UtshovChapter 170
170.1
युधिष्ठिर उवाच
धनिनो वाधना ये च वर्तयन्ति स्वतन्त्रिणः
सुखदुःखागमस्तेषां कः कथं वा पितामह
Yudhishthira uvacha
Dhanino vadhana ye cha vartayanti svatantrinah
Sukhaduhkhagamastesham kah katham va pitamaha
170.2
भीष्म उवाच
अत्राप्युदाहरन्तीममितिहासं पुरातनम्
शम्याकेन विमुक्तेन गीतं शान्तिगतेन ह
Bhishma uvacha
Atrapyudaharantimamitihasam puratanam
Shamyakena vimuktena gitam shantigatena ha
170.3
अब्रवीन्मां पुरा कश्चिद्ब्राह्मणस्त्यागमास्थितः
क्लिश्यमानः कुदारेण कुचैलेन बुभुक्षया
Abravinmam pura kashchidbrahmanastyagamasthitah
Klishyamanah kudarena kuchailena bubhukshaya
170.4
उत्पन्नमिह लोके वै जन्मप्रभृति मानवम्
विविधान्युपवर्तन्ते दुःखानि च सुखानि च
Utpannamiha loke vai janmaprabhriti manavam
Vividhanyupavartante duhkhani cha sukhani cha
170.5
तयोरेकतरे मार्गे यद्येनमभिसंनयेत्
न सुखं प्राप्य संहृष्येन्न दुःखं प्राप्य संज्वरेत्
Tayorekatare marge yadyenamabhisannayet
Na sukham prapya sanhrishyenna duhkham prapya sanjvaret
170.6
न वै चरसि यच्छ्रेय आत्मनो वा यदीहसे
अकामात्मापि हि सदा धुरमुद्यम्य चैव हि
Na vai charasi yachchhreya atmano va yadihase
Akamatmapi hi sada dhuramudyamya chaiva hi
170.7
अकिंचनः परिपतन्सुखमास्वादयिष्यसि
अकिंचनः सुखं शेते समुत्तिष्ठति चैव हि
Akinchanah paripatansukhamasvadayishyasi
Akinchanah sukham shete samuttishthati chaiva hi
170.8
आकिंचन्यं सुखं लोके पथ्यं शिवमनामयम्
अनमित्रमथो ह्येतद्दुर्लभं सुलभं सताम्
Akinchanyam sukham loke pathyam shivamanamayam
Anamitramatho hyetaddurlabham sulabham satam
170.9
अकिंचनस्य शुद्धस्य उपपन्नस्य सर्वशः
अवेक्षमाणस्त्रीँल्लोकान्न तुल्यमुपलक्षये
Akinchanasya shuddhasya upapannasya sarvashah
Avekshamanastrinllokanna tulyamupalakshaye
170.10
आकिंचन्यं च राज्यं च तुलया समतोलयम्
अत्यरिच्यत दारिद्र्यं राज्यादपि गुणाधिकम्
Akinchanyam cha rajyam cha tulaya samatolayam
Atyarichyata daridryam rajyadapi gunadhikam
170.11
आकिंचन्ये च राज्ये च विशेषः सुमहानयम्
नित्योद्विग्नो हि धनवान्मृत्योरास्यगतो यथा
Akinchanye cha rajye cha visheshah sumahanayam
Nityodvigno hi dhanavanmrityorasyagato yatha
170.12
नैवास्याग्निर्न चादित्यो न मृत्युर्न च दस्यवः
प्रभवन्ति धनज्यानिनिर्मुक्तस्य निराशिषः
Naivasyagnirna chadityo na mrityurna cha dasyavah
Prabhavanti dhanajyaninirmuktasya nirashishah
170.13
तं वै सदा कामचरमनुपस्तीर्णशायिनम्
बाहूपधानं शाम्यन्तं प्रशंसन्ति दिवौकसः
Tam vai sada kamacharamanupastirnashayinam
Bahupadhanam shamyantam prashansanti divaukasah
170.14
धनवान्क्रोधलोभाभ्यामाविष्टो नष्टचेतनः
तिर्यगीक्षः शुष्कमुखः पापको भ्रुकुटीमुखः
Dhanavankrodhalobhabhyamavishto nashtachetanah
Tiryagikshah shushkamukhah papako bhrukutimukhah
170.15
निर्दशंश्चाधरोष्ठं च क्रुद्धो दारुणभाषिता
कस्तमिच्छेत्परिद्रष्टुं दातुमिच्छति चेन्महीम्
Nirdashanshchadharoshtham cha kruddho darunabhashita
Kastamichchhetparidrashtum datumichchhati chenmahim
170.16
श्रिया ह्यभीक्ष्णं संवासो मोहयत्यविचक्षणम्
सा तस्य चित्तं हरति शारदाभ्रमिवानिलः
Shriya hyabhikshnam sanvaso mohayatyavichakshanam
Sa tasya chittam harati sharadabhramivanilah
170.17
अथैनं रूपमानश्च धनमानश्च विन्दति
अभिजातोऽस्मि सिद्धोऽस्मि नास्मि केवलमानुषः
इत्येभिः कारणैस्तस्य त्रिभिश्चित्तं प्रसिच्यते
Athainam rupamanashcha dhanamanashcha vindati
Abhijatosmi siddhosmi nasmi kevalamanushah
Ityebhih karanaistasya tribhishchittam prasichyate
170.18
स प्रसिक्तमना भोगान्विसृज्य पितृसंचितान्
परिक्षीणः परस्वानामादानं साधु मन्यते
Sa prasiktamana bhoganvisrijya pitrisanchitan
Parikshinah parasvanamadanam sadhu manyate
170.19
तमतिक्रान्तमर्यादमाददानं ततस्ततः
प्रतिषेधन्ति राजानो लुब्धा मृगमिवेषुभिः
Tamatikrantamaryadamadadanam tatastatah
Pratishedhanti rajano lubdha mrigamiveshubhih
170.20
एवमेतानि दुःखानि तानि तानीह मानवम्
विविधान्युपवर्तन्ते गात्रसंस्पर्शजानि च
Evametani duhkhani tani taniha manavam
Vividhanyupavartante gatrasansparshajani cha
170.21
तेषां परमदुःखानां बुद्ध्या भैषज्यमाचरेत्
लोकधर्मं समाज्ञाय ध्रुवाणामध्रुवैः सह
Tesham paramaduhkhanam buddhya bhaishajyamacharet
Lokadharmam samagyaya dhruvanamadhruvaih saha
170.22
नात्यक्त्वा सुखमाप्नोति नात्यक्त्वा विन्दते परम्
नात्यक्त्वा चाभयः शेते त्यक्त्वा सर्वं सुखी भव
Natyaktva sukhamapnoti natyaktva vindate param
Natyaktva chabhayah shete tyaktva sarvam sukhi bhava
170.23
इत्येतद्धास्तिनपुरे ब्राह्मणेनोपवर्णितम्
शम्याकेन पुरा मह्यं तस्मात्त्यागः परो मतः
Ityetaddhastinapure brahmanenopavarnitam
Shamyakena pura mahyam tasmattyagah paro matah