UtshovChapter 121
121.1
युधिष्ठिर उवाच
अयं पितामहेनोक्तो राजधर्मः सनातनः
ईश्वरश्च महादण्डो दण्डे सर्वं प्रतिष्ठितम्
Yudhishthira uvacha
Ayam pitamahenokto rajadharmah sanatanah
Ishvarashcha mahadando dande sarvam pratishthitam
121.2
देवतानामृषीणां च पितॄणां च महात्मनाम्
यक्षरक्षःपिशाचानां मर्त्यानां च विशेषतः
Devatanamrishinam cha pitrinam cha mahatmanam
Yaksharakshahpishachanam martyanam cha visheshatah
121.3
सर्वेषां प्राणिनां लोके तिर्यक्ष्वपि निवासिनाम्
सर्वव्यापी महातेजा दण्डः श्रेयानिति प्रभो
Sarvesham praninam loke tiryakshvapi nivasinam
Sarvavyapi mahateja dandah shreyaniti prabho
121.4
इत्येतदुक्तं भवता सर्वं दण्ड्यं चराचरम्
दृश्यते लोकमासक्तं ससुरासुरमानुषम्
Ityetaduktam bhavata sarvam dandyam characharam
Drishyate lokamasaktam sasurasuramanusham
121.5
एतदिच्छाम्यहं ज्ञातुं तत्त्वेन भरतर्षभ
को दण्डः कीदृशो दण्डः किंरूपः किंपरायणः
Etadichchhamyaham gyatum tattvena bharatarshabha
Ko dandah kidrisho dandah kinrupah kimparayanah
121.6
किमात्मकः कथंभूतः कतिमूर्तिः कथंप्रभुः
जागर्ति स कथं दण्डः प्रजास्ववहितात्मकः
Kimatmakah kathambhutah katimurtih kathamprabhuh
Jagarti sa katham dandah prajasvavahitatmakah
121.7
कश्च पूर्वापरमिदं जागर्ति परिपालयन्
कश्च विज्ञायते पूर्वं कोऽपरो दण्डसंज्ञितः
किंसंस्थश्च भवेद्दण्डः का चास्य गतिरिष्यते
Kashcha purvaparamidam jagarti paripalayan
Kashcha vigyayate purvam koparo dandasangyitah
Kinsansthashcha bhaveddandah ka chasya gatirishyate
121.8
भीष्म उवाच
शृणु कौरव्य यो दण्डो व्यवहार्यो यथा च सः
यस्मिन्हि सर्वमायत्तं स दण्ड इह केवलः
Bhishma uvacha
Shrinu kauravya yo dando vyavaharyo yatha cha sah
Yasminhi sarvamayattam sa danda iha kevalah
121.9
धर्मस्याख्या महाराज व्यवहार इतीष्यते
तस्य लोपः कथं न स्याल्लोकेष्ववहितात्मनः
इत्यर्थं व्यवहारस्य व्यवहारत्वमिष्यते
Dharmasyakhya maharaja vyavahara itishyate
Tasya lopah katham na syallokeshvavahitatmanah
Ityartham vyavaharasya vyavaharatvamishyate
121.10
अपि चैतत्पुरा राजन्मनुना प्रोक्तमादितः
सुप्रणीतेन दण्डेन प्रियाप्रियसमात्मना
प्रजा रक्षति यः सम्यग्धर्म एव स केवलः
Api chaitatpura rajanmanuna proktamaditah
Supranitena dandena priyapriyasamatmana
Praja rakshati yah samyagdharma eva sa kevalah
121.11
अथोक्तमेतद्वचनं प्रागेव मनुना पुरा
जन्म चोक्तं वसिष्ठेन ब्रह्मणो वचनं महत्
Athoktametadvachanam prageva manuna pura
Janma choktam vasishthena brahmano vachanam mahat
121.12
प्रागिदं वचनं प्रोक्तमतः प्राग्वचनं विदुः
व्यवहारस्य चाख्यानाद्व्यवहार इहोच्यते
Pragidam vachanam proktamatah pragvachanam viduh
Vyavaharasya chakhyanadvyavahara ihochyate
121.13
दण्डात्त्रिवर्गः सततं सुप्रणीतात्प्रवर्तते
दैवं हि परमो दण्डो रूपतोऽग्निरिवोच्छिखः
Dandattrivargah satatam supranitatpravartate
Daivam hi paramo dando rupatognirivochchhikhah
121.14
नीलोत्पलदलश्यामश्चतुर्दंष्ट्रश्चतुर्भुजः
अष्टपान्नैकनयनः शङ्कुकर्णोर्ध्वरोमवान्
Nilotpaladalashyamashchaturdanshtrashchaturbhujah
