Utshovঅধ্যায় 98
98.1
যুধিষ্ঠির উবাচ
ক্ষত্রধর্মান্ন পাপীয়ান্ধর্মোঽস্তি ভরতর্ষভ
অভিয়ানে চ যুদ্ধে চ রাজা হন্তি মহাজনম্
98.2
অথ স্ম কর্মণা যেন লোকাঞ্জয়তি পার্থিবঃ
বিদ্বঞ্জিজ্ঞাসমানায় প্রব্রূহি ভরতর্ষভ
98.3
ভীষ্ম উবাচ
নিগ্রহেণ চ পাপানাং সাধূনাং প্রগ্রহেণ চ
যজ্ঞৈর্দানৈশ্চ রাজানো ভবন্তি শুচয়োঽমলাঃ
98.4
উপরুন্ধন্তি রাজানো ভূতানি বিজয়ার্থিনঃ
ত এব বিজয়ং প্রাপ্য বর্ধয়ন্তি পুনঃ প্রজাঃ
98.5
অপবিধ্যন্তি পাপানি দানয়জ্ঞতপোবলৈঃ
অনুগ্রহেণ ভূতানাং পুণ্যমেষাং প্রবর্ধতে
98.6
যথৈব ক্ষেত্রনির্দাতা নির্দন্বৈ ক্ষেত্রমেকদা
হিনস্তি কক্ষং ধান্যং চ ন চ ধান্যং বিনশ্যতি
98.7
এবং শস্ত্রাণি মুঞ্চন্তো ঘ্নন্তি বধ্যানথৈকদা
তস্যৈষা নিষ্কৃতিঃ কৃত্স্না ভূতানাং ভাবনং পুনঃ
98.8
যো ভূতানি ধনজ্যানাদ্বধাত্ক্লেশাচ্চ রক্ষতি
দস্যুভ্যঃ প্রাণদানাত্স ধনদঃ সুখদো বিরাট্
98.9
স সর্বয়জ্ঞৈরীজানো রাজাথাভয়দক্ষিণৈঃ
অনুভূয়েহ ভদ্রাণি প্রাপ্নোতীন্দ্রসলোকতাম্
98.10
ব্রাহ্মণার্থে সমুত্পন্নে যোঽভিনিঃসৃত্য যুধ্যতে
আত্মানং যূপমুচ্ছ্রিত্য স যজ্ঞোঽনন্তদক্ষিণঃ
98.11
অভীতো বিকিরঞ্শত্রূন্প্রতিগৃহ্ণঞ্শরাংস্তথা
ন তস্মাত্ত্রিদশাঃ শ্রেয়ো ভুবি পশ্যন্তি কিংচন
98.12
তস্য যাবন্তি শস্ত্রাণি ত্বচং ভিন্দন্তি সংয়ুগে
তাবতঃ সোঽশ্নুতে লোকান্সর্বকামদুহোঽক্ষয়ান্
98.13
ন তস্য রুধিরং গাত্রাদাবেধেভ্যঃ প্রবর্ততে
স হ তেনৈব রক্তেন সর্বপাপৈঃ প্রমুচ্যতে
98.14
যানি দুঃখানি সহতে ব্রণানামভিতাপনে
ন ততোঽস্তি তপো ভূয় ইতি ধর্মবিদো বিদুঃ
98.15
পৃষ্ঠতো ভীরবঃ সংখ্যে বর্তন্তেঽধমপূরুষাঃ
শূরাচ্ছরণমিচ্ছন্তঃ পর্জন্যাদিব জীবনম্
98.16
যদি শূরস্তথা ক্ষেমে প্রতিরক্ষেত্তথা ভয়ে
প্রতিরূপং জনাঃ কুর্যুর্ন চ তদ্বর্ততে তথা
98.17
যদি তে কৃতমাজ্ঞায় নমস্কুর্যুঃ সদৈব তম্
যুক্তং ন্যায্যং চ কুর্যুস্তে ন চ তদ্বর্ততে তথা
98.18
পুরুষাণাং সমানানাং দৃশ্যতে মহদন্তরম্
সংগ্রামেঽনীকবেলায়ামুত্ক্রুষ্টেঽভিপতত্সু চ
98.19
পতত্যভিমুখঃ শূরঃ পরান্ভীরুঃ পলায়তে
আস্থায়াস্বর্গ্যমধ্বানং সহায়ান্বিষমে ত্যজন্
98.20
মা স্ম তাংস্তাদৃশাংস্তাত জনিষ্ঠাঃ পুরুষাধমান্
যে সহায়ান্রণে হিত্বা স্বস্তিমন্তো গৃহান্যয়ুঃ
98.21
অস্বস্তি তেভ্যঃ কুর্বন্তি দেবা ইন্দ্রপুরোগমাঃ
ত্যাগেন যঃ সহায়ানাং স্বান্প্রাণাংস্ত্রাতুমিচ্ছতি
98.22
তং হন্যুঃ কাষ্ঠলোষ্টৈর্বা দহেয়ুর্বা কটাগ্নিনা
পশুবন্মারয়েয়ুর্বা ক্ষত্রিয়া যে স্যুরীদৃশাঃ
98.23
অধর্মঃ ক্ষত্রিয়স্যৈষ যচ্ছয্যামরণং ভবেৎ
বিসৃজঞ্শ্লেষ্মপিত্তানি কৃপণং পরিদেবয়ন্
98.24
অবিক্ষতেন দেহেন প্রলয়ং যোঽধিগচ্ছতি
ক্ষত্রিয়ো নাস্য তত্কর্ম প্রশংসন্তি পুরাবিদঃ
98.25
ন গৃহে মরণং তাত ক্ষত্রিয়াণাং প্রশস্যতে
শৌটীরাণামশৌটীরমধর্ম্যং কৃপণং চ তৎ
98.26
ইদং দুঃখমহো কষ্টং পাপীয় ইতি নিষ্টনন্
প্রতিধ্বস্তমুখঃ পূতিরমাত্যান্বহু শোচয়ন্
98.27
অরোগাণাং স্পৃহয়তে মুহুর্মৃত্যুমপীচ্ছতি
বীরো দৃপ্তোঽভিমানী চ নেদৃশং মৃত্যুমর্হতি
98.28
রণেষু কদনং কৃত্বা জ্ঞাতিভিঃ পরিবারিতঃ
তীক্ষ্ণৈঃ শস্ত্রৈঃ সুবিক্লিষ্টঃ ক্ষত্রিয়ো মৃত্যুমর্হতি
98.29
শূরো হি সত্যমন্যুভ্যামাবিষ্টো যুধ্যতে ভৃশম্
কৃত্যমানানি গাত্রাণি পরৈর্নৈবাববুধ্যতে
98.30
স সংখ্যে নিধনং প্রাপ্য প্রশস্তং লোকপূজিতম্
স্বধর্মং বিপুলং প্রাপ্য শক্রস্যৈতি সলোকতাম্
98.31
সর্বো যোধঃ পরং ত্যক্তুমাবিষ্টস্ত্যক্তজীবিতঃ
প্রাপ্নোতীন্দ্রস্য সালোক্যং শূরঃ পৃষ্ঠমদর্শয়ন্