Utshovঅধ্যায় 99
99.1
যুধিষ্ঠির উবাচ
কে লোকা যুধ্যমানানাং শূরাণামনিবর্তিনাম্
ভবন্তি নিধনং প্রাপ্য তন্মে ব্রূহি পিতামহ
99.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
অম্বরীষস্য সংবাদমিন্দ্রস্য চ যুধিষ্ঠির
99.3
অম্বরীষো হি নাভাগঃ স্বর্গং গত্বা সুদুর্লভম্
দদর্শ সুরলোকস্থং শক্রেণ সচিবং সহ
99.4
সর্বতেজোময়ং দিব্যং বিমানবরমাস্থিতম্
উপর্যুপরি গচ্ছন্তং স্বং বৈ সেনাপতিং প্রভুম্
99.5
স দৃষ্ট্বোপরি গচ্ছন্তং সেনাপতিমুদারধীঃ
ঋদ্ধিং দৃষ্ট্বা সুদেবস্য বিস্মিতঃ প্রাহ বাসবম্
99.6
সাগরান্তাং মহীং কৃত্স্নামনুশিষ্য যথাবিধি
চাতুর্বর্ণ্যে যথাশাস্ত্রং প্রবৃত্তো ধর্মকাম্যয়া
99.7
ব্রহ্মচর্যেণ ঘোরেণ আচার্যকুলসেবয়া
বেদানধীত্য ধর্মেণ রাজশাস্ত্রং চ কেবলম্
99.8
অতিথীনন্নপানেন পিতৄংশ্চ স্বধয়া তথা
ঋষীন্স্বাধ্যায়দীক্ষাভির্দেবান্যজ্ঞৈরনুত্তমৈঃ
99.9
ক্ষত্রধর্মে স্থিতো ভূত্বা যথাশাস্ত্রং যথাবিধি
উদীক্ষমাণঃ পৃতনাং জয়ামি যুধি বাসব
99.10
দেবরাজ সুদেবোঽয়ং মম সেনাপতিঃ পুরা
আসীদ্যোধঃ প্রশান্তাত্মা সোঽয়ং কস্মাদতীব মাম্
99.11
নানেন ক্রতুভির্মুখ্যৈরিষ্টং নৈব দ্বিজাতয়ঃ
তর্পিতা বিধিবচ্ছক্র সোঽয়ং কস্মাদতীব মাম্
99.12
ইন্দ্র উবাচ
এতস্য বিততস্তাত সুদেবস্য বভূব হ
সংগ্রাময়জ্ঞঃ সুমহান্যশ্চান্যো যুধ্যতে নরঃ
99.13
সংনদ্ধো দীক্ষিতঃ সর্বো যোধঃ প্রাপ্য চমূমুখম্
যুদ্ধয়জ্ঞাধিকারস্থো ভবতীতি বিনিশ্চয়ঃ
99.14
অম্বরীষ উবাচ
কানি যজ্ঞে হবীংষ্যত্র কিমাজ্যং কা চ দক্ষিণা
ঋত্বিজশ্চাত্র কে প্রোক্তাস্তন্মে ব্রূহি শতক্রতো
99.15
ইন্দ্র উবাচ
ঋত্বিজঃ কুঞ্জরাস্তত্র বাজিনোঽধ্বর্যবস্তথা
হবীংষি পরমাংসানি রুধিরং ত্বাজ্যমেব চ
99.16
সৃগালগৃধ্রকাকোলাঃ সদস্যাস্তত্র সত্রিণঃ
আজ্যশেষং পিবন্ত্যেতে হবিঃ প্রাশ্নন্তি চাধ্বরে
99.17
প্রাসতোমরসংঘাতাঃ খড্গশক্তিপরশ্বধাঃ
জ্বলন্তো নিশিতাঃ পীতাঃ স্রুচস্তস্যাথ সত্রিণঃ
99.18
চাপবেগায়তস্তীক্ষ্ণঃ পরকায়াবদারণঃ
ঋজুঃ সুনিশিতঃ পীতঃ সায়কোঽস্য স্রুবো মহান্
99.19
দ্বীপিচর্মাবনদ্ধশ্চ নাগদন্তকৃতত্সরুঃ
হস্তিহস্তগতঃ খড্গঃ স্ফ্যো ভবেত্তস্য সংয়ুগে
99.20
জ্বলিতৈর্নিশিতৈঃ পীতৈঃ প্রাসশক্তিপরশ্বধৈঃ
শৈক্যায়সময়ৈস্তীক্ষ্ণৈরভিঘাতো ভবেদ্বসু
99.21
আবেগাদ্যত্তু রুধিরং সংগ্রামে স্যন্দতে ভুবি
সাস্য পূর্ণাহুতির্হোত্রে সমৃদ্ধা সর্বকামধুক্
99.22
ছিন্ধি ভিন্ধীতি যস্যৈতচ্ছ্রূয়তে বাহিনীমুখে
সামানি সামগাস্তস্য গায়ন্তি যমসাদনে
99.23
হবির্ধানং তু তস্যাহুঃ পরেষাং বাহিনীমুখম্
কুঞ্জরাণাং হয়ানাং চ বর্মিণাং চ সমুচ্চয়ঃ
অগ্নিঃ শ্যেনচিতো নাম তস্য যজ্ঞে বিধীয়তে
99.24
উত্তিষ্ঠতি কবন্ধোঽত্র সহস্রে নিহতে তু যঃ
স যূপস্তস্য শূরস্য খাদিরোঽষ্টাশ্রিরুচ্যতে
99.25
