UtshovChapter 169
169.1
युधिष्ठिर उवाच
अतिक्रामति कालेऽस्मिन्सर्वभूतक्षयावहे
किं श्रेयः प्रतिपद्येत तन्मे ब्रूहि पितामह
Yudhishthira uvacha
Atikramati kalesminsarvabhutakshayavahe
Kim shreyah pratipadyeta tanme bruhi pitamaha
169.2
भीष्म उवाच
अत्राप्युदाहरन्तीममितिहासं पुरातनम्
पितुः पुत्रेण संवादं तन्निबोध युधिष्ठिर
Bhishma uvacha
Atrapyudaharantimamitihasam puratanam
Pituh putrena sanvadam tannibodha yudhishthira
169.3
द्विजातेः कस्यचित्पार्थ स्वाध्यायनिरतस्य वै
बभूव पुत्रो मेधावी मेधावी नाम नामतः
Dvijateh kasyachitpartha svadhyayaniratasya vai
Babhuva putro medhavi medhavi nama namatah
169.4
सोऽब्रवीत्पितरं पुत्रः स्वाध्यायकरणे रतम्
मोक्षधर्मार्थकुशलो लोकतत्त्वविचक्षणः
Sobravitpitaram putrah svadhyayakarane ratam
Mokshadharmarthakushalo lokatattvavichakshanah
169.5
धीरः किं स्वित्तात कुर्यात्प्रजान;न्क्षिप्रं ह्यायुर्भ्रश्यते मानवानाम्
पितस्तदाचक्ष्व यथार्थयोगं; ममानुपूर्व्या येन धर्मं चरेयम्
Dhirah kim svittata kuryatprajana;nkshipram hyayurbhrashyate manavanam
Pitastadachakshva yatharthayogam; mamanupurvya yena dharmam chareyam
169.6
पितोवाच
वेदानधीत्य ब्रह्मचर्येण पुत्र; पुत्रानिच्छेत्पावनार्थं पितॄणाम्
अग्नीनाधाय विधिवच्चेष्टयज्ञो; वनं प्रविश्याथ मुनिर्बुभूषेत्
Pitovacha
Vedanadhitya brahmacharyena putra; putranichchhetpavanartham pitrinam
Agninadhaya vidhivachcheshtayagyo; vanam pravishyatha munirbubhushet
169.7
पुत्र उवाच
एवमभ्याहते लोके समन्तात्परिवारिते
अमोघासु पतन्तीषु किं धीर इव भाषसे
Putra uvacha
Evamabhyahate loke samantatparivarite
Amoghasu patantishu kim dhira iva bhashase
169.8
पितोवाच
कथमभ्याहतो लोकः केन वा परिवारितः
अमोघाः काः पतन्तीह किं नु भीषयसीव माम्
Pitovacha
Kathamabhyahato lokah kena va parivaritah
Amoghah kah patantiha kim nu bhishayasiva mam
169.9
पुत्र उवाच
मृत्युनाभ्याहतो लोको जरया परिवारितः
अहोरात्राः पतन्त्येते ननु कस्मान्न बुध्यसे
Putra uvacha
Mrityunabhyahato loko jaraya parivaritah
Ahoratrah patantyete nanu kasmanna budhyase
169.10
यदाहमेतज्जानामि न मृत्युस्तिष्ठतीति ह
सोऽहं कथं प्रतीक्षिष्ये जालेनापिहितश्चरन्
Yadahametajjanami na mrityustishthatiti ha
Soham katham pratikshishye jalenapihitashcharan
169.11
रात्र्यां रात्र्यां व्यतीतायामायुरल्पतरं यदा
गाधोदके मत्स्य इव सुखं विन्देत कस्तदा
तदेव वन्ध्यं दिवसमिति विद्याद्विचक्षणः
Ratryam ratryam vyatitayamayuralpataram yada
Gadhodake matsya iva sukham vindeta kastada
Tadeva vandhyam divasamiti vidyadvichakshanah
169.12
अनवाप्तेषु कामेषु मृत्युरभ्येति मानवम्
शष्पाणीव विचिन्वन्तमन्यत्रगतमानसम्
वृकीवोरणमासाद्य मृत्युरादाय गच्छति
Anavapteshu kameshu mrityurabhyeti manavam
