Utshovঅধ্যায় 101
101.1
যুধিষ্ঠির উবাচ
যথা জয়ার্থিনঃ সেনাং নয়ন্তি ভরতর্ষভ
ঈষদ্ধর্মং প্রপীড্যাপি তন্মে ব্রূহি পিতামহ
101.2
ভীষ্ম উবাচ
সত্যেন হি স্থিতা ধর্মা উপপত্ত্যা তথাপরে
সাধ্বাচারতয়া কেচিত্তথৈবৌপয়িকা অপি
উপায়ধর্মান্বক্ষ্যামি সিদ্ধার্থানর্থধর্ময়োঃ
101.3
নির্মর্যাদা দস্যবস্তু ভবন্তি পরিপন্থিনঃ
তেষাং প্রতিবিঘাতার্থং প্রবক্ষ্যাম্যথ নৈগমম্
কার্যাণাং সংপ্রসিদ্ধ্যর্থং তানুপায়ান্নিবোধ মে
101.4
উভে প্রজ্ঞে বেদিতব্যে ঋজ্বী বক্রা চ ভারত
জানন্বক্রাং ন সেবেত প্রতিবাধেত চাগতাম্
101.5
অমিত্রা এব রাজানং ভেদেনোপচরন্ত্যুত
তাং রাজা নিকৃতিং জানন্যথামিত্রান্প্রবাধতে
101.6
গজানাং পার্শ্বচর্মাণি গোবৃষাজগরাণি চ
শল্যকঙ্কটলোহানি তনুত্রাণি মতানি চ
101.7
শিতপীতানি শস্ত্রাণি সংনাহাঃ পীতলোহিতাঃ
নানারঞ্জনরক্তাঃ স্যুঃ পতাকাঃ কেতবশ্চ তে
101.8
ঋষ্টয়স্তোমরাঃ খড্গা নিশিতাশ্চ পরশ্বধাঃ
ফলকান্যথ চর্মাণি প্রতিকল্প্যান্যনেকশঃ
অভিনীতানি শস্ত্রাণি যোধাশ্চ কৃতনিশ্রমাঃ
101.9
চৈত্র্যাং বা মার্গশীর্ষ্যাং বা সেনায়োগঃ প্রশস্যতে
পক্বসস্যা হি পৃথিবী ভবত্যম্বুমতী তথা
101.10
নৈবাতিশীতো নাত্যুষ্ণঃ কালো ভবতি ভারত
তস্মাত্তদা যোজয়েত পরেষাং ব্যসনেষু বা
এতেষু যোগাঃ সেনায়াঃ প্রশস্তাঃ পরবাধনে
101.11
জলবাংস্তৃণবান্মার্গঃ সমো গম্যঃ প্রশস্যতে
চারৈর্হি বিহিতাভ্যাসঃ কুশলৈর্বনগোচরৈঃ
101.12
নব্যারণ্যৈর্ন শক্যেত গন্তুং মৃগগণৈরিব
তস্মাত্সর্বাসু সেনাসু যোজয়ন্তি জয়ার্থিনঃ
101.13
আবাসস্তোয়বান্দুর্গঃ পর্যাকাশঃ প্রশস্যতে
পরেষামুপসর্পাণাং প্রতিষেধস্তথা ভবেৎ
101.14
আকাশং তু বনাভ্যাশে মন্যন্তে গুণবত্তরম্
বহুভির্গুণজাতৈস্তু যে যুদ্ধকুশলা জনাঃ
101.15
উপন্যাসোঽপসর্পাণাং পদাতীনাং চ গূহনম্
অথ শত্রুপ্রতীঘাতমাপদর্থং পরায়ণম্
101.16
সপ্তর্ষীন্পৃষ্ঠতঃ কৃত্বা যুধ্যেরন্নচলা ইব
অনেন বিধিনা রাজঞ্জিগীষেতাপি দুর্জয়ান্
101.17
যতো বায়ুর্যতঃ সূর্যো যতঃ শুক্রস্ততো জয়ঃ
পূর্বং পূর্বং জ্যায় এষাং সংনিপাতে যুধিষ্ঠির
101.18
অকর্দমামনুদকামমর্যাদামলোষ্টকাম্
অশ্বভূমিং প্রশংসন্তি যে যুদ্ধকুশলা জনাঃ
101.19
সমা নিরুদকাকাশা রথভূমিঃ প্রশস্যতে
নীচদ্রুমা মহাকক্ষা সোদকা হস্তিয়োধিনাম্
101.20
বহুদুর্গা মহাবৃক্ষা বেত্রবেণুভিরাস্তৃতা
পদাতীনাং ক্ষমা ভূমিঃ পর্বতোপবনানি চ
101.21
পদাতিবহুলা সেনা দৃঢা ভবতি ভারত
রথাশ্ববহুলা সেনা সুদিনেষু প্রশস্যতে
101.22
পদাতিনাগবহুলা প্রাবৃট্কালে প্রশস্যতে
গুণানেতান্প্রসংখ্যায় দেশকালৌ প্রয়োজয়েৎ
101.23
এবং সংচিন্ত্য যো যাতি তিথিনক্ষত্রপূজিতঃ
বিজয়ং লভতে নিত্যং সেনাং সম্যক্প্রয়োজয়ন্
