Chapter 144

144.1

भीष्म उवाच
ततो गते शाकुनिके कपोती प्राह दुःखिता
संस्मृत्य भर्तारमथो रुदती शोकमूर्छिता

Bhishma uvacha
Tato gate shakunike kapoti praha duhkhita
Sansmritya bhartaramatho rudati shokamurchhita

नाहं ते विप्रियं कान्त कदाचिदपि संस्मरे
सर्वा वै विधवा नारी बहुपुत्रापि खेचर
शोच्या भवति बन्धूनां पतिहीना मनस्विनी

Naham te vipriyam kanta kadachidapi sansmare
Sarva vai vidhava nari bahuputrapi khechara
Shochya bhavati bandhunam patihina manasvini

लालिताहं त्वया नित्यं बहुमानाच्च सान्त्विता
वचनैर्मधुरैः स्निग्धैरसकृत्सुमनोहरैः

Lalitaham tvaya nityam bahumanachcha santvita
Vachanairmadhuraih snigdhairasakritsumanoharaih

कन्दरेषु च शैलानां नदीनां निर्झरेषु च
द्रुमाग्रेषु च रम्येषु रमिताहं त्वया प्रिय

Kandareshu cha shailanam nadinam nirjhareshu cha
Drumagreshu cha ramyeshu ramitaham tvaya priya

आकाशगमने चैव सुखिताहं त्वया सुखम्
विहृतास्मि त्वया कान्त तन्मे नाद्यास्ति किंचन

Akashagamane chaiva sukhitaham tvaya sukham
Vihritasmi tvaya kanta tanme nadyasti kinchana

मितं ददाति हि पिता मितं माता मितं सुतः
अमितस्य तु दातारं भर्तारं का न पूजयेत्

Mitam dadati hi pita mitam mata mitam sutah
Amitasya tu dataram bhartaram ka na pujayet

नास्ति भर्तृसमो नाथो न च भर्तृसमं सुखम्
विसृज्य धनसर्वस्वं भर्ता वै शरणं स्त्रियाः

Nasti bhartrisamo natho na cha bhartrisamam sukham
Visrijya dhanasarvasvam bharta vai sharanam striyah

न कार्यमिह मे नाथ जीवितेन त्वया विना
पतिहीनापि का नारी सती जीवितुमुत्सहेत्

Na karyamiha me natha jivitena tvaya vina
Patihinapi ka nari sati jivitumutsahet

एवं विलप्य बहुधा करुणं सा सुदुःखिता
पतिव्रता संप्रदीप्तं प्रविवेश हुताशनम्

Evam vilapya bahudha karunam sa suduhkhita
Pativrata sampradiptam pravivesha hutashanam

ततश्चित्राम्बरधरं भर्तारं सान्वपश्यत
विमानस्थं सुकृतिभिः पूज्यमानं महात्मभिः

Tatashchitrambaradharam bhartaram sanvapashyata
Vimanastham sukritibhih pujyamanam mahatmabhih

चित्रमाल्याम्बरधरं सर्वाभरणभूषितम्
विमानशतकोटीभिरावृतं पुण्यकीर्तिभिः

Chitramalyambaradharam sarvabharanabhushitam
Vimanashatakotibhiravritam punyakirtibhih

ततः स्वर्गगतः पक्षी भार्यया सह संगतः
कर्मणा पूजितस्तेन रेमे तत्र स भार्यया

Tatah svargagatah pakshi bharyaya saha sangatah
Karmana pujitastena reme tatra sa bharyaya