Utshovঅধ্যায় 94
94.1
বামদেব উবাচ
যত্রাধর্মং প্রণয়তে দুর্বলে বলবত্তরঃ
তাং বৃত্তিমুপজীবন্তি যে ভবন্তি তদন্বয়াঃ
94.2
রাজানমনুবর্তন্তে তং পাপাভিপ্রবর্তকম্
অবিনীতমনুষ্যং তত্ক্ষিপ্রং রাষ্ট্রং বিনশ্যতি
94.3
যদ্বৃত্তিমুপজীবন্তি প্রকৃতিস্থস্য মানবাঃ
তদেব বিষমস্থস্য স্বজনোঽপি ন মৃষ্যতে
94.4
সাহসপ্রকৃতির্যত্র কুরুতে কিংচিদুল্বণম্
অশাস্ত্রলক্ষণো রাজা ক্ষিপ্রমেব বিনশ্যতি
94.5
যোঽত্যন্তাচরিতাং বৃত্তিং ক্ষত্রিয়ো নানুবর্ততে
জিতানামজিতানাং চ ক্ষত্রধর্মাদপৈতি সঃ
94.6
দ্বিষন্তং কৃতকর্মাণং গৃহীত্বা নৃপতী রণে
যো ন মানয়তে দ্বেষাত্ক্ষত্রধর্মাদপৈতি সঃ
94.7
শক্তঃ স্যাত্সুমুখো রাজা কুর্যাত্কারুণ্যমাপদি
প্রিয়ো ভবতি ভূতানাং ন চ বিভ্রশ্যতে শ্রিয়ঃ
94.8
অপ্রিয়ং যস্য কুর্বীত ভূয়স্তস্য প্রিয়ং চরেৎ
নচিরেণ প্রিয়ঃ স স্যাদ্যোঽপ্রিয়ঃ প্রিয়মাচরেৎ
94.9
মৃষাবাদং পরিহরেত্কুর্যাত্প্রিয়ময়াচিতঃ
ন চ কামান্ন সংরম্ভান্ন দ্বেষাদ্ধর্মমুত্সৃজেৎ
94.10
নাপত্রপেত প্রশ্নেষু নাভিভব্যাং গিরং সৃজেৎ
ন ত্বরেত ন চাসূয়েত্তথা সংগৃহ্যতে পরঃ
94.11
প্রিয়ে নাতিভৃশং হৃষ্যেদপ্রিয়ে ন চ সংজ্বরেৎ
ন মুহ্যেদর্থকৃচ্ছ্রেষু প্রজাহিতমনুস্মরন্
94.12
যঃ প্রিয়ং কুরুতে নিত্যং গুণতো বসুধাধিপঃ
তস্য কর্মাণি সিধ্যন্তি ন চ সংত্যজ্যতে শ্রিয়া
94.13
নিবৃত্তং প্রতিকূলেভ্যো বর্তমানমনুপ্রিয়ে
ভক্তং ভজেত নৃপতিস্তদ্বৈ বৃত্তং সতামিহ
94.14
অপ্রকীর্ণেন্দ্রিয়ং প্রাজ্ঞমত্যন্তানুগতং শুচিম্
শক্তং চৈবানুরক্তং চ যুঞ্জ্যান্মহতি কর্মণি
94.15
এবমেব গুণৈর্যুক্তো যো ন রজ্যতি ভূমিপম্
ভর্তুরর্থেষ্বসূয়ন্তং ন তং যুঞ্জীত কর্মণি
94.16
মূঢমৈন্দ্রিয়কং লুব্ধমনার্যচরিতং শঠম্
অনতীতোপধং হিংস্রং দুর্বুদ্ধিমবহুশ্রুতম্
94.17
ত্যক্তোপাত্তং মদ্যরতং দ্যূতস্ত্রীমৃগয়াপরম্
কার্যে মহতি যো যুঞ্জ্যাদ্ধীয়তে স নৃপঃ শ্রিয়ঃ
94.18
রক্ষিতাত্মা তু যো রাজা রক্ষ্যান্যশ্চানুরক্ষতি
প্রজাশ্চ তস্য বর্ধন্তে ধ্রুবং চ মহদশ্নুতে
94.19
যে কেচিদ্ভূমিপতয়স্তান্সর্বানন্ববেক্ষয়েৎ
সুহৃদ্ভিরনভিখ্যাতৈস্তেন রাজা ন রিষ্যতে
94.20
অপকৃত্য বলস্থস্য দূরস্থোঽস্মীতি নাশ্বসেৎ
শ্যেনানুচরিতৈর্হ্যেতে নিপতন্তি প্রমাদ্যতঃ
94.21
দৃঢমূলস্ত্বদুষ্টাত্মা বিদিত্বা বলমাত্মনঃ
অবলানভিয়ুঞ্জীত ন তু যে বলবত্তরাঃ
94.22
বিক্রমেণ মহীং লব্ধ্বা প্রজা ধর্মেণ পালয়ন্
আহবে নিধনং কুর্যাদ্রাজা ধর্মপরায়ণঃ
94.23
মরণান্তমিদং সর্বং নেহ কিংচিদনাময়ম্
তস্মাদ্ধর্মে স্থিতো রাজা প্রজা ধর্মেণ পালয়েৎ
94.24
রক্ষাধিকরণং যুদ্ধং তথা ধর্মানুশাসনম্
মন্ত্রচিন্ত্যং সুখং কালে পঞ্চভির্বর্ধতে মহী
94.25
এতানি যস্য গুপ্তানি স রাজা রাজসত্তম
সততং বর্তমানোঽত্র রাজা ভুঙ্ক্তে মহীমিমাম্
94.26
নৈতান্যেকেন শক্যানি সাতত্যেনান্ববেক্ষিতুম্
এতেষ্বাপ্তান্প্রতিষ্ঠাপ্য রাজা ভুঙ্ক্তে মহীং চিরম্
94.27
দাতারং সংবিভক্তারং মার্দবোপগতং শুচিম্
অসংত্যক্তমনুষ্যং চ তং জনাঃ কুর্বতে প্রিয়ম্
94.28
যস্তু নিঃশ্রেয়সং জ্ঞাত্বা জ্ঞানং তত্প্রতিপদ্যতে
আত্মনো মতমুত্সৃজ্য তং লোকোঽনুবিধীয়তে
94.29
যোঽর্থকামস্য বচনং প্রাতিকূল্যান্ন মৃষ্যতে
শৃণোতি প্রতিকূলানি বিমনা নচিরাদিব
94.30
অগ্রাম্যচরিতাং বুদ্ধিমত্যন্তং যো ন বুধ্যতে
জিতানামজিতানাং চ ক্ষত্রধর্মাদপৈতি সঃ
94.31
মুখ্যানমাত্যান্যো হিত্বা নিহীনান্কুরুতে প্রিয়ান্
স বৈ ব্যসনমাসাদ্য গাধমার্তো ন বিন্দতি
94.32
যঃ কল্যাণগুণাঞ্জ্ঞাতীন্দ্বেষান্নৈবাভিমন্যতে
অদৃঢাত্মা দৃঢক্রোধো নাস্যার্থো রমতেঽন্তিকে
94.33
অথ যো গুণসংপন্নান্হৃদয়স্যাপ্রিয়ানপি
প্রিয়েণ কুরুতে বশ্যাংশ্চিরং যশসি তিষ্ঠতি
94.34
নাকালে প্রণয়েদর্থান্নাপ্রিয়ে জাতু সংজ্বরেৎ
প্রিয়ে নাতিভৃশং হৃষ্যেদ্যুজ্যেতারোগ্যকর্মণি
94.35
কে মানুরক্তা রাজানঃ কে ভয়াত্সমুপাশ্রিতাঃ
মধ্যস্থদোষাঃ কে চৈষামিতি নিত্যং বিচিন্তয়েৎ
94.36
ন জাতু বলবান্ভূত্বা দুর্বলে বিশ্বসেত্ক্বচিৎ
ভারুণ্ডসদৃশা হ্যেতে নিপতন্তি প্রমাদ্যতঃ
94.37
অপি সর্বৈর্গুণৈর্যুক্তং ভর্তারং প্রিয়বাদিনম্
অভিদ্রুহ্যতি পাপাত্মা তস্মাদ্ধি বিভিষেজ্জনাৎ
94.38
এতাং রাজোপনিষদং যয়াতিঃ স্মাহ নাহুষঃ
মনুষ্যবিজয়ে যুক্তো হন্তি শত্রূননুত্তমান্