Ashtapannaikanayanah shankukarnordhvaromavan
121.15
जटी द्विजिह्वस्ताम्रास्यो मृगराजतनुच्छदः
एतद्रूपं बिभर्त्युग्रं दण्डो नित्यं दुरावरः
Jati dvijihvastamrasyo mrigarajatanuchchhadah
Etadrupam bibhartyugram dando nityam duravarah
121.16
असिर्गदा धनुः शक्तिस्त्रिशूलं मुद्गरः शरः
मुसलं परशुश्चक्रं प्रासो दण्डर्ष्टितोमराः
Asirgada dhanuh shaktistrishulam mudgarah sharah
Musalam parashushchakram praso dandarshtitomarah
121.17
सर्वप्रहरणीयानि सन्ति यानीह कानिचित्
दण्ड एव हि सर्वात्मा लोके चरति मूर्तिमान्
Sarvapraharaniyani santi yaniha kanichit
Danda eva hi sarvatma loke charati murtiman
121.18
भिन्दंश्छिन्दन्रुजन्कृन्तन्दारयन्पाटयंस्तथा
घातयन्नभिधावंश्च दण्ड एव चरत्युत
Bhindanshchhindanrujankrintandarayanpatayanstatha
Ghatayannabhidhavanshcha danda eva charatyuta
121.19
असिर्विशसनो धर्मस्तीक्ष्णवर्त्मा दुरासदः
श्रीगर्भो विजयः शास्ता व्यवहारः प्रजागरः
Asirvishasano dharmastikshnavartma durasadah
Shrigarbho vijayah shasta vyavaharah prajagarah
121.20
शास्त्रं ब्राह्मणमन्त्रश्च शास्ता प्राग्वचनं गतः
धर्मपालोऽक्षरो देवः सत्यगो नित्यगो ग्रहः
Shastram brahmanamantrashcha shasta pragvachanam gatah
Dharmapaloksharo devah satyago nityago grahah
121.21
असङ्गो रुद्रतनयो मनुज्येष्ठः शिवंकरः
नामान्येतानि दण्डस्य कीर्तितानि युधिष्ठिर
Asango rudratanayo manujyeshthah shivankarah
Namanyetani dandasya kirtitani yudhishthira
121.22
दण्डो हि भगवान्विष्णुर्यज्ञो नारायणः प्रभुः
शश्वद्रूपं महद्बिभ्रन्महापुरुष उच्यते
Dando hi bhagavanvishnuryagyo narayanah prabhuh
Shashvadrupam mahadbibhranmahapurusha uchyate
121.23
यथोक्ता ब्रह्मकन्येति लक्ष्मीर्नीतिः सरस्वती
दण्डनीतिर्जगद्धात्री दण्डो हि बहुविग्रहः
Yathokta brahmakanyeti lakshmirnitih sarasvati
Dandanitirjagaddhatri dando hi bahuvigrahah
121.24
अर्थानर्थौ सुखं दुःखं धर्माधर्मौ बलाबले
दौर्भाग्यं भागधेयं च पुण्यापुण्ये गुणागुणौ
Arthanarthau sukham duhkham dharmadharmau balabale
Daurbhagyam bhagadheyam cha punyapunye gunagunau
121.25
कामाकामावृतुर्मासः शर्वरी दिवसः क्षणः
अप्रसादः प्रसादश्च हर्षः क्रोधः शमो दमः
Kamakamavriturmasah sharvari divasah kshanah
Aprasadah prasadashcha harshah krodhah shamo damah
121.26
दैवं पुरुषकारश्च मोक्षामोक्षौ भयाभये
हिंसाहिंसे तपो यज्ञः संयमोऽथ विषाविषम्
Daivam purushakarashcha mokshamokshau bhayabhaye
Hinsahinse tapo yagyah sanyamotha vishavisham
121.27
अन्तश्चादिश्च मध्यं च कृत्यानां च प्रपञ्चनम्
मदः प्रमादो दर्पश्च दम्भो धैर्यं नयानयौ
Antashchadishcha madhyam cha krityanam cha prapanchanam
Madah pramado darpashcha dambho dhairyam nayanayau
121.28
अशक्तिः शक्तिरित्येव मानस्तम्भौ व्ययाव्ययौ
विनयश्च विसर्गश्च कालाकालौ च भारत
Ashaktih shaktirityeva manastambhau vyayavyayau
Vinayashcha visargashcha kalakalau cha bharata
121.29
अनृतं ज्ञाज्ञता सत्यं श्रद्धाश्रद्धे तथैव च
क्लीबता व्यवसायश्च लाभालाभौ जयाजयौ
Anritam gyagyata satyam shraddhashraddhe tathaiva cha
