অধ্যায় 102

102.1

যুধিষ্ঠির উবাচ
কিংশীলাঃ কিংসমুত্থানাঃ কথংরূপাশ্চ ভারত
কিংসংনাহাঃ কথংশস্ত্রা জনাঃ স্যুঃ সংয়ুগে নৃপ

ভীষ্ম উবাচ
যথাচরিতমেবাত্র শস্ত্রপত্রং বিধীয়তে
আচারাদেব পুরুষস্তথা কর্মসু বর্ততে

গান্ধারাঃ সিন্ধুসৌবীরা নখরপ্রাসয়োধিনঃ
আভীরবঃ সুবলিনস্তদ্বলং সর্বপারগম্

সর্বশস্ত্রেষু কুশলাঃ সত্ত্ববন্তো হ্যুশীনরাঃ
প্রাচ্যা মাতঙ্গয়ুদ্ধেষু কুশলাঃ শঠয়োধিনঃ

তথা যবনকাম্বোজা মথুরামভিতশ্চ যে
এতে নিয়ুদ্ধকুশলা দাক্ষিণাত্যাসিচর্মিণঃ

সর্বত্র শূরা জায়ন্তে মহাসত্ত্বা মহাবলাঃ
প্রায় এষ সমুদ্দিষ্টো লক্ষণানি তু মে শৃণু

সিংহশার্দূলবাঙ্নেত্রাঃ সিংহশার্দূলগামিনঃ
পারাবতকুলিঙ্গাক্ষাঃ সর্বে শূরাঃ প্রমাথিনঃ

মৃগস্বরা দ্বীপিনেত্রা ঋষভাক্ষাস্তথাপরে
প্রবাদিনঃ সুচণ্ডাশ্চ ক্রোধিনঃ কিংনরীস্বনাঃ

মেঘস্বনাঃ ক্রুদ্ধমুখাঃ কেচিত্করভনিস্বনাঃ
জিহ্মনাসানুজঙ্ঘাশ্চ দূরগা দূরপাতিনঃ

বিডালকুব্জাস্তনবস্তনুকেশাস্তনুত্বচঃ
শূরাশ্চপলচিত্তাশ্চ তে ভবন্তি দুরাসদাঃ

গোধানিমীলিতাঃ কেচিন্মৃদুপ্রকৃতয়োঽপি চ
তুরংগগতিনির্ঘোষাস্তে নরাঃ পারয়িষ্ণবঃ

সুসংহতাঃ প্রতনবো ব্যূঢোরস্কাঃ সুসংস্থিতাঃ
প্রবাদিতেন নৃত্যন্তি হৃষ্যন্তি কলহেষু চ

গম্ভীরাক্ষা নিঃসৃতাক্ষাঃ পিঙ্গলা ভ্রুকুটীমুখাঃ
নকুলাক্ষাস্তথা চৈব সর্বে শূরাস্তনুত্যজঃ

জিহ্মাক্ষাঃ প্রললাটাশ্চ নির্মাংসহনবোঽপি চ
বক্রবাহ্বঙ্গুলীসক্তাঃ কৃশা ধমনিসংততাঃ

প্রবিশন্ত্যতিবেগেন সংপরায়েঽভ্যুপস্থিতে
বারণা ইব সংমত্তাস্তে ভবন্তি দুরাসদাঃ

দীপ্তস্ফুটিতকেশান্তাঃ স্থূলপার্শ্বহনূমুখাঃ
উন্নতাংসাঃ পৃথুগ্রীবা বিকটাঃ স্থূলপিণ্ডিকাঃ

উদ্বৃত্তাশ্চৈব সুগ্রীবা বিনতা বিহগা ইব
পিণ্ডশীর্ষাহিবক্ত্রাশ্চ বৃষদংশমুখা ইব

উগ্রস্বনা মন্যুমন্তো যুদ্ধেষ্বারাবসারিণঃ
অধর্মজ্ঞাবলিপ্তাশ্চ ঘোরা রৌদ্রপ্রদর্শিনঃ

ত্যক্তাত্মানঃ সর্ব এতে অন্ত্যজা হ্যনিবর্তিনঃ
পুরস্কার্যাঃ সদা সৈন্যে হন্যন্তে ঘ্নন্তি চাপি তে

অধার্মিকা ভিন্নবৃত্তাঃ সাধ্বেবৈষাং পরাভবঃ
এবমেব প্রকুপ্যন্তি রাজ্ঞোঽপ্যেতে হ্যভীক্ষ্ণশঃ