অধ্যায় 96

96.1

যুধিষ্ঠির উবাচ
অথ যো বিজিগীষেত ক্ষত্রিয়ঃ ক্ষত্রিয়ং যুধি
কস্তস্য ধর্ম্যো বিজয় এতত্পৃষ্টো ব্রবীহি মে

ভীষ্ম উবাচ
সসহায়োঽসহায়ো বা রাষ্ট্রমাগম্য ভূমিপঃ
ব্রূয়াদহং বো রাজেতি রক্ষিষ্যামি চ বঃ সদা

মম ধর্ম্যং বলিং দত্ত কিং বা মাং প্রতিপত্স্যথ
তে চেত্তমাগতং তত্র বৃণুয়ুঃ কুশলং ভবেৎ

তে চেদক্ষত্রিয়াঃ সন্তো বিরুধ্যেয়ুঃ কথংচন
সর্বোপায়ৈর্নিয়ন্তব্যা বিকর্মস্থা নরাধিপ

অশক্তং ক্ষত্রিয়ং মত্বা শস্ত্রং গৃহ্ণাত্যথাপরঃ
ত্রাণায়াপ্যসমর্থং তং মন্যমানমতীব চ

যুধিষ্ঠির উবাচ
অথ যঃ ক্ষত্রিয়ো রাজা ক্ষত্রিয়ং প্রত্যুপাব্রজেৎ
কথং স প্রতিয়োদ্ধব্যস্তন্মে ব্রূহি পিতামহ

ভীষ্ম উবাচ
নাসংনদ্ধো নাকবচো যোদ্ধব্যঃ ক্ষত্রিয়ো রণে
এক একেন বাচ্যশ্চ বিসৃজস্ব ক্ষিপামি চ

স চেত্সংনদ্ধ আগচ্ছেত্সংনদ্ধব্যং ততো ভবেৎ
স চেত্সসৈন্য আগচ্ছেত্সসৈন্যস্তমথাহ্বয়েৎ

স চেন্নিকৃত্যা যুধ্যেত নিকৃত্যা তং প্রয়োধয়েৎ
অথ চেদ্ধর্মতো যুধ্যেদ্ধর্মেণৈব নিবারয়েৎ

নাশ্বেন রথিনং যায়াদুদিয়াদ্রথিনং রথী
ব্যসনে ন প্রহর্তব্যং ন ভীতায় জিতায় চ

নেষুর্লিপ্তো ন কর্ণী স্যাদসতামেতদায়ুধম্
জয়ার্থমেব যোদ্ধব্যং ন ক্রুধ্যেদজিঘাংসতঃ

সাধূনাং তু মিথোভেদাত্সাধুশ্চেদ্ব্যসনী ভবেৎ
সব্রণো নাভিহন্তব্যো নানপত্যঃ কথংচন

ভগ্নশস্ত্রো বিপন্নাশ্বশ্ছিন্নজ্যো হতবাহনঃ
চিকিত্স্যঃ স্যাত্স্ববিষয়ে প্রাপ্যো বা স্বগৃহান্ভবেৎ
নির্ব্রণোঽপি চ মোক্তব্য এষ ধর্মঃ সনাতনঃ

তস্মাদ্ধর্মেণ যোদ্ধব্যং মনুঃ স্বায়ংভুবোঽব্রবীৎ
সত্সু নিত্যং সতাং ধর্মস্তমাস্থায় ন নাশয়েৎ

যো বৈ জয়ত্যধর্মেণ ক্ষত্রিয়ো বর্ধমানকঃ
আত্মানমাত্মনা হন্তি পাপো নিকৃতিজীবনঃ

কর্ম চৈতদসাধূনামসাধুং সাধুনা জয়েৎ
ধর্মেণ নিধনং শ্রেয়ো ন জয়ঃ পাপকর্মণা

নাধর্মশ্চরিতো রাজন্সদ্যঃ ফলতি গৌরিব
মূলান্যস্য প্রশাখাশ্চ দহন্সমনুগচ্ছতি

পাপেন কর্মণা বিত্তং লব্ধ্বা পাপঃ প্রহৃষ্যতি
স বর্ধমানঃ স্তেয়েন পাপঃ পাপে প্রসজ্জতি

ন ধর্মোঽস্তীতি মন্বানঃ শুচীনবহসন্নিব
অশ্রদ্দধানভাবাচ্চ বিনাশমুপগচ্ছতি

স বদ্ধো বারুণৈঃ পাশৈরমর্ত্য ইব মন্যতে
মহাদৃতিরিবাধ্মাতঃ স্বকৃতেন বিবর্ধতে

ততঃ সমূলো হ্রিয়তে নদীকূলাদিব দ্রুমঃ
অথৈনমভিনিন্দন্তি ভিন্নং কুম্ভমিবাশ্মনি
তস্মাদ্ধর্মেণ বিজয়ং কামং লিপ্সেত ভূমিপঃ