ইডোপহূতং ক্রোশন্তি কুঞ্জরা অঙ্কুশেরিতাঃ
ব্যাঘুষ্টতলনাদেন বষট্কারেণ পার্থিব
উদ্গাতা তত্র সংগ্রামে ত্রিসামা দুন্দুভিঃ স্মৃতঃ
99.26
ব্রহ্মস্বে হ্রিয়মাণে যঃ প্রিয়াং যুদ্ধে তনুং ত্যজেৎ
আত্মানং যূপমুচ্ছ্রিত্য স যজ্ঞোঽনন্তদক্ষিণঃ
99.27
ভর্তুরর্থে তু যঃ শূরো বিক্রমেদ্বাহিনীমুখে
ভয়ান্ন চ নিবর্তেত তস্য লোকা যথা মম
99.28
নীলচন্দ্রাকৃতৈঃ খড্গৈর্বাহুভিঃ পরিঘোপমৈঃ
যস্য বেদিরুপস্তীর্ণা তস্য লোকা যথা মম
99.29
যস্তু নাবেক্ষতে কংচিত্সহায়ং বিজয়ে স্থিতঃ
বিগাহ্য বাহিনীমধ্যং তস্য লোকা যথা মম
99.30
যস্য তোমরসংঘাটা ভেরীমণ্ডূককচ্ছপা
বীরাস্থিশর্করা দুর্গা মাংসশোণিতকর্দমা
99.31
অসিচর্মপ্লবা সিন্ধুঃ কেশশৈবলশাদ্বলা
অশ্বনাগরথৈশ্চৈব সংভিন্নৈঃ কৃতসংক্রমা
99.32
পতাকাধ্বজবানীরা হতবাহনবাহিনী
শোণিতোদা সুসংপূর্ণা দুস্তরা পারগৈর্নরৈঃ
99.33
হতনাগমহানক্রা পরলোকবহাশিবা
ঋষ্টিখড্গধ্বজানূকা গৃধ্রকঙ্কবডপ্লবা
99.34
পুরুষাদানুচরিতা ভীরূণাং কশ্মলাবহা
নদী যোধমহায়জ্ঞে তদস্যাবভৃথং স্মৃতম্
99.35
বেদী যস্য ত্বমিত্রাণাং শিরোভিরবকীর্যতে
অশ্বস্কন্ধৈর্গজস্কন্ধৈস্তস্য লোকা যথা মম
99.36
পত্নীশালা কৃতা যস্য পরেষাং বাহিনীমুখম্
হবির্ধানং স্ববাহিন্যস্তদস্যাহুর্মনীষিণঃ
99.37
সদশ্চান্তরয়োধাগ্নিরাগ্নীধ্রশ্চোত্তরাং দিশম্
শত্রুসেনাকলত্রস্য সর্বলোকানদূরতঃ
99.38
যদা তূভয়তো ব্যূহো ভবত্যাকাশমগ্রতঃ
সাস্য বেদী তথা যজ্ঞে নিত্যং বেদাস্ত্রয়োঽগ্নয়ঃ
99.39
যস্তু যোধঃ পরাবৃত্তঃ সংত্রস্তো হন্যতে পরৈঃ
অপ্রতিষ্ঠং স নরকং যাতি নাস্ত্যত্র সংশয়ঃ
99.40
যস্য শোণিতবেগেন নদী স্যাত্সমভিপ্লুতা
কেশমাংসাস্থিসংকীর্ণা স গচ্ছেত্পরমাং গতিম্
99.41
যস্তু সেনাপতিং হত্বা তদ্যানমধিরোহতি
স বিষ্ণুবিক্রমক্রামী বৃহস্পতিসমঃ ক্রতুঃ
99.42
নায়কং বা প্রমাণং বা যো বা স্যাত্তত্র পূজিতঃ
জীবগ্রাহং নিগৃহ্ণাতি তস্য লোকা যথা মম
99.43
আহবে নিহতং শূরং ন শোচেত কদাচন
অশোচ্যো হি হতঃ শূরঃ স্বর্গলোকে মহীয়তে
99.44
ন হ্যন্নং নোদকং তস্য ন স্নানং নাপ্যশৌচকম্
হতস্য কর্তুমিচ্ছন্তি তস্য লোকাঞ্শৃণুষ্ব মে
99.45
বরাপ্সরঃসহস্রাণি শূরমায়োধনে হতম্
ত্বরমাণা হি ধাবন্তি মম ভর্তা ভবেদিতি
99.46
এতত্তপশ্চ পুণ্যং চ ধর্মশ্চৈব সনাতনঃ
চত্বারশ্চাশ্রমাস্তস্য যো যুদ্ধে ন পলায়তে
99.47
বৃদ্ধং বলং ন হন্তব্যং নৈব স্ত্রী ন চ বৈ দ্বিজঃ
তৃণপূর্ণমুখশ্চৈব তবাস্মীতি চ যো বদেৎ
99.48
অহং বৃত্রং বলং পাকং শতমায়ং বিরোচনম্
দুরাবার্যং চ নমুচিং নৈকমায়ং চ শম্বরম্
99.49
বিপ্রচিত্তিং চ দৈতেয়ং দনোঃ পুত্রাংশ্চ সর্বশঃ
প্রহ্রাদং চ নিহত্যাজৌ ততো দেবাধিপোঽভবম্
99.50
ভীষ্ম উবাচ
ইত্যেতচ্ছক্রবচনং নিশম্য প্রতিগৃহ্য চ
যোধানামাত্মনঃ সিদ্ধিমম্বরীষোঽভিপন্নবান্