyamanah punah punah
103.36
अहो जीवितमाकाङ्क्षे नेदृशो वधमर्हति
सुदुर्लभाः सुपुरुषाः संग्रामेष्वपलायिनः
Aho jivitamakankshe nedrisho vadhamarhati
Sudurlabhah supurushah sangrameshvapalayinah
103.37
कृतं ममाप्रियं तेन येनायं निहतो मृधे
इति वाचा वदन्हन्तॄन्पूजयेत रहोगतः
Kritam mamapriyam tena yenayam nihato mridhe
Iti vacha vadanhantrinpujayeta rahogatah
103.38
हन्तॄणां चाहतानां च यत्कुर्युरपराधिनः
क्रोशेद्बाहुं प्रगृह्यापि चिकीर्षञ्जनसंग्रहम्
Hantrinam chahatanam cha yatkuryuraparadhinah
Kroshedbahum pragrihyapi chikirshanjanasangraham
103.39
एवं सर्वास्ववस्थासु सान्त्वपूर्वं समाचरन्
प्रियो भवति भूतानां धर्मज्ञो वीतभीर्नृपः
Evam sarvasvavasthasu santvapurvam samacharan
Priyo bhavati bhutanam dharmagyo vitabhirnripah
103.40
विश्वासं चात्र गच्छन्ति सर्वभूतानि भारत
विश्वस्तः शक्यते भोक्तुं यथाकाममुपस्थितः
Vishvasam chatra gachchhanti sarvabhutani bharata
Vishvastah shakyate bhoktum yathakamamupasthitah
103.41
तस्माद्विश्वासयेद्राजा सर्वभूतान्यमायया
सर्वतः परिरक्षेच्च यो महीं भोक्तुमिच्छति
Tasmadvishvasayedraja sarvabhutanyamayaya
Sarvatah parirakshechcha yo mahim bhoktumichchhati