অধ্যায় 95

95.1

বামদেব উবাচ
অয়ুদ্ধেনৈব বিজয়ং বর্ধয়েদ্বসুধাধিপঃ
জঘন্যমাহুর্বিজয়ং যো যুদ্ধেন নরাধিপ

ন চাপ্যলব্ধং লিপ্সেত মূলে নাতিদৃঢে সতি
ন হি দুর্বলমূলস্য রাজ্ঞো লাভো বিধীয়তে

যস্য স্ফীতো জনপদঃ সংপন্নঃ প্রিয়রাজকঃ
সংতুষ্টপুষ্টসচিবো দৃঢমূলঃ স পার্থিবঃ

যস্য যোধাঃ সুসংতুষ্টাঃ সান্ত্বিতাঃ সূপধাস্থিতাঃ
অল্পেনাপি স দণ্ডেন মহীং জয়তি ভূমিপঃ

পৌরজানপদা যস্য স্বনুরক্তাঃ সুপূজিতাঃ
সধনা ধান্যবন্তশ্চ দৃঢমূলঃ স পার্থিবঃ

প্রভাবকালাবধিকৌ যদা মন্যেত চাত্মনঃ
তদা লিপ্সেত মেধাবী পরভূমিং ধনান্যুত

ভোগেষ্বদয়মানস্য ভূতেষু চ দয়াবতঃ
বর্ধতে ত্বরমাণস্য বিষয়ো রক্ষিতাত্মনঃ

তক্ষত্যাত্মানমেবৈষ বনং পরশুনা যথা
যঃ সম্যগ্বর্তমানেষু স্বেষু মিথ্যা প্রবর্ততে

ন বৈ দ্বিষন্তঃ ক্ষীয়ন্তে রাজ্ঞো নিত্যমপি ঘ্নতঃ
ক্রোধং নিয়ন্তুং যো বেদ তস্য দ্বেষ্টা ন বিদ্যতে

যদার্যজনবিদ্বিষ্টং কর্ম তন্নাচরেদ্বুধঃ
যত্কল্যাণমভিধ্যায়েত্তত্রাত্মানং নিয়োজয়েৎ

নৈনমন্যেঽবজানন্তি নাত্মনা পরিতপ্যতে
কৃত্যশেষেণ যো রাজা সুখান্যনুবুভূষতি

ইদংবৃত্তং মনুষ্যেষু বর্ততে যো মহীপতিঃ
উভৌ লোকৌ বিনির্জিত্য বিজয়ে সংপ্রতিষ্ঠতে

ভীষ্ম উবাচ
ইত্যুক্তো বামদেবেন সর্বং তত্কৃতবান্নৃপঃ
তথা কুর্বংস্ত্বমপ্যেতৌ লোকৌ জেতা ন সংশয়ঃ