101.24
প্রসুপ্তাংস্তৃষিতাঞ্শ্রান্তান্প্রকীর্ণান্নাভিঘাতয়েৎ
মোক্ষে প্রয়াণে চলনে পানভোজনকালয়োঃ
101.25
অতিক্ষিপ্তান্ব্যতিক্ষিপ্তান্বিহতান্প্রতনূকৃতান্
সুবিস্রম্ভান্কৃতারম্ভানুপন্যাসপ্রতাপিতান্
বহিশ্চরানুপন্যাসান্কৃত্বা বেশ্মানুসারিণঃ
101.26
পারংপর্যাগতে দ্বারে যে কেচিদনুবর্তিনঃ
পরিচর্যাবরোদ্ধারো যে চ কেচন বল্গিনঃ
101.27
অনীকং যে প্রভিন্দন্তি ভিন্নং যে স্থগয়ন্তি চ
সমানাশনপানাস্তে কার্যা দ্বিগুণবেতনাঃ
101.28
দশাধিপতয়ঃ কার্যাঃ শতাধিপতয়স্তথা
তেষাং সহস্রাধিপতিং কুর্যাচ্ছূরমতন্দ্রিতম্
101.29
যথামুখ্যং সংনিপাত্য বক্তব্যাঃ স্ম শপামহে
যথা জয়ার্থং সংগ্রামে ন জহ্যাম পরস্পরম্
101.30
ইহৈব তে নিবর্তন্তাং যে নঃ কেচন ভীরবঃ
ন ঘাতয়েয়ুঃ প্রদরং কুর্বাণাস্তুমুলে সতি
101.31
আত্মানং চ স্বপক্ষং চ পলায়ন্হন্তি সংয়ুগে
দ্রব্যনাশো বধোঽকীর্তিরয়শশ্চ পলায়নে
101.32
অমনোজ্ঞাসুখা বাচঃ পুরুষস্য পলায়তঃ
প্রতিস্পন্দৌষ্ঠদন্তস্য ন্যস্তসর্বায়ুধস্য চ
101.33
হিত্বা পলায়মানস্য সহায়ান্প্রাণসংশয়ে
অমিত্রৈরনুবদ্ধস্য দ্বিষতামস্তু নস্তথা
101.34
মনুষ্যাপসদা হ্যেতে যে ভবন্তি পরাঙ্মুখাঃ
রাশিবর্ধনমাত্রাস্তে নৈব তে প্রেত্য নো ইহ
101.35
অমিত্রা হৃষ্টমনসঃ প্রত্যুদ্যান্তি পলায়িনম্
জয়িনং সুহৃদস্তাত বন্দনৈর্মঙ্গলেন চ
101.36
যস্য স্ম ব্যসনে রাজন্ননুমোদন্তি শত্রবঃ
তদসহ্যতরং দুঃখমহং মন্যে বধাদপি
101.37
শ্রিয়ং জানীত ধর্মস্য মূলং সর্বসুখস্য চ
সা ভীরূণাং পরান্যাতি শূরস্তামধিগচ্ছতি
101.38
তে বয়ং স্বর্গমিচ্ছন্তঃ সংগ্রামে ত্যক্তজীবিতাঃ
জয়ন্তো বধ্যমানা বা প্রাপ্তুমর্হাম সদ্গতিম্
101.39
এবং সংশপ্তশপথাঃ সমভিত্যক্তজীবিতাঃ
অমিত্রবাহিনীং বীরাঃ সংপ্রগাহন্ত্যভীরবঃ
101.40
অগ্রতঃ পুরুষানীকমসিচর্মবতাং ভবেৎ
পৃষ্ঠতঃ শকটানীকং কলত্রং মধ্যতস্তথা
101.41
পরেষাং প্রতিঘাতার্থং পদাতীনাং চ গূহনম্
অপি হ্যস্মিন্পরে গৃদ্ধা ভবেয়ুর্যে পুরোগমাঃ
101.42
যে পুরস্তাদভিমতাঃ সত্ত্ববন্তো মনস্বিনঃ
তে পূর্বমভিবর্তেরংস্তানন্বগিতরে জনাঃ
101.43
অপি চোদ্ধর্ষণং কার্যং ভীরূণামপি যত্নতঃ
স্কন্ধদর্শনমাত্রং তু তিষ্ঠেয়ুর্বা সমীপতঃ
101.44
সংহতান্যোধয়েদল্পান্কামং বিস্তারয়েদ্বহূন্
সূচীমুখমনীকং স্যাদল্পানাং বহুভিঃ সহ
101.45
সংপ্রয়ুদ্ধে প্রহৃষ্টে বা সত্যং বা যদি বানৃতম্
প্রগৃহ্য বাহূন্ক্রোশেত ভগ্না ভগ্নাঃ পরা ইতি
101.46
আগতং নো মিত্রবলং প্রহরধ্বমভীতবৎ
শব্দবন্তোঽনুধাবেয়ুঃ কুর্বন্তো ভৈরবং রবম্
101.47
ক্ষ্বেডাঃ কিলকিলাঃ শঙ্খাঃ ক্রকচা গোবিষাণিকান্
ভেরীমৃদঙ্গপণবান্নাদয়েয়ুশ্চ কুঞ্জরান্