অধ্যায় 97

97.1

ভীষ্ম উবাচ
নাধর্মেণ মহীং জেতুং লিপ্সেত জগতীপতিঃ
অধর্মবিজয়ং লব্ধ্বা কোঽনুমন্যেত ভূমিপঃ

অধর্ময়ুক্তো বিজয়ো হ্যধ্রুবোঽস্বর্গ্য এব চ
সাদয়ত্যেষ রাজানং মহীং চ ভরতর্ষভ

বিশীর্ণকবচং চৈব তবাস্মীতি চ বাদিনম্
কৃতাঞ্জলিং ন্যস্তশস্ত্রং গৃহীত্বা ন বিহিংসয়েৎ

বলেনাবজিতো যশ্চ ন তং যুধ্যেত ভূমিপঃ
সংবত্সরং বিপ্রণয়েত্তস্মাজ্জাতঃ পুনর্ভবেৎ

নার্বাক্সংবত্সরাত্কন্যা স্প্রষ্টব্যা বিক্রমাহৃতা
এবমেব ধনং সর্বং যচ্চান্যত্সহসাহৃতম্

ন তু বন্ধ্যং ধনং তিষ্ঠেত্পিবেয়ুর্ব্রাহ্মণাঃ পয়ঃ
যুঞ্জীরন্বাপ্যনডুহঃ ক্ষন্তব্যং বা তদা ভবেৎ

রাজ্ঞা রাজৈব যোদ্ধব্যস্তথা ধর্মো বিধীয়তে
নান্যো রাজানমভ্যসেদরাজন্যঃ কথংচন

অনীকয়োঃ সংহতয়োর্যদীয়াদ্ব্রাহ্মণোঽন্তরা
শান্তিমিচ্ছন্নুভয়তো ন যোদ্ধব্যং তদা ভবেৎ
মর্যাদাং শাশ্বতীং ভিন্দ্যাদ্ব্রাহ্মণং যোঽভিলঙ্ঘয়েৎ

অথ চেল্লঙ্ঘয়েদেনাং মর্যাদাং ক্ষত্রিয়ব্রুবঃ
অপ্রশস্যস্তদূর্ধ্বং স্যাদনাদেয়শ্চ সংসদি

যা তু ধর্মবিলোপেন মর্যাদাভেদনেন চ
তাং বৃত্তিং নানুবর্তেত বিজিগীষুর্মহীপতিঃ
ধর্মলব্ধাদ্ধি বিজয়াত্কো লাভোঽভ্যধিকো ভবেৎ

সহসা নাম্য ভূতানি ক্ষিপ্রমেব প্রসাদয়েৎ
সান্ত্বেন ভোগদানেন স রাজ্ঞাং পরমো নয়ঃ

ভুজ্যমানা হ্যয়োগেন স্বরাষ্ট্রাদভিতাপিতাঃ
অমিত্রান্পর্যুপাসীরন্ব্যসনৌঘপ্রতীক্ষিণঃ

অমিত্রোপগ্রহং চাস্য তে কুর্যুঃ ক্ষিপ্রমাপদি
সংদুষ্টাঃ সর্বতো রাজন্রাজব্যসনকাঙ্ক্ষিণঃ

নামিত্রো বিনিকর্তব্যো নাতিচ্ছেদ্যঃ কথংচন
জীবিতং হ্যপ্যতিচ্ছিন্নঃ সংত্যজত্যেকদা নরঃ

অল্পেনাপি হি সংয়ুক্তস্তুষ্যত্যেবাপরাধিকঃ
শুদ্ধং জীবিতমেবাপি তাদৃশো বহু মন্যতে

যস্য স্ফীতো জনপদঃ সংপন্নঃ প্রিয়রাজকঃ
সংতুষ্টভৃত্যসচিবো দৃঢমূলঃ স পার্থিবঃ

ঋত্বিক্পুরোহিতাচার্যা যে চান্যে শ্রুতসংমতাঃ
পূজার্হাঃ পূজিতা যস্য স বৈ লোকজিদুচ্যতে

এতেনৈব চ বৃত্তেন মহীং প্রাপ সুরোত্তমঃ
অন্বেব চৈন্দ্রং বিজয়ং ব্যজিগীষন্ত পার্থিবাঃ

ভূমিবর্জং পুরং রাজা জিত্বা রাজানমাহবে
অমৃতাশ্চৌষধীঃ শশ্বদাজহার প্রতর্দনঃ

অগ্নিহোত্রাণ্যগ্নিশেষং হবির্ভাজনমেব চ
আজহার দিবোদাসস্ততো বিপ্রকৃতোঽভবৎ

সরাজকানি রাষ্ট্রাণি নাভাগো দক্ষিণাং দদৌ
অন্যত্র শ্রোত্রিয়স্বাচ্চ তাপসস্বাচ্চ ভারত

উচ্চাবচানি বৃত্তানি ধর্মজ্ঞানাং যুধিষ্ঠির
আসন্রাজ্ঞাং পুরাণানাং সর্বং তন্মম রোচতে

সর্ববিদ্যাতিরেকাদ্বা জয়মিচ্ছেন্মহীপতিঃ
ন মায়য়া ন দম্ভেন য ইচ্ছেদ্ভূতিমাত্মনঃ