Utshovঅধ্যায় 100
100.1
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
প্রতর্দনো মৈথিলশ্চ সংগ্রামং যত্র চক্রতুঃ
100.2
যজ্ঞোপবীতী সংগ্রামে জনকো মৈথিলো যথা
যোধানুদ্ধর্ষয়ামাস তন্নিবোধ যুধিষ্ঠির
100.3
জনকো মৈথিলো রাজা মহাত্মা সর্বতত্ত্ববিৎ
যোধান্স্বান্দর্শয়ামাস স্বর্গং নরকমেব চ
100.4
অভীতানামিমে লোকা ভাস্বন্তো হন্ত পশ্যত
পূর্ণা গন্ধর্বকন্যাভিঃ সর্বকামদুহোঽক্ষয়াঃ
100.5
ইমে পলায়মানানাং নরকাঃ প্রত্যুপস্থিতাঃ
অকীর্তিঃ শাশ্বতী চৈব পতিতব্যমনন্তরম্
100.6
তান্দৃষ্ট্বারীন্বিজয়তো ভূত্বা সংত্যাগবুদ্ধয়ঃ
নরকস্যাপ্রতিষ্ঠস্য মা ভূত বশবর্তিনঃ
100.7
ত্যাগমূলং হি শূরাণাং স্বর্গদ্বারমনুত্তমম্
ইত্যুক্তাস্তে নৃপতিনা যোধাঃ পরপুরংজয়
100.8
ব্যজয়ন্ত রণে শত্রূন্হর্ষয়ন্তো জনেশ্বরম্
তস্মাদাত্মবতা নিত্যং স্থাতব্যং রণমূর্ধনি
100.9
গজানাং রথিনো মধ্যে রথানামনু সাদিনঃ
সাদিনামন্তরা স্থাপ্যং পাদাতমিহ দংশিতম্
100.10
য এবং ব্যূহতে রাজা স নিত্যং জয়তে দ্বিষঃ
তস্মাদেবং বিধাতব্যং নিত্যমেব যুধিষ্ঠির
100.11
সর্বে সুকৃতমিচ্ছন্তঃ সুয়ুদ্ধেনাতিমন্যবঃ
ক্ষোভয়েয়ুরনীকানি সাগরং মকরা ইব
100.12
হর্ষয়েয়ুর্বিষণ্ণাংশ্চ ব্যবস্থাপ্য পরস্পরম্
জিতাং চ ভূমিং রক্ষেত ভগ্নান্নাত্যনুসারয়েৎ
100.13
পুনরাবর্তমানানাং নিরাশানাং চ জীবিতে
ন বেগঃ সুসহো রাজংস্তস্মান্নাত্যনুসারয়েৎ
100.14
ন হি প্রহর্তুমিচ্ছন্তি শূরাঃ প্রাদ্রবতাং ভয়াৎ
তস্মাত্পলায়মানানাং কুর্যান্নাত্যনুসারণম্
100.15
চরাণামচরা হ্যন্নমদংষ্ট্রা দংষ্ট্রিণামপি
অপাণয়ঃ পাণিমতামন্নং শূরস্য কাতরাঃ
100.16
সমানপৃষ্ঠোদরপাণিপাদাঃ; পশ্চাচ্ছূরং ভীরবোঽনুব্রজন্তি
অতো ভয়ার্তাঃ প্রণিপত্য ভূয়ঃ; কৃত্বাঞ্জলীনুপতিষ্ঠন্তি শূরান্
100.17
শূরবাহুষু লোকোঽয়ং লম্বতে পুত্রবত্সদা
তস্মাত্সর্বাস্ববস্থাসু শূরঃ সংমানমর্হতি
100.18
ন হি শৌর্যাত্পরং কিংচিত্ত্রিষু লোকেষু বিদ্যতে
শূরঃ সর্বং পালয়তি সর্বং শূরে প্রতিষ্ঠিতম্