UtshovChapter 146
146.1
युधिष्ठिर उवाच
अबुद्धिपूर्वं यः पापं कुर्याद्भरतसत्तम
मुच्यते स कथं तस्मादेनसस्तद्वदस्व मे
Yudhishthira uvacha
Abuddhipurvam yah papam kuryadbharatasattama
Muchyate sa katham tasmadenasastadvadasva me
146.2
भीष्म उवाच
अत्र ते वर्णयिष्येऽहमितिहासं पुरातनम्
इन्द्रोतः शौनको विप्रो यदाह जनमेजयम्
Bhishma uvacha
Atra te varnayishyehamitihasam puratanam
Indrotah shaunako vipro yadaha janamejayam
146.3
आसीद्राजा महावीर्यः पारिक्षिज्जनमेजयः
अबुद्धिपूर्वं ब्रह्महत्या तमागच्छन्महीपतिम्
Asidraja mahaviryah parikshijjanamejayah
Abuddhipurvam brahmahatya tamagachchhanmahipatim
146.4
तं ब्राह्मणाः सर्व एव तत्यजुः सपुरोहिताः
जगाम स वनं राजा दह्यमानो दिवानिशम्
Tam brahmanah sarva eva tatyajuh sapurohitah
Jagama sa vanam raja dahyamano divanisham
146.5
स प्रजाभिः परित्यक्तश्चकार कुशलं महत्
अतिवेलं तपस्तेपे दह्यमानः स मन्युना
Sa prajabhih parityaktashchakara kushalam mahat
Ativelam tapastepe dahyamanah sa manyuna
146.6
तत्रेतिहासं वक्ष्यामि धर्मस्यास्योपबृंहणम्
दह्यमानः पापकृत्या जगाम जनमेजयः
Tatretihasam vakshyami dharmasyasyopabrinhanam
Dahyamanah papakritya jagama janamejayah
146.7
वरिष्यमाण इन्द्रोतं शौनकं संशितव्रतम्
समासाद्योपजग्राह पादयोः परिपीडयन्
Varishyamana indrotam shaunakam sanshitavratam
Samasadyopajagraha padayoh paripidayan
146.8
ततो भीतो महाप्राज्ञो जगर्हे सुभृशं तदा
कर्ता पापस्य महतो भ्रूणहा किमिहागतः
Tato bhito mahapragyo jagarhe subhrisham tada
Karta papasya mahato bhrunaha kimihagatah
146.9
किं तवास्मासु कर्तव्यं मा मा स्प्राक्षीः कथंचन
गच्छ गच्छ न ते स्थानं प्रीणात्यस्मानिह ध्रुवम्
Kim tavasmasu kartavyam ma ma sprakshih kathanchana
Gachchha gachchha na te sthanam prinatyasmaniha dhruvam
146.10
रुधिरस्येव ते गन्धः शवस्येव च दर्शनम्
अशिवः शिवसंकाशो मृतो जीवन्निवाटसि
Rudhirasyeva te gandhah shavasyeva cha darshanam
Ashivah shivasankasho mrito jivannivatasi
146.11
अन्तर्मृत्युरशुद्धात्मा पापमेवानुचिन्तयन्
प्रबुध्यसे प्रस्वपिषि वर्तसे चरसे सुखी
Antarmrityurashuddhatma papamevanuchintayan
Prabudhyase prasvapishi vartase charase sukhi
146.12
मोघं ते जीवितं राजन्परिक्लिष्टं च जीवसि
पापायेव च सृष्टोऽसि कर्मणे ह यवीयसे
Mogham te jivitam rajanpariklishtam cha jivasi
Papayeva cha srishtosi karmane ha yaviyase
146.13
बहु कल्याणमिच्छन्त ईहन्ते पितरः सुतान्
तपसा देवतेज्याभिर्वन्दनेन तितिक्षया
Bahu kalyanamichchhanta ihante pitarah sutan
Tapasa devatejyabhirvandanena titikshaya
146.14
पितृवंशमिमं पश्य त्वत्कृते नरकं गतम्
निरर्थाः सर्व एवैषामाशाबन्धास्त्वदाश्रयाः
Pitrivanshamimam pashya tvatkrite narakam gatam
Nirarthah sarva evaishamashabandhastvadashrayah
146.15
यान्पूजयन्तो विन्दन्ति स्वर्गमायुर्यशः सुखम्
तेषु ते सततं द्वेषो ब्राह्मणेषु निरर्थकः
Yanpujayanto vindanti svargamayuryashah sukham
Teshu te satatam dvesho brahmaneshu nirarthakah
146.16
इमं लोकं विमुच्य त्वमवाङ्मूर्धा पतिष्यसि
अशाश्वतीः शाश्वतीश्च समाः पापेन कर्मणा
Imam lokam vimuchya tvamavanmurdha patishyasi
Ashashvatih shashvatishcha samah papena karmana
146.17
अद्यमानो जन्तुगृध्रैः शितिकण्ठैरयोमुखैः
ततोऽपि पुनरावृत्तः पापयोनिं गमिष्यसि
Adyamano jantugridhraih shitikanthairayomukhaih
Tatopi punaravrittah papayonim gamishyasi
146.18
यदिदं मन्यसे राजन्नायमस्ति परः कुतः
प्रतिस्मारयितारस्त्वां यमदूता यमक्षये
Yadidam manyase rajannayamasti parah kutah
Pratismarayitarastvam yamaduta yamakshaye