UtshovChapter 147
147.1
भीष्म उवाच
एवमुक्तः प्रत्युवाच तं मुनिं जनमेजयः
गर्ह्यं भवान्गर्हयति निन्द्यं निन्दति मा भवान्
Bhishma uvacha
Evamuktah pratyuvacha tam munim janamejayah
Garhyam bhavangarhayati nindyam nindati ma bhavan
147.2
धिक्कार्यं मा धिक्कुरुते तस्मात्त्वाहं प्रसादये
सर्वं हीदं स्वकृतं मे ज्वलाम्यग्नाविवाहितः
Dhikkaryam ma dhikkurute tasmattvaham prasadaye
Sarvam hidam svakritam me jvalamyagnavivahitah
147.3
स्वकर्माण्यभिसंधाय नाभिनन्दति मे मनः
प्राप्तं नूनं मया घोरं भयं वैवस्वतादपि
Svakarmanyabhisandhaya nabhinandati me manah
Praptam nunam maya ghoram bhayam vaivasvatadapi
147.4
तत्तु शल्यमनिर्हृत्य कथं शक्ष्यामि जीवितुम्
सर्वमन्यून्विनीय त्वमभि मा वद शौनक
Tattu shalyamanirhritya katham shakshyami jivitum
Sarvamanyunviniya tvamabhi ma vada shaunaka
147.5
महानसं ब्राह्मणानां भविष्याम्यर्थवान्पुनः
अस्तु शेषं कुलस्यास्य मा पराभूदिदं कुलम्
Mahanasam brahmananam bhavishyamyarthavanpunah
Astu shesham kulasyasya ma parabhudidam kulam
147.6
न हि नो ब्रह्मशप्तानां शेषो भवितुमर्हति
श्रुतीरलभमानानां संविदं वेदनिश्चयात्
Na hi no brahmashaptanam shesho bhavitumarhati
Shrutiralabhamananam sanvidam vedanishchayat
147.7
निर्विद्यमानः सुभृशं भूयो वक्ष्यामि सांप्रतम्
भूयश्चैवाभिनङ्क्षन्ति निर्धर्मा निर्जपा इव
Nirvidyamanah subhrisham bhuyo vakshyami sampratam
Bhuyashchaivabhinankshanti nirdharma nirjapa iva
147.8
अर्वाक्च प्रतितिष्ठन्ति पुलिन्दशबरा इव
न ह्ययज्ञा अमुं लोकं प्राप्नुवन्ति कथंचन
Arvakcha pratitishthanti pulindashabara iva
Na hyayagya amum lokam prapnuvanti kathanchana
147.9
अविज्ञायैव मे प्रज्ञां बालस्येव सुपण्डितः
ब्रह्मन्पितेव पुत्रेभ्यः प्रति मां वाञ्छ शौनक
Avigyayaiva me pragyam balasyeva supanditah
Brahmanpiteva putrebhyah prati mam vanchha shaunaka
147.10
शौनक उवाच
किमाश्चर्यं यतः प्राज्ञो बहु कुर्याद्धि सांप्रतम्
इति वै पण्डितो भूत्वा भूतानां नोपतप्यति
Shaunaka uvacha
Kimashcharyam yatah pragyo bahu kuryaddhi sampratam
Iti vai pandito bhutva bhutanam nopatapyati
147.11
प्रज्ञाप्रासादमारुह्य अशोच्यः शोचते जनान्
जगतीस्थानिवाद्रिस्थः प्रज्ञया प्रतिपश्यति
Pragyaprasadamaruhya ashochyah shochate janan
Jagatisthanivadristhah pragyaya pratipashyati
147.12
न चोपलभते तत्र न च कार्याणि पश्यति
निर्विण्णात्मा परोक्षो वा धिक्कृतः सर्वसाधुषु
Na chopalabhate tatra na cha karyani pashyati
Nirvinnatma paroksho va dhikkritah sarvasadhushu
147.13
विदित्वोभयतो वीर्यं माहात्म्यं वेद आगमे
कुरुष्वेह महाशान्तिं ब्रह्मा शरणमस्तु ते
Viditvobhayato viryam mahatmyam veda agame
Kurushveha mahashantim brahma sharanamastu te
147.14
तद्वै पारत्रिकं चारु ब्राह्मणानामकुप्यताम्
अथ चेत्तप्यसे पापैर्धर्मं चेदनुपश्यसि
Tadvai paratrikam charu brahmananamakupyatam
Atha chettapyase papairdharmam chedanupashyasi
147.15
जनमेजय उवाच
अनुतप्ये च पापेन न चाधर्मं चराम्यहम्
बुभूषुं भजमानं च प्रतिवाञ्छामि शौनक
Janamejaya uvacha
Anutapye cha papena na chadharmam charamyaham
Bubhushum bhajamanam cha prativanchhami shaunaka
147.16
शौनक उवाच
छित्त्वा स्तम्भं च मानं च प्रीतिमिच्छामि ते नृप
सर्वभूतहिते तिष्ठ धर्मं चैव प्रतिस्मर
Shaunaka uvacha
Chhittva stambham cha manam cha pritimichchhami te nripa
Sarvabhutahite tishtha dharmam chaiva pratismara
147.17
न भयान्न च कार्पण्यान्न लोभात्त्वामुपाह्वये
तां मे देवा गिरं सत्यां शृण्वन्तु ब्राह्मणैः सह
Na bhayanna cha karpanyanna lobhattvamupahvaye
Tam me deva giram satyam shrinvantu brahmanaih saha
147.18
सोऽहं न केनचिच्चार्थी त्वां च धर्ममुपाह्वये
क्रोशतां सर्वभूतानामहो धिगिति कुर्वताम्
Soham na kenachichcharthi tvam cha dharmamupahvaye
Kroshatam sarvabhutanamaho dhigiti kurvatam
147.19
वक्ष्यन्ति मामधर्मज्ञा वक्ष्यन्त्यसुहृदो जनाः
वाचस्ताः सुहृदः श्रुत्वा संज्वरिष्यन्ति मे भृशम्
Vakshyanti mamadharmagya vakshyantyasuhrido janah
Vachastah suhridah shrutva sanjvarishyanti me bhrisham
147.20
केचिदेव महाप्राज्ञाः परिज्ञास्यन्ति कार्यताम्
जानीहि मे कृतं तात ब्राह्मणान्प्रति भारत
Kechideva mahapragyah parigyasyanti karyatam
Janihi me kritam tata brahmananprati bharata
147.21
यथा ते मत्कृते क्षेमं लभेरंस्तत्तथा कुरु
प्रतिजानीहि चाद्रोहं ब्राह्मणानां नराधिप
Yatha te matkrite kshemam labheranstattatha kuru
Pratijanihi chadroham brahmananam naradhipa
147.22
जनमेजय उवाच
नैव वाचा न मनसा न पुनर्जातु कर्मणा
द्रोग्धास्मि ब्राह्मणान्विप्र चरणावेव ते स्पृशे
Janamejaya uvacha
Naiva vacha na manasa na punarjatu karmana
Drogdhasmi brahmananvipra charanaveva te sprishe