Klibata vyavasayashcha labhalabhau jayajayau
121.30
तीक्ष्णता मृदुता मृत्युरागमानागमौ तथा
विराद्धिश्चैव राद्धिश्च कार्याकार्ये बलाबले
Tikshnata mriduta mrityuragamanagamau tatha
Viraddhishchaiva raddhishcha karyakarye balabale
121.31
असूया चानसूया च धर्माधर्मौ तथैव च
अपत्रपानपत्रपे ह्रीश्च संपद्विपच्च ह
Asuya chanasuya cha dharmadharmau tathaiva cha
Apatrapanapatrape hrishcha sampadvipachcha ha
121.32
तेजः कर्मणि पाण्डित्यं वाक्शक्तिस्तत्त्वबुद्धिता
एवं दण्डस्य कौरव्य लोकेऽस्मिन्बहुरूपता
Tejah karmani pandityam vakshaktistattvabuddhita
Evam dandasya kauravya lokesminbahurupata
121.33
न स्याद्यदीह दण्डो वै प्रमथेयुः परस्परम्
भयाद्दण्डस्य चान्योन्यं घ्नन्ति नैव युधिष्ठिर
Na syadyadiha dando vai pramatheyuh parasparam
Bhayaddandasya chanyonyam ghnanti naiva yudhishthira
121.34
दण्डेन रक्ष्यमाणा हि राजन्नहरहः प्रजाः
राजानं वर्धयन्तीह तस्माद्दण्डः परायणम्
Dandena rakshyamana hi rajannaharahah prajah
Rajanam vardhayantiha tasmaddandah parayanam
121.35
व्यवस्थापयति क्षिप्रमिमं लोकं नरेश्वर
सत्ये व्यवस्थितो धर्मो ब्राह्मणेष्ववतिष्ठते
Vyavasthapayati kshipramimam lokam nareshvara
Satye vyavasthito dharmo brahmaneshvavatishthate
121.36
धर्मयुक्ता द्विजाः श्रेष्ठा वेदयुक्ता भवन्ति च
बभूव यज्ञो वेदेभ्यो यज्ञः प्रीणाति देवताः
Dharmayukta dvijah shreshtha vedayukta bhavanti cha
Babhuva yagyo vedebhyo yagyah prinati devatah
121.37
प्रीताश्च देवता नित्यमिन्द्रे परिददत्युत
अन्नं ददाति शक्रश्चाप्यनुगृह्णन्निमाः प्रजाः
Pritashcha devata nityamindre paridadatyuta
Annam dadati shakrashchapyanugrihnannimah prajah
121.38
प्राणाश्च सर्वभूतानां नित्यमन्ने प्रतिष्ठिताः
तस्मात्प्रजाः प्रतिष्ठन्ते दण्डो जागर्ति तासु च
Pranashcha sarvabhutanam nityamanne pratishthitah
Tasmatprajah pratishthante dando jagarti tasu cha
121.39
एवंप्रयोजनश्चैव दण्डः क्षत्रियतां गतः
रक्षन्प्रजाः प्रजागर्ति नित्यं सुविहितोऽक्षरः
Evamprayojanashchaiva dandah kshatriyatam gatah
Rakshanprajah prajagarti nityam suvihitoksharah
121.40
ईश्वरः पुरुषः प्राणः सत्त्वं वित्तं प्रजापतिः
भूतात्मा जीव इत्येव नामभिः प्रोच्यतेऽष्टभिः
Ishvarah purushah pranah sattvam vittam prajapatih
Bhutatma jiva ityeva namabhih prochyateshtabhih
121.41
अददद्दण्ड एवास्मै ध्रुवमैश्वर्यमेव च
बले नयश्च संयुक्तः सदा पञ्चविधात्मकः
Adadaddanda evasmai dhruvamaishvaryameva cha
Bale nayashcha sanyuktah sada panchavidhatmakah
121.42
कुलबाहुधनामात्याः प्रज्ञा चोक्ता बलानि च
आहार्यं चाष्टकैर्द्रव्यैर्बलमन्यद्युधिष्ठिर
Kulabahudhanamatyah pragya chokta balani cha
Aharyam chashtakairdravyairbalamanyadyudhishthira
121.43
हस्तिनोऽश्वा रथाः पत्तिर्नावो विष्टिस्तथैव च
दैशिकाश्चारकाश्चैव तदष्टाङ्गं बलं स्मृतम्
Hastinoshva rathah pattirnavo vishtistathaiva cha
Daishikashcharakashchaiva tadashtangam balam smritam
121.44
अष्टाङ्गस्य तु युक्तस्य हस्तिनो हस्तियायिनः
अश्वारोहाः पदाताश्च मन्त्रिणो रसदाश्च ये
Ashtangasya tu yuktasya hastino hastiyayinah