Shashpaniva vichinvantamanyatragatamanasam
Vrikivoranamasadya mrityuradaya gachchhati
169.13
अद्यैव कुरु यच्छ्रेयो मा त्वा कालोऽत्यगादयम्
अकृतेष्वेव कार्येषु मृत्युर्वै संप्रकर्षति
Adyaiva kuru yachchhreyo ma tva kalotyagadayam
Akriteshveva karyeshu mrityurvai samprakarshati
169.14
श्वःकार्यमद्य कुर्वीत पूर्वाह्णे चापराह्णिकम्
न हि प्रतीक्षते मृत्युः कृतं वास्य न वा कृतम्
को हि जानाति कस्याद्य मृत्युसेना निवेक्ष्यते
Shvahkaryamadya kurvita purvahne chaparahnikam
Na hi pratikshate mrityuh kritam vasya na va kritam
Ko hi janati kasyadya mrityusena nivekshyate
169.15
युवैव धर्मशीलः स्यादनिमित्तं हि जीवितम्
कृते धर्मे भवेत्कीर्तिरिह प्रेत्य च वै सुखम्
Yuvaiva dharmashilah syadanimittam hi jivitam
Krite dharme bhavetkirtiriha pretya cha vai sukham
169.16
मोहेन हि समाविष्टः पुत्रदारार्थमुद्यतः
कृत्वा कार्यमकार्यं वा पुष्टिमेषां प्रयच्छति
Mohena hi samavishtah putradararthamudyatah
Kritva karyamakaryam va pushtimesham prayachchhati
169.17
तं पुत्रपशुसंमत्तं व्यासक्तमनसं नरम्
सुप्तं व्याघ्रं महौघो वा मृत्युरादाय गच्छति
Tam putrapashusammattam vyasaktamanasam naram
Suptam vyaghram mahaugho va mrityuradaya gachchhati
169.18
संचिन्वानकमेवैकं कामानामवितृप्तकम्
व्याघ्रः पशुमिवादाय मृत्युरादाय गच्छति
Sanchinvanakamevaikam kamanamavitriptakam
Vyaghrah pashumivadaya mrityuradaya gachchhati
169.19
इदं कृतमिदं कार्यमिदमन्यत्कृताकृतम्
एवमीहासुखासक्तं कृतान्तः कुरुते वशे
Idam kritamidam karyamidamanyatkritakritam
Evamihasukhasaktam kritantah kurute vashe
169.20
कृतानां फलमप्राप्तं कर्मणां फलसङ्गिनम्
क्षेत्रापणगृहासक्तं मृत्युरादाय गच्छति
Kritanam phalamapraptam karmanam phalasanginam
Kshetrapanagrihasaktam mrityuradaya gachchhati
169.21
मृत्युर्जरा च व्याधिश्च दुःखं चानेककारणम्
अनुषक्तं यदा देहे किं स्वस्थ इव तिष्ठसि
Mrityurjara cha vyadhishcha duhkham chanekakaranam
Anushaktam yada dehe kim svastha iva tishthasi
169.22
जातमेवान्तकोऽन्ताय जरा चान्वेति देहिनम्
अनुषक्ता द्वयेनैते भावाः स्थावरजङ्गमाः
Jatamevantakontaya jara chanveti dehinam
Anushakta dvayenaite bhavah sthavarajangamah
169.23
मृत्योर्वा गृहमेवैतद्या ग्रामे वसतो रतिः
देवानामेष वै गोष्ठो यदरण्यमिति श्रुतिः
Mrityorva grihamevaitadya grame vasato ratih
Devanamesha vai goshtho yadaranyamiti shrutih
169.24
निबन्धनी रज्जुरेषा या ग्रामे वसतो रतिः
छित्त्वैनां सुकृतो यान्ति नैनां छिन्दन्ति दुष्कृतः
Nibandhani rajjuresha ya grame vasato ratih
Chhittvainam sukrito yanti nainam chhindanti dushkritah
169.25
न हिंसयति यः प्राणान्मनोवाक्कायहेतुभिः
जीवितार्थापनयनैः कर्मभिर्न स बध्यते
Na hinsayati yah prananmanovakkayahetubhih
Jivitarthapanayanaih karmabhirna sa badhyate
169.26
न मृत्युसेनामायान्तीं जातु कश्चित्प्रबाधते
ऋते सत्यमसंत्याज्यं सत्ये ह्यमृतमाश्रितम्
Na mrityusenamayantim jatu kashchitprabadhate
Rite satyamasantyajyam satye hyamritamashritam
169.27
तस्मात्सत्यव्रताचारः सत्ययोगपरायणः
सत्यारामः समो दान्तः सत्येनैवान्तकं जयेत्
Tasmatsatyavratacharah satyayogaparayanah
Satyaramah samo dantah satyenaivantakam jayet
169.28
अमृतं चैव मृत्युश्च द्वयं देहे प्रतिष्ठितम्
मृत्युमापद्यते मोहात्सत्येनापद्यतेऽमृतम्
Amritam chaiva mrityushcha dvayam dehe pratishthitam
Mrityumapadyate mohatsatyenapadyatemritam
169.29
सोऽहं ह्यहिंस्रः सत्यार्थी कामक्रोधबहिष्कृतः
समदुःखसुखः क्षेमी मृत्युं हास्याम्यमर्त्यवत्
Soham hyahinsrah satyarthi kamakrodhabahishkritah
Samaduhkhasukhah kshemi mrityum hasyamyamartyavat
169.30
शान्तियज्ञरतो दान्तो ब्रह्मयज्ञे स्थितो मुनिः
वाङ्मनःकर्मयज्ञश्च भविष्याम्युदगायने
Shantiyagyarato danto brahmayagye sthito munih
Vanmanahkarmayagyashcha bhavishyamyudagayane
169.31
पशुयज्ञैः कथं हिंस्रैर्मादृशो यष्टुमर्हति
अन्तवद्भिरुत प्राज्ञः क्षत्रयज्ञैः पिशाचवत्
Pashuyagyaih katham hinsrairmadrisho yashtumarhati
Antavadbhiruta pragyah kshatrayagyaih pishachavat
169.32
यस्य वाङ्मनसी स्यातां सम्यक्प्रणिहिते सदा
तपस्त्यागश्च योगश्च स वै सर्वमवाप्नुयात्
Yasya vanmanasi syatam samyakpranihite sada
Tapastyagashcha yogashcha sa vai sarvamavapnuyat
169.33
नास्ति विद्यासमं चक्षुर्नास्ति विद्यासमं बलम्
नास्ति रागसमं दुःखं नास्ति त्यागसमं सुखम्
Nasti vidyasamam chakshurnasti vidyasamam balam
Nasti ragasamam duhkham nasti tyagasamam sukham
169.34
आत्मन्येवात्मना जात आत्मनिष्ठोऽप्रजोऽपि वा
आत्मन्येव भविष्यामि न मां तारयति प्रजा
Atmanyevatmana jata atmanishthoprajopi va
Atmanyeva bhavishyami na mam tarayati praja
169.35
नैतादृशं ब्राह्मणस्यास्ति वित्तं; यथैकता समता सत्यता च
शीले स्थितिर्दण्डनिधानमार्जवं; ततस्ततश्चोपरमः क्रियाभ्यः
Naitadrisham brahmanasyasti vittam; yathaikata samata satyata cha
Shile sthitirdandanidhanamarjavam; tatastatashchoparamah kriyabhyah
169.36
किं ते धनैर्बान्धवैर्वापि किं ते; किं ते दारैर्ब्राह्मण यो मरिष्यसि
आत्मानमन्विच्छ गुहां प्रविष्टं; पितामहस्ते क्व गतः पिता च
Kim te dhanairbandhavairvapi kim te; kim te darairbrahmana yo marishyasi
Atmanamanvichchha guham pravishtam; pitamahaste kva gatah pita cha
169.37
भीष्म उवाच
पुत्रस्यैतद्वचः श्रुत्वा तथाकार्षीत्पिता नृप
तथा त्वमपि वर्तस्व सत्यधर्मपरायणः
Bhishma uvacha
Putrasyaitadvachah shrutva tathakarshitpita nripa
Tatha tvamapi vartasva satyadharmaparayanah