UtshovChapter 119
119.1
भीष्म उवाच
एवं शुनासमान्भृत्यान्स्वस्थाने यो नराधिपः
नियोजयति कृत्येषु स राज्यफलमश्नुते
Bhishma uvacha
Evam shunasamanbhrityansvasthane yo naradhipah
Niyojayati krityeshu sa rajyaphalamashnute
119.2
न श्वा स्वस्थानमुत्क्रम्य प्रमाणमभि सत्कृतः
आरोप्यः श्वा स्वकात्स्थानादुत्क्रम्यान्यत्प्रपद्यते
Na shva svasthanamutkramya pramanamabhi satkritah
Aropyah shva svakatsthanadutkramyanyatprapadyate
119.3
स्वजातिकुलसंपन्नाः स्वेषु कर्मस्ववस्थिताः
प्रकर्तव्या बुधा भृत्या नास्थाने प्रक्रिया क्षमा
Svajatikulasampannah sveshu karmasvavasthitah
Prakartavya budha bhritya nasthane prakriya kshama
119.4
अनुरूपाणि कर्माणि भृत्येभ्यो यः प्रयच्छति
स भृत्यगुणसंपन्नं राजा फलमुपाश्नुते
Anurupani karmani bhrityebhyo yah prayachchhati
Sa bhrityagunasampannam raja phalamupashnute
119.5
शरभः शरभस्थाने सिंहः सिंह इवोर्जितः
व्याघ्रो व्याघ्र इव स्थाप्यो द्वीपी द्वीपी यथा तथा
Sharabhah sharabhasthane sinhah sinha ivorjitah
Vyaghro vyaghra iva sthapyo dvipi dvipi yatha tatha
119.6
कर्मस्विहानुरूपेषु न्यस्या भृत्या यथाविधि
प्रतिलोमं न भृत्यास्ते स्थाप्याः कर्मफलैषिणा
Karmasvihanurupeshu nyasya bhritya yathavidhi
Pratilomam na bhrityaste sthapyah karmaphalaishina
119.7
यः प्रमाणमतिक्रम्य प्रतिलोमं नराधिपः
भृत्यान्स्थापयतेऽबुद्धिर्न स रञ्जयते प्रजाः
Yah pramanamatikramya pratilomam naradhipah
Bhrityansthapayatebuddhirna sa ranjayate prajah
119.8
न बालिशा न च क्षुद्रा न चाप्रतिमितेन्द्रियाः
नाकुलीना नराः पार्श्वे स्थाप्या राज्ञा हितैषिणा
Na balisha na cha kshudra na chapratimitendriyah
Nakulina narah parshve sthapya ragya hitaishina
119.9
साधवः कुशलाः शूरा ज्ञानवन्तोऽनसूयकाः
अक्षुद्राः शुचयो दक्षा नराः स्युः पारिपार्श्वकाः
Sadhavah kushalah shura gyanavantonasuyakah
Akshudrah shuchayo daksha narah syuh pariparshvakah
119.10
न्यग्भूतास्तत्पराः क्षान्ताश्चौक्षाः प्रकृतिजाः शुभाः
स्वे स्वे स्थानेऽपरिक्रुष्टास्ते स्यू राज्ञो बहिश्चराः
Nyagbhutastatparah kshantashchaukshah prakritijah shubhah
Sve sve sthaneparikrushtaste syu ragyo bahishcharah
119.11
सिंहस्य सततं पार्श्वे सिंह एव जनो भवेत्
असिंहः सिंहसहितः सिंहवल्लभते फलम्
Sinhasya satatam parshve sinha eva jano bhavet
Asinhah sinhasahitah sinhavallabhate phalam
119.12
यस्तु सिंहः श्वभिः कीर्णः सिंहकर्मफले रतः
न स सिंहफलं भोक्तुं शक्तः श्वभिरुपासितः
Yastu sinhah shvabhih kirnah sinhakarmaphale ratah
Na sa sinhaphalam bhoktum shaktah shvabhirupasitah
119.13
एवमेतैर्मनुष्येन्द्र शूरैः प्राज्ञैर्बहुश्रुतैः
कुलीनैः सह शक्येत कृत्स्नां जेतुं वसुंधराम्
Evametairmanushyendra shuraih pragyairbahushrutaih
Kulinaih saha shakyeta kritsnam jetum vasundharam
119.14
नावैद्यो नानृजुः पार्श्वे नाविद्यो नामहाधनः
संग्राह्यो वसुधापालैर्भृत्यो भृत्यवतां वर
Navaidyo nanrijuh parshve navidyo namahadhanah
Sangrahyo vasudhapalairbhrityo bhrityavatam vara
119.15
बाणवद्विसृता यान्ति स्वामिकार्यपरा जनाः
ये भृत्याः पार्थिवहितास्तेषां सान्त्वं प्रयोजयेत्
Banavadvisrita yanti svamikaryapara janah
Ye bhrityah parthivahitastesham santvam prayojayet
119.16
कोशश्च सततं रक्ष्यो यत्नमास्थाय राजभिः
कोशमूला हि राजानः कोशमूलकरो भव
Koshashcha satatam rakshyo yatnamasthaya rajabhih
Koshamula hi rajanah koshamulakaro bhava
119.17
कोष्ठागारं च ते नित्यं स्फीतं धान्यैः सुसंचितम्
सदास्तु सत्सु संन्यस्तं धनधान्यपरो भव
Koshthagaram cha te nityam sphitam dhanyaih susanchitam
Sadastu satsu sannyastam dhanadhanyaparo bhava
119.18
नित्ययुक्ताश्च ते भृत्या भवन्तु रणकोविदाः
वाजिनां च प्रयोगेषु वैशारद्यमिहेष्यते
Nityayuktashcha te bhritya bhavantu ranakovidah
Vajinam cha prayogeshu vaisharadyamiheshyate
119.19
ज्ञातिबन्धुजनावेक्षी मित्रसंबन्धिसंवृतः
पौरकार्यहितान्वेषी भव कौरवनन्दन
Gyatibandhujanavekshi mitrasambandhisanvritah
Paurakaryahitanveshi bhava kauravanandana
119.20
एषा ते नैष्ठिकी बुद्धिः प्रज्ञा चाभिहिता मया
श्वा ते निदर्शनं तात किं भूयः श्रोतुमिच्छसि
Esha te naishthiki buddhih pragya chabhihita maya
Shva te nidarshanam tata kim bhuyah shrotumichchhasi