Ashvarohah padatashcha mantrino rasadashcha ye
121.45
भिक्षुकाः प्राड्विवाकाश्च मौहूर्ता दैवचिन्तकाः
कोशो मित्राणि धान्यं च सर्वोपकरणानि च
Bhikshukah pradvivakashcha mauhurta daivachintakah
Kosho mitrani dhanyam cha sarvopakaranani cha
121.46
सप्तप्रकृति चाष्टाङ्गं शरीरमिह यद्विदुः
राज्यस्य दण्ड एवाङ्गं दण्डः प्रभव एव च
Saptaprakriti chashtangam shariramiha yadviduh
Rajyasya danda evangam dandah prabhava eva cha
121.47
ईश्वरेण प्रयत्नेन धारणे क्षत्रियस्य हि
दण्डो दत्तः समानात्मा दण्डो हीदं सनातनम्
राज्ञां पूज्यतमो नान्यो यथाधर्मप्रदर्शनः
Ishvarena prayatnena dharane kshatriyasya hi
Dando dattah samanatma dando hidam sanatanam
Ragyam pujyatamo nanyo yathadharmapradarshanah
121.48
ब्रह्मणा लोकरक्षार्थं स्वधर्मस्थापनाय च
भर्तृप्रत्यय उत्पन्नो व्यवहारस्तथापरः
तस्माद्यः सहितो दृष्टो भर्तृप्रत्ययलक्षणः
Brahmana lokarakshartham svadharmasthapanaya cha
Bhartripratyaya utpanno vyavaharastathaparah
Tasmadyah sahito drishto bhartripratyayalakshanah
121.49
व्यवहारस्तु वेदात्मा वेदप्रत्यय उच्यते
मौलश्च नरशार्दूल शास्त्रोक्तश्च तथापरः
Vyavaharastu vedatma vedapratyaya uchyate
Maulashcha narashardula shastroktashcha tathaparah
121.50
उक्तो यश्चापि दण्डोऽसौ भर्तृप्रत्ययलक्षणः
ज्ञेयो न स नरेन्द्रस्थो दण्डप्रत्यय एव च
Ukto yashchapi dandosau bhartripratyayalakshanah
Gyeyo na sa narendrastho dandapratyaya eva cha
121.51
दण्डप्रत्ययदृष्टोऽपि व्यवहारात्मकः स्मृतः
व्यवहारः स्मृतो यश्च स वेदविषयात्मकः
Dandapratyayadrishtopi vyavaharatmakah smritah
Vyavaharah smrito yashcha sa vedavishayatmakah
121.52
यश्च वेदप्रसूतात्मा स धर्मो गुणदर्शकः
धर्मप्रत्यय उत्पन्नो यथाधर्मः कृतात्मभिः
Yashcha vedaprasutatma sa dharmo gunadarshakah
Dharmapratyaya utpanno yathadharmah kritatmabhih
121.53
व्यवहारः प्रजागोप्ता ब्रह्मदिष्टो युधिष्ठिर
त्रीन्धारयति लोकान्वै सत्यात्मा भूतिवर्धनः
Vyavaharah prajagopta brahmadishto yudhishthira
Trindharayati lokanvai satyatma bhutivardhanah
121.54
यश्च दण्डः स दृष्टो नो व्यवहारः सनातनः
व्यवहारश्च यो दृष्टः स धर्म इति नः श्रुतः
यश्च वेदः स वै धर्मो यश्च धर्मः स सत्पथः
Yashcha dandah sa drishto no vyavaharah sanatanah
Vyavaharashcha yo drishtah sa dharma iti nah shrutah
Yashcha vedah sa vai dharmo yashcha dharmah sa satpathah
121.55
ब्रह्मा प्रजापतिः पूर्वं बभूवाथ पितामहः
लोकानां स हि सर्वेषां ससुरासुररक्षसाम्
समनुष्योरगवतां कर्ता चैव स भूतकृत्
Brahma prajapatih purvam babhuvatha pitamahah
Lokanam sa hi sarvesham sasurasurarakshasam
Samanushyoragavatam karta chaiva sa bhutakrit
121.56
ततो नो व्यवहारोऽयं भर्तृप्रत्ययलक्षणः
तस्मादिदमवोचाम व्यवहारनिदर्शनम्
Tato no vyavaharoyam bhartripratyayalakshanah
Tasmadidamavochama vyavaharanidarshanam
121.57
माता पिता च भ्राता च भार्या चाथ पुरोहितः
नादण्ड्यो विद्यते राज्ञां यः स्वधर्मे न तिष्ठति
Mata pita cha bhrata cha bharya chatha purohitah
Nadandyo vidyate ragyam yah svadharme